Injongo YaJehova Itawugcwaliseka

1, 2. (a) Yini Jehova lasichazele yona? (b) Ngusiphi sicinisekiso lesisitfola ku-Isaya 46:10, 11 naku-Isaya 55:11?

EMAVI ekucala laseBhayibhelini abonakala angemavi lalula kodvwa labalulekile. Lamavi atsi: “Ekucaleni Nkulunkulu wadala lizulu nemhlaba.” (Gen. 1:1) Kuliciniso kutsi kuncane lesikwatiko ngetintfo letinyenti letidalwe nguNkulunkulu, letinjengemkhatsi, kukhanya, kanye nangemandla ladvonsela phansi futsi sati nje incenyana yaloko lakudalile. (Shu. 3:11) Nanobe kunjalo, Jehova usichazele kutsi iyini injongo yakhe ngemhlaba nangebantfu. Umhlaba bewutawuba likhaya lelihle lebantfu lebebadalwe ngemfanekiso waNkulunkulu. (Gen. 1:26) Bebatawuba bantfwana bakhe bese kutsi Jehova abe nguBabe wabo.

² Sehluko sesitsatfu saGenesisi sikhuluma ngekutsi lenjongo yaJehova yaphatamiseka. (Gen. 3:1-7) Nanobe kunjalo, lena bekungasiyo inkinga lebeyingeke icatululeke. Kute umuntfu longavimba injongo yaJehova kutsi igcwaliseke. (Isa. 46:10, 11; 55:11) Ngako singaciniseka kutsi nakanjani injongo yaNkulunkulu itawugcwaliseka ngesikhatsi lesifanele!

3. (a) Nguluphi lwati lolubalulekile lesilutfola eBhayibhelini? (b) Kungani sicoca ngalenjongo yaNkulunkulu manje? (c) Ngumiphi imibuto lesitawucoca ngayo kulesihloko?

³ Kungenteka sikwetayele loko lokushiwo liBhayibheli ngenjongo yaNkulunkulu ngemhlaba nangebantfu futsi siyati kutsi Jesu udlala indzima lebalulekile kuze lenjongo yaNkulunkulu igcwaliseke. Lolwati lolumayelana nenjongo yaNkulunkulu lubaluleke kakhulu futsi kungenteka saba nalo nasisacala kufundza liBhayibheli. Ngako, sifuna kusita bantfu labanetinhlitiyo leticotfo kutsi nabo balutfole lolwati. Njengobe sicoca ngalesihloko, sisemkhankasweni wekumema bantfu labanyenti kutsi babekhona eSikhumbutweni sekufa kwaKhristu. (Luk. 22:19, 20) Labo labatawube bakhona kulomkhosi batawufundza lokunyenti ngenjongo yaNkulunkulu. Ngako, njengobe sekusele emalanga lambalwa kutsi kufike Sikhumbuto, kungaba kuhle ngatsi kucabanga ngemibuto lesingayisebentisa nasimema labo lesifundza nabo liBhayibheli kanye nalabanye labanetinhlitiyo leticotfo kuze sibente bakulangatelele kuba khona kulomkhosi. Kulesihloko sitawuphendvula imibuto lemitsatfu letsi: Beyiyini injongo yaNkulunkulu ngemhlaba nangebantfu? Konakala kuphi? Kungani sihlengo saJesu sibalulekile ekugcwalisekeni kwenjongo yaNkulunkulu?

BEYIYINI INJONGO YANKULUNKULU NGEMHLABA NANGEBANTFU?

4. Indalo yaNkulunkulu imdvumisa njani?

⁴ Jehova unguMdali lohlakaniphile. Konke lakudalako kuba sezingeni lelisetulu. (Gen. 1:31; Jer. 10:12) Yini lesingayifundza endalweni kanye nasendleleni lehleleke ngayo? Nasibuka indalo, siyamangala ngendlela leyentiwe ngayo, kungakhatsaliseki kutsi yincane nome yinkhulu, yonkhe inemsebenti wayo. Ngubani longabambi wangentasi nakabuka indlela ema-cells emuntfu lakheke ngayo, indlela luswane loluluhle ngayo nalusandza kutalwa, noma buhle bekushona kwelilanga? Siyajabula nasibuka lendalo ngoba Jehova wasidala saba nelikhono lekubona tintfo letinhle.​—Fundza Tihlabelelo 19:1; 104:24.

5. Yini Jehova layentako kute aciniseke kutsi indalo yakhe isebenta ngekubambisana?

⁵ Jehova wasibekela imincele, indalo yakhe iyakufakazela loko. Kute acinisekise kutsi indalo yakhe isebenta ngekubambisana, wabeka imitsetfo yemvelo kanye nemitsetfo yekutiphatsa. (Hla. 19:7-9) Bufakazi baloko kutsi, tonkhe tintfo letidaliwe tenta umsebenti lokufanele tiwente ngendlela Nkulunkulu latihlele kutsi tiwente ngayo kute tifeze injongo yakhe. Jehova wenta simiso sendlela indalo yakhe lokufanele isebentisane ngayo. Ngako, umtsetfo wemandla ladvonsela phansi wenta kube nekuvana emkhatsini wemhlaba kanye nemkhatsi, ulawule emagagasi kanye nelwandle futsi lomtsetfo wenta kutsi kube nekuhleleka etintfweni letiphilako emhlabeni. Yonkhe indalo, lefaka ekhatsi bantfu, icondziswa ngulemincele. Ngako, lokuhleleka lesikubona endalweni kubufakazi bekutsi Jehova unenjongo lenhle ngemhlaba kanye nangebantfu. Nasishumayela, singabenta yini bantfu kutsi bamati kancono Loyo lobangela lokuhleleka lokumangalisa kangaka?​—Semb. 4:11.

6, 7. Ngutiphi tintfo letinhle Jehova latipha bo-Adamu na-Eva?

⁶ Injongo yaJehova yasekucaleni ngebantfu beyikutsi baphile phakadze lamhlabeni. (Gen. 1:28; Hla. 37:29) Ngemusa, wanika bo-Adamu na-Eva tipho letinyenti letahlukehlukene kute bajabulele kuphila. (Fundza Jakobe 1:17.) Jehova wabaniketa inkhululeko yekutikhetsela, lokulikhono lekucondza, futsi wenta kutsi bakhone kutsandzana kanye nekujabulela bungani. UMdali wanika Adamu umtsetfo lobekufanele awulalele. Adamu wafundza nekutsi bekufanele atinakekele kanjani kanye nendlela yekunakekela tilwane nemhlaba. (Gen. 2:15-17, 19, 20) Jehova waphindze wadala bo-Adamu na-Eva baba nelikhono lekunambitsa, lekutsintsa, lekubona, lekuva kanye nelekuhogela. Loko bekutawubenta balijabulele kakhulu likhaya labo lelihle leliliPharadisi. Kulomndeni wekucala, letibusiso letifaka ekhatsi imisebenti lejabulisako kanye nemakhono lamanyenti lehlukene bekungeke kuphele.

⁷ Ngukuphi lokunye lobekuyinjongo yaNkulunkulu? Jehova wadala bo-Adamu na-Eva kutsi bakwati kutala bantfwana labete sono. Nkulunkulu bekahlose kutsi nebantfwana babo nabo babe nebabo bantfwana kute kube ngulapho wonkhe umhlaba sewugcwele bantfu. Jehova bekafuna kutsi bo-Adamu na-Eva nabo bonkhe batali lebebatawuba khona emhlabeni kutsi babatsandze bantfwana babo njengoba naye bekabatsandza bantfwana bakhe bekucala lebebete sono. Umhlaba nako konkhe lokukuwo bekutawuba likhaya labo kuze kube phakadze.​—Hla. 115:16.

KONAKALA KUPHI?

8. Kungani Jehova bekanike Adamu na-Eva lomyalo lokuGenesisi 2:16, 17?

⁸ Tintfo tase tiyashintja, tase atisahambi ngendlela Nkulunkulu lebekahlose ngayo. Kwentekani? Jehova bekanike bo-Adamu na-Eva umyalo lolula lebekufanele bawulalele kute bakhombise kutsi bayisebentisa kahle inkhululeko yabo yekutikhetsela. Nkulunkulu watsi: “Ungadla ngekutsandza kwakho tonkhe titselo letilapha ensimini; kodvwa ungasidli sitselo sesihlahla sekwati lokulungile nalokungakalungi, ngobe mhlazana usidla uyakufa nekufa.” (Gen. 2:16, 17) Lomtsetfo bewucacile futsi bekungasimatima ngabo-Adamu na-Eva kutsi bawulalele. Kube kufanele, ngobe bekukunyenti kudla lebebangakudla.

9, 10. (a) Sathane wamsola ngani Jehova? (b) Bo-Adamu na-Eva bakhetsa kwenta njani? (Buka sitfombe lesisekucaleni kwalesihloko.)

⁹ Sathane Develi wasebentisa inyoka kute ayenge Eva kutsi angamlaleli Babe wakhe longuJehova. (Fundza Genesisi 3:1-5; Semb. 12:9) Sathane wenta shengatsi Nkulunkulu bekangakabavumeli kutsi badle nobe ngusiphi “sitselo setihlahla letisensimini.” Kwaba shengatsi utsi: ‘Usho kutsi ngeke ukhone kwenta lokufunako?’ Wase sewucala emanga utsi: “Ningeke nife.” Ngemuva kwaloko wase sewetama kwenta Eva abone kutsi kute sidzingo sekulalela Nkulunkulu, ngekutsi atsi: “Nkulunkulu uyati kutsi mhlazana nisidla, emehlo enu ayawuvuleka.” Bekufana nekutsi Sathane utsi Jehova abengafuni kutsi badle lesitselo ngoba uyati kutsi nabasidla batawuhlakanipha. Ngetulu kwaloko, Sathane wabayenga ngekutsi atsi: ‘Nitawufanana naNkulunkulu nati lokuhle nalokubi.’

¹⁰ Manje, bo-Adamu na-Eva besekufanele bakhetse kutsi batawulalela bani. Bebatawulalela Jehova yini noma bebatawulalela Sathane? Bakhetsa kungamlaleli Nkulunkulu. Ngekwenta kwabo kanjalo baba seluhlangotsini lwaSathane. Bamlahla Jehova lobekanguBabe wabo futsi batikhweshisa esivikelweni sakhe.​—Gen. 3:6-13.

11. Kungani Jehova angakubeketelelanga lokuvukela kwabo-Adamu?

¹¹ Ngenca yekutsi bo-Adamu na-Eva abazange bamlalele Jehova, base baba nesono. Ngetulu kwaloko, lesento sabo sabangela kutsi bahlukaniswe naJehova ngobe ‘emehlo akhe ahlanteke kakhulu kutsi angabuka bubi.’ Ngako, “angeke akubeketelele lokubi.” (Hab. 1:13, NW) Kube Jehova wabubeketelela lobubi, inhlalakahle yato tonkhe tidalwa takhe letisemhlabeni noma letisezulwini, beyitawuphatamiseka. Ngetulu kwaloko, kube kute Nkulunkulu lakwenta ngalesono lesentiwa ensimini yase-Edeni, yonkhe indalo yakhe beyingeke isametsemba. Ngenca yekutsi Jehova wetsembekile, akashintji kuloko lakukhulumile. (Hla. 119:142) Ngako, kuba nenkhululeko yekutikhetsela kwabo-Adamu na-Eva bekungabaniketi lilungelo lekwephula umtsetfo waNkulunkulu. Umphumela wekungalaleli kwabo Jehova, waba kutsi bagcine bafile futsi babuyela elutfulini lapho bebatsatfwe khona.​—Gen. 3:19.

12. Kwentekani kubantfwana ba-Adamu?

¹² Ngalesikhatsi bo-Adamu na-Eva badla lesitselo lebekungakafaneli basidle, batilahlekisela lilungelo lekuba yincenye yemndeni waNkulunkulu. Ngako Nkulunkulu wabacosha ensimini yase-Edeni futsi bese bete litsemba lekuphindze babuyele kuyo. (Gen. 3:23, 24) Ngekwenta kanjalo, Jehova bekafuna kutsi babhekane nemiphumela yekuvukela kwabo. (Fundza Dutheronomi 32:4, 5.) Njengobe bantfu besebanesono, kute kubo lobesekangakhona kubulingisa ngalokuphelele buntfu baNkulunkulu. Adamu akatilahlekiselanga nje yena kuphela likusasa lelincono kakhulu, kodvwa wabangela kutsi bonkhe bantfwana bakhe babe nesono futsi bagcine sebafile. (Rom. 5:12) Walahlekisela sonkhe situkulwane sakhe kuphila lokuphakadze. Ngetulu kwako konkhe, bo-Adamu na-Eva bebangeke basatala umntfwana lote sono, loku kufaka ekhatsi ngisho nesitukulwane sabo. Sathane akagcinanga ngekudukisa bo-Adamu na-Eva kuphela, futsi usachubeka adukisa sonkhe sintfu ngisho nalamuhla.​—Joh. 8:44.

SIHLENGO SAFIKE SALUNGISA LOBEKONAKELE

13. Yini Jehova lafuna kutsi bonkhe bantfu bayijabulele?

¹³ Nobe kunjalo, lutsandvo lwaJehova ngebantfu alupheli. Nanobe bo-Adamu na-Eva bahlubuka, Jehova ufuna kutsi bonkhe bantfu bajabulele kuba nebuhlobo lobuhle naye. Akafuni kutsi kufe ngisho namunye. (2 Phet. 3:9) Ngekushesha nje ngemuva kwekuvukela kwabo, Nkulunkulu wenta emalungiselelo ekutsi sibuyisane naye ngesikhatsi lesifanako abe aloku agcina timiso takhe tilungile. Jehova wakwenta njani loko?

14. (a) Ngekusho kwaJohane 3:16, nguliphi lilungiselelo Jehova lalentile kuze abuyisele sintfu ekuphileni lokute sono? (b) Ngumuphi umbuto lokufanele siwuphendvule nasisita labo labalambele liciniso?

¹⁴ Fundza Johane 3:16. Bonkhe labo lesitawubamemela eSikhumbutweni batawulati ngenhloko lelivesi. Singase sitibute kutsi, Umhlatjelo waJesu usiniketa njani kuphila lokuphakadze? Umkhankaso weSikhumbuto, nelilanga leSikhumbuto ngekwalo kanye nekubuyela kubantfu labatawube bakhona kulomkhosi, konkhe loku kutasiniketa litfuba lekusita labo labalambele liciniso leliseBhayibhelini kutsi bayicondze kahle imphendvulo yalombuto lobalulekile. Batawujabula nasebayicondza ngalokugcwele indlela Jehova labatsandza ngayo kanye nangendlela lakhombise ngayo kutsi uhlakaniphile, ngekutsi alungiselele sihlengo. Ngumaphi emaphuzu lamayelana nesihlengo lokufanele siwacondze kahle?

15. Jesu wakhombisa njani kutsi wehlukile ku-Adamu?

¹⁵ Jehova wanikela ngemuntfu lote sono kute abe sihlengo. Loyo muntfu bekufanele etsembeke kuJehova futsi anikele ngekutitsandzela kuphila kwakhe kute akhulule sintfu esonweni. (Rom. 5:17-19) Jehova wendlulisela kuphila kwendvodzana yakhe yekucala ngekutsi isuke ezulwini ite lamhlabeni. (Joh. 1:14) Loko kwenta kutsi Jesu abe ngumuntfu lote sono njenga-Adamu. Ngalokungafani na-Adamu, Jesu waphila ngendlela Jehova labefuna kutsi aphile ngayo. Ngisho nalapho Jesu abhekene neluvivinyo lolumatima, akazange one nome ephule umtsetfo waNkulunkulu.

16. Yini leyenta sihlengo sibe sipho lesibaluleke kakhulu?

¹⁶ Njengobe bekete sono, Jesu wakwati kukhulula sintfu esonweni nasekufeni ngekutsi anikele ngekuphila kwakhe. Bekafanana ncamashi na-Adamu ngesikhatsi asengakabi nesono, ayindvodza leyetsembekile nalelalela Nkulunkulu. (1 Thim. 2:6) Umhlatjelo waJesu waba sihlengo ‘salabanyenti,’ lokufaka ekhatsi emadvodza, bafati nebantfwana kutsi batfole kuphila lokuphakadze. (Mat. 20:28) Ngako umhlatjelo waJesu uyindlela lencono kakhulu lebeyingasetjentiswa nguNkulunkulu kuze afeze injongo yakhe yasekucaleni. (2 Khor. 1:19, 20) Sihlengo siphindze sinikete bonkhe bantfu labatsembekile litfuba lekutfola kuphila lokuphakadze.

JEHOVA WASENTELA INDLELA YEKUBUYELA KUYE

17. Ngutiphi tintfo lesitatitfola ngenca yemhlatjelo waJesu?

¹⁷ Jehova walahlekelwa kakhulu ngalesihlengo. (1 Phet. 1:19) Sintfu bekasitsatsa njengalesiligugu kakhulu kangangekutsi waze wanikela ngeNdvodzana yakhe letelwe yodvwana kutsi isifele. (1 Joh. 4:9, 10) Ngemcondvo lotsite, Jesu wangena esikhundleni sababe wetfu wekucala longu-Adamu. (1 Khor. 15:45) Ngekwenta kwakhe kanjalo, Jesu wabuyisela lokungetulu kwekuphila, waphindze wasiniketa litfuba lekuphindze sibe ngumndeni waNkulunkulu. Nanobe Jehova angasemukela sintfu njengemndeni wakhe, ngemhlatjelo waJesu, usabheke kutsi siphile ngekuvumelana nemitsetfo yakhe. Asijabuli yini nasicabanga kutsi bonkhe bantfu labatsembekile batawugcina bete sono? Kutawuba nebunye emndenini wasezulwini kanye newasemhlabeni. Ngemcondvo lophelele, sonkhe sitawuba bantfwana baNkulunkulu.​—Rom. 8:21.

18. Kunini lapho khona Jehova atawuba “nguko konkhe kubo bonkhe”?

¹⁸ Kuvukela kwaSathane akuzange kumvimbe Jehova kutsi akhombise lutsandvo lwakhe ngesintfu, futsi akuzange kuvimbele bantfu labanesono kutsi betsembeke kuJehova. Ngemhlatjelo waJesu, Jehova utawusita bonkhe bantfwana bakhe kutsi bagcine balungile ngemcondvo lophelele. Cabanga nje kutsi kuphila kutawuba njani ngesikhatsi “wonkhe umuntfu lobona iNdvodzana, akholwe nangiyo” sekaphila phakadze. (Joh. 6:40) Ngelutsandvo lwakhe kanye nekuhlakanipha kwakhe, Jehova utawubuyisela sonkhe sintfu ekuphileni lokute sono ngekuvumelana nenjongo yakhe yasekucaleni. Babe wetfu longuJehova utawubese sewuba “nguko konkhe kubo bonkhe.”​—1 Khor. 15:28.

19. (a) Kukhombisa kubonga ngesihlengo kufanele kusikhutsate kutsi senteni? (Buka libhokisi lelitsi ‘Asichubeke Sifuna Bantfu Labafanelekako.’) (b) Nguyiphi inkinga letawucatululwa sihlengo lesitawucoca ngayo esihlokweni lesilandzelako?

¹⁹ Kukhombisa kutsi siyabonga ngalesihlengo kutasikhutsata kutsi sente konkhe lesingakwenta kute sente bantfu bati kutsi bangazuza kulesipho lesikhulu. Bonkhe bantfu kufanele bati kutsi lesihlengo siyindlela Jehova lakhombisa ngayo kutsi uyasitsandza futsi ufuna sitfole kuphila lokuphakadze. Nobe kunjalo, sihlengo senta lokungetulu kwaloko. Sihloko lesilandzelako sitawucoca ngekutsi umhlatjelo waJesu uyicatulula njani inkinga yekutibusa leyaphakanyiswa nguSathane ensimini yase-Edeni.