Umhlatjelo ‘Sipho Lesihle’ Lesisiphiwe NguBabe

1. Ngutiphi tibusiso letiletfwa sihlengo?

KUNETIBUSISO letinyenti letiletfwa sihlengo saJesu Khristu. Sihlengo siniketa bantfwana ba-Adamu labetsembekile litfuba lekutsi babe ngemalunga emndeni waNkulunkulu. Sihlengo siphindze sisinikete litfuba lekujabulela kuphila lokuphakadze. Nobe kunjalo, sihlengo saKhristu senta lokungetulu nje kwekutsi bantfu labalalelako batfole likusasa lelincono. Kuhlala kwaJesu etsembekile kuze kube sekufeni, kwacatulula tinkinga letinyenti letikhungetse umhlaba wonkhe.​—Heb. 1:8, 9.

2. (a) Ngutiphi tintfo letitsintsa umhlaba wonkhe lekukhulunywa ngato emthantazweni waJesu? (Buka sitfombe lesisekucaleni kwalesihloko.) (b) Sitawucoca ngani kulesihloko?

² Ngesikhatsi kusesele iminyaka lemibili ngaphambi kwekutsi Jesu afe, watjela bafundzi bakhe kutsi babothantaza batsi: “Babe wetfu losezulwini, alingcweliswe libito lakho. UMbuso wakho awute. Intsandvo yakho ayentiwe emhlabeni njengasezulwini.” (Mat. 6:9, 10) Kuze sibone kutsi sihlengo sibaluleke ngani, asesicoce ngekutsi sihlobene kanjani nekungcweliswa kwelibito laNkulunkulu, nekubusa kweMbuso waNkulunkulu kanye nangekugcwaliseka kwenjongo yakhe.

“ALINGCWELISWE LIBITO LAKHO”

3. Yini lechazwa libito laJehova, futsi Sathane walinyundzela njani?

³ Emavini akhe ekucala lawasho emthantazweni losibonelo, Jesu wakhuluma ngekungcwelisa libito laNkulunkulu. Libito laJehova libuchaza kahle buhle bakhe, ludvumo lwakhe kanye nebungcwele bakhe. Kulomunye umthantazo, Jesu wabita Jehova ngekutsi nguBabe “Longcwele.” (Joh. 17:11) Njengobe Jehova angcwele, tonkhe timiso takhe kanye nemitsetfo yakhe kungcwele. Nanobe kunjalo, ngesikhatsi bo-Adamu basensimini yase-Edeni, Sathane ngebucili wasola lilungelo laNkulunkulu lekushayela bantfu imitsetfo. Ngekukhuluma emanga ngaJehova, Sathane abenyundzela libito laNkulunkulu lelingcwele.​—Gen. 3:1-5.

4. Jesu walingcwelisa njani libito laNkulunkulu?

⁴ Ngakulolunye luhlangotsi, Jesu abelitsandza mbamba libito laJehova. (Joh. 17:25, 26) Jesu wenta kutsi lelibito leliphakeme lingcweliswe. (Fundza Tihlabelelo 40:8-10.) Ngekuphila imphilo lete sono, Jesu wakhombisa kutsi kunengcondvo futsi kukulunga ngaJehova kwentela bantfu bakhe labahlakaniphile imitsetfo. Ngisho nobe Sathane abangela kufa kwaJesu lokubuhlungu, Jesu wachubeka etsembekile kuBabe wakhe wasezulwini. Ngekuhlala kwakhe etsembekile, Jesu abekhombisa kutsi umuntfu lote sono angakhona kuyilalela imitsetfo yaNkulunkulu lelungile.

5. Singasifaka njani sandla ekungcweliseni libito laNkulunkulu?

⁵ Singakhombisa njani kutsi siyalitsandza libito laJehova? Singakhombisa ngendlela lesitiphatsa ngayo. Jehova ufuna sibe ngcwele. (Fundza 1 Phetro 1:15, 16.) Loku kusho kutsi kufanele sikhonte Jehova kuphela futsi silalele imiyalo yakhe ngenhlitiyo yonkhe. Ngisho nome sishushiswa, senta konkhe lokusemandleni etfu kutsi siphile ngekuvumelana netimiso takhe letilungile kanye nemitsetfo yakhe. Nangabe senta tento letilungile, sisuke sivumela kukhanya kwetfu kubonakale kubantfu futsi loko kuletsa ludvumo egameni laJehova. (Mat. 5:14-16) Njengebantfu labangcwele, nangabe siphila ngetimiso taNkulunkulu, sisuke sikhombisa kutsi imitsetfo yaJehova ilungile kodvwa tinsolo taSathane tingemanga. Nangabe senta emaphutsa, sivele siphendvuke ngebucotfo futsi sishiye yonkhe imikhumba lengamjabulisi Jehova.​—Hla. 79:9.

6. Nanobe sinesono, kungani Jehova angasitsatsa njengalabalungile?

⁶ Jehova usebentisa umhlatjelo waKhristu kute atsetselele labo labanekukholwa. Ubemukela njengetikhonti takhe labo labatinikela kuye. Jehova ubita emaKhristu lagcotjiwe ngekutsi ngemadvodzana akhe bese kutsi labo labanguletinye timvu ababite ngekutsi bangani bakhe. (Joh. 10:16; Rom. 5:1, 2; Jak. 2:21-25) Ngisho nalamuhla, sihlengo sisisita kutsi sibe nebuhlobo lobuhle naBabe wetfu futsi sibe nencenye ekungcweliseni libito lakhe.

“UMBUSO WAKHO AWUTE”

7. Ngutiphi tibusiso letitawuletfwa sihlengo nasekubusa uMbuso waNkulunkulu lamhlabeni?

⁷ Emthantazweni wakhe losibonelo, Jesu wancenga Nkulunkulu watsi: “UMbuso wakho awute.” Lesihlengo sihlobana njani neMbuso waNkulunkulu? Sihlengo sivulela labo labangu-144 000 litfuba lekutsi bayoba ngemakhosi nebaphristi kanye naKhristu ezulwini. (Semb. 5:9, 10; 14:1) Jesu akanye nalabo latawubusa nabo, batawusebentisa lesihlengo kute baletsele bantfu labalalelako tibusiso eminyakeni leyinkhulungwane. Umhlaba utawentiwa lipharadisi futsi kancane kancane bonkhe bantfu labetsembekile batawukhululeka esonweni, kuphindze kube nebuhlobo lobuhle emkhatsini wemndeni wasezulwini naloyo lotawube usemhlabeni. (Semb. 5:13; 20:6) Jesu utawufihlita inhloko yenyoka, futsi ashanyele yonkhe imisalela yekuvukela kwaSathane.​—Gen. 3:15.

8. (a) Jesu wabasita njani bafundzi bakhe kutsi babone kubaluleka kweMbuso waNkulunkulu? (b) Siwusekela njani loMbuso lamuhla?

⁸ Ngesikhatsi Jesu alamhlabeni, wasita bafundzi bakhe kutsi bakubone kubaluleka kweMbuso waNkulunkulu. Ngekushesha nje ngemuva kwekubhajatiswa kwakhe, Jesu wamemetela ‘tindzaba letimnandzi teMbuso waNkulunkulu’ etindzaweni letikhashane. (Luk. 4:43) Ngaphambi kwekutsi Jesu abuyele ezulwini, watjela bafundzi bakhe kutsi kufanele babe bofakazi bakhe “nakuto tonkhe tincenye temhlaba.” (Imis. 1:6-8) Nangabe umsebenti wekushumayela ngeMbuso wentiwa emhlabeni wonkhe, tonkhe tinhlobo tebantfu titawutfola litfuba lekwati ngesihlengo futsi titfole litfuba lekuba takhamuti teMbuso waNkulunkulu. Esikhatsini setfu, sikhombisa kutsi siyawusekela loMbuso ngekulekelela bomnakaboKhristu labasemhlabeni ngekutsi sishumayele tindzaba letimnandzi teMbuso emhlabeni wonkhe.​—Mat. 24:14; 25:40.

“INTSANDVO YAKHO AYENTIWE”

9. Kungani singaciniseka kutsi injongo yaJehova ngebantfu itawufezeka?

⁹ Bekasho kutsini Jesu nakaphindze atsi: “Intsandvo yakho ayentiwe”? Jehova unguMdali. Nakakhuluma lokutsite, kuba shengatsi leyontfo seyivele yentekile. (Isa. 55:11) Ngeke akuvumele kuvukela kwaSathane kutsi kuvimbele injongo yakhe ngebantfu kutsi yenteke. Kusukela ekucaleni, bekuvele kuyinjongo yaJehova kutsi umhlaba ugcwale bantfwana ba-Adamu na-Eva labete sono. (Gen. 1:28) Kube bo-Adamu na-Eva bafa bete bantfwana, injongo yaNkulunkulu yekugcwalisa umhlaba ngebantfu beyingeke ifezeke. Ngako, ngemuva kwekutsi bo-Adamu na-Eva bone, Jehova wabavumela kutsi batale bantfwana. Asebentisa sihlengo, Nkulunkulu unikete bonkhe bantfu labakhombisa kukholwa kuye litfuba lekuphila phakadze futsi babuyiselwe esimeni sekuba bete sono. Jehova uyasitsandza futsi kuyintsandvo yakhe kutsi bantfu labalalelako baphile njengobe bekahlosile.

10. Sihlengo sitawubazuzisa ngani labafile?

¹⁰ Kutsiwani ngetigidzi tebantfu letafa tingakalitfoli litfuba lekwati Jehova futsi timkhonte? Sihlengo sisiniketa litsemba lekutsi titawuvuka. Babe wetfu wasezulwini lonelutsandvo utawutivusa ekufeni futsi aphindze atinikete litfuba lekufundza ngetinjongo takhe kanye nelitfuba lekuphila phakadze. (Imis. 24:15) Jehova akafuni kutsi bantfu bafe kodvwa ufuna baphile. NjengeMtfombo wekuphila, uba nguBabe wabo bonkhe labatawuvuka. (Hla. 36:9) Ngako, bekufaneleka ngaJesu kutsi asifundzise kuthantaza sitsi: “Babe wetfu losezulwini.” (Mat. 6:9) Jehova unikete Jesu umsebenti lobalulekile elungiselelweni leluvuko. (Joh. 6:40, 44) Emhlabeni loliPharadisi, Jesu utawugcwalisa indzima yakhe yekuba ‘kuvuka nekuphila.’​—Joh.11:25.

11. Siyini sifiso saNkulunkulu lesiphatselene ‘nesicumbi lesikhulu’?

¹¹ Umusa waJehova utawubenela bonkhe bantfu, ngobe Jesu watsi: “Nobe ngubani lowenta intsandvo yaNkulunkulu nguye longumnaketfu, dzadzewetfu kanye namake.” (Mak. 3:35) Kusifiso saNkulunkulu kutsi “sicumbi lesikhulu” lesingabaleki lesivela kuto tonkhe tive, tinhlanga kanye netilwimi kutsi sibe yincenye yetikhonti takhe. Bonkhe labo labakhombisa kukholwa emhlatjelweni waKhristu futsi labenta intsandvo yakhe bangaba semkhatsini walabo labayomemeta batsi: “Insindziso ivela kuNkulunkulu wetfu lohleti esihlalweni sebukhosi, nakulo liWundlu.”​—Semb. 7:9, 10.

12. Injongo yaJehova ngebantfu labalalelako ikhonjiswe njani emthantazweni losibonelo?

¹² Injongo yaJehova ngebantfu labalalelako ibonakala kuloko Jesu lakusho emthantazweni wakhe losibonelo. Ngekuvumelana nalomthantazo, sifuna kwenta konkhe lokusemandleni etfu kutsi singcwelise libito laJehova nobe siliphatse ngebungcwele. (Isa. 8:13) Libito laJesu lisho kutsi “Jehova Uyinsindziso” futsi kusindziswa kwetfu ngemhlatjelo kutawuletsa ludvumo nenkhatimulo egameni laJehova. Umbuso waNkulunkulu ngiwo lotawuletsa tibusiso letita ngesihlengo kubantfu labalalelako. Ngako lomthantazo losibonelo usicinisekisa ngekutsi kute lokutawuvimba intsandvo yaNkulunkulu kutsi yenteke.​—Hla. 135:6; Isa. 46:9, 10.

KHOMBISA KUTSI UYABONGA NGESIHLENGO

13. Sisuke sikhombisani nasibhatjatiswa?

¹³ Lenye indlela lesikhombisa ngayo kutsi siyabonga ngesihlengo kutsi sitinikele kuJehova ngesisekelo sekukholwa kwetfu esihlengweni futsi sibhatjatiswe. Nasibhatjatiswa sisuke sikhombisa kutsi “sibaJehova.” (Rom. 14:8) Sisuke sicela Nkulunkulu kutsi asisite sibe nanembeza lohlantekile. (1 Phet. 3:21) Jehova uphendvula leso sicelo setfu ngekutsi asebentise ingati yaJesu. Ngako, siyaciniseka kutsi utasinika konkhe loko lasetsembise kona.​—Rom. 8:32.

14. Kungani siyalwa kutsi kufanele sitsandze bomakhelwane betfu?

¹⁴ Nguyiphi lenye indlela lesingakhombisa ngayo kutsi siyabonga ngesihlengo? Njengobe tonkhe tintfo Jehova latentako tisekelwe elutsandvweni lwakhe, ngako kusifiso sakhe kutsi tonkhe tinceku takhe tikhombise lutsandvo njengebuntfu lobubalulekile. (1 Joh. 4:8-11) Sikhombisa kutsi siyakufuna kuba ‘ngemadvodzana aBabe wetfu losezulwini’ ngekutsi sitsandze bomakhelwane betfu. (Mat. 5:43-48) Umyalo wekutsi sitsandze bomakhelwane betfu, ulandzela umyalo wekucala lotsi kufanele sitsandze Jehova. (Mat. 22:37-40) Indlela lebalulekile lesingakhombisa ngayo kutsi siyabatsandza bomakhelwane betfu, ikutsi silalele umyalo wekushumayela tindzaba letimnandzi teMbuso waNkulunkulu. Nangabe sitsandza labanye bantfu, sisuke sikhatimulisa Nkulunkulu. Lutsandvo ngaNkulunkulu “luyapheleliswa kitsi” nangabe silalela lomyalo wekutsi sitsandze labanye ikakhulukati bazalwane lesikanye nabo ekukholweni.​—1 Joh. 4:12, 20.

SIHLENGO SILETSA “SIKHATSI SEKUVUSELELEKA” LESIVELA KUJEHOVA

15. (a) Ngutiphi tibusiso lesititfola kuJehova nyalo? (b) Ngutiphi tibusiso lesitatitfola esikhatsini lesitako?

¹⁵ Nangabe siba nekukholwa esihlengweni, siba nematfuba ekutsi tono tetfu tesulwe ngalokuphelele. LiVi laNkulunkulu liyasicinisekisa kutsi tono tetfu ‘tingesulwa.’ (Fundza Imisebenti 3:19-21.) Njengobe sibonile ekucaleni, Jehova usebentisa sihlengo kuze ente tinceku takhe letigcotjiwe kutsi tibe bantfwana bakhe. (Rom. 8:15-17) Nalabo ‘baletinye timvu,’ nabo batawutfola lilungelo lekuba bantfwana baJehova. Ngemva kwekuba sono sesisuswe ngalokuphelele emhlabeni futsi sebaphumelele eluvivinyweni lwekugcina, Jehova utawubenta babe bantfwana bakhe basemhlabeni. (Rom. 8:20, 21; Semb. 20:7-9) Lutsandvo Jehova lanalo ngebantfwana bakhe lutawuhlala kuze kube phakadze. Tibusiso lesititfola ngesihlengo nato titawuhlala kuze kube phakadze. (Heb. 9:12) Lesipho lesisihlengo ngeke siphelelwe ngemandla. Kute nemuntfu longasemuka sona.

16. Sihlengo sisenta njani kutsi sibe ngulabakhululeke mbamba?

¹⁶ Kute Develi langakwenta kuze avimbe labo labaphendvuka ngebucotfo kutsi babe yincenye yemndeni waJehova. Jesu weta emhlabeni futsi wafa “kanye kuphela.” Ngako, lesihlengo siyawusebenta kuze kube phakadze. (Heb. 9:24-26) Siyisusa ngalokuphelele imiphumela yesono lesayitfola ku-Adamu. Siyabonga ngekutinikela kwaKhristu ngobe sesikhululekile ebugcilini besono kulelive lelibuswa nguSathane futsi asisakwesabi kufa.​—Heb. 2:14, 15.

17. Utiva njani wena nawucabanga ngendlela Jehova lakutsandza ngayo?

¹⁷ Tetsembiso taNkulunkulu titawugcwaliseka nakanjani. Njengobe imitsetfo yakhe yemvelo ingakaze iphatamiseke, naJehova ngeke ehluleke kukwenta loko lakwetsembisile. Akashintji. (Mal. 3:6) Jehova usipha lokungetulu nje kwekuphila. Usipha lutsandvo lwakhe. LiBhayibheli litsi: “Tsine siyalwati futsi siyalukholwa lutsandvo Nkulunkulu lanalo ngatsi. Nkulunkulu ulutsandvo.” (1 Joh. 4:16) Umhlaba wonkhe utawentiwa lipharadisi, ube yindzawo lenhle kakhulu futsi bonkhe labatabe baphila lapho batawuba nelutsandvo lolunjengelwaNkulunkulu. Shengatsi singahlanganyela netidalwa letetsembekile tasezulwini natitsi: “Sibusiso, inkhatimulo, kuhlakanipha, kubongwa, ludvumo, emandla, netikhwepha akube kwaNkulunkulu wetfu phakadze naphakadze. Amen.”​—Semb. 7:12.