SIHLOKO LESINGUMGOGODLA | UNGASONDZELANA NANKULUNKULU
Lena Yindlela Lencono Kakhulu Yekuphila
Yini longayenta kuze usondzelane naNkulunkulu? Sicoce ngaletinyatselo letilandzelako longatitsatsa kuze usondzelane naNkulunkulu:
Lati futsi ulisebentise libito laNkulunkulu lelitsi Jehova.
Khulumisana naye njalo ngemthantazo nangekutadisha liVi lakhe liBhayibheli.
Chubeka wenta loko lokujabulisa Jehova.
Sondzela kuNkulunkulu ngekusebentisa libito lakhe, ngekuthantaza, ngekutadisha liVi lakhe, kanye nangekwenta loko lokumjabulisako
Ngekwaletinyatselo, ungasho yini kutsi wena uyakwenta loko lokudzingekako kute usondzelane naNkulunkulu? Kukhona yini lawucabanga kutsi ungatfutfukisa khona? Nanobe loku kudzinga imetamo, kodvwa asewucabange nje ngemiphumela yako.
Lomunye make waseMelika lokutsiwa nguJennifer utsi: “Ngeke utisole ngayo yonkhe imetamo loyentako kuze usondzelane naNkulunkulu. Loku kungakuletsela tibusiso letinyenti letifaka ekhatsi kumetsemba kakhulu Nkulunkulu, kubucondza kancono bunguye bakhe, kodvwa ngetulu kwako konkhe, kumtsandza kakhulu Jehova. Lena yindlela lencono kakhulu yekuphila!”
Nangabe ungatsandza kusondzelana naNkulunkulu, BoFakazi BaJehova bangakujabulela kukusita. Bangahlela kufundza nawe liBhayibheli mahhala. Wemukelekile nekutsi to uye emihlanganweni yabo leba seHholeni LeMbuso lelisendzaweni yangakini, lapho utawujabulela khona budlelwane nalabo labakutsandzako kuba bangani baNkulunkulu.a Nawenta njalo, nawe utawutiva njengemhlabeli lowatsi: “Kodvwa mine kungilungele kusondzela kuNkulunkulu.”—Tihlabelelo 73:28.
a Kuze ucele kuchutjelwa sifundvo seliBhayibheli nobe utfole liHholwa leMbuso lelisedvute nawe, sicela ukhulume naloyo lokunikete lomagazini nobe ungene ku-Web site yetfu letsi www.jw.org. Buka ngephansi kwesihloko lesitsi TSINTSANA NATSI lesisekugcineni.