IMIBUTO YELIBHAYIBHELI IYAPHENDVULWA
Bantfwana bangakufundza njani kutsandza Nkulunkulu?
Sebentisa tifundvo lesitifundza endalweni kute usite umntfwana wakho kutsi amati futsi amtsandze Nkulunkulu
Bantfwana bakho bangakufundza kutsandza Nkulunkulu nangabe banebufakazi bekutsi ukhona nekutsi uyabatsandza. Kute bamtsandze Nkulunkulu, kudzingeka bamati kucala. (1 Johane 4:8) Nasi sibonelo: Bayakudzinga kwati kutsi: Nkulunkulu abehloseni nakadala bantfu? Nkulunkulu ukuvumelelani kuhlupheka? Yini Nkulunkulu latawuyentela bantfu esikhatsini lesitako?—Fundza Filiphi 1:9.
Kute usite bantfwana bakho kutsi bamtsandze Nkulunkulu, kudzingeka ubakhombise kutsi nawe uyamtsandza. Nabakubona loko kuwe, bangabese bayasilandzela sibonelo sakho.—Fundza Dutheronomi 6:5-7; Taga 22:6.
Ungatitsintsa njani tinhlitiyo tebantfwana bakho?
LiVi laNkulunkulu linemandla. (Hebheru 4:12) Ngako basite bantfwana bakho kutsi bafundze timfundziso talo letisisekelo. Kute atsintse tinhlitiyo tebantfu, Jesu abebuta imibuto, alalela, aphindze achaze nemiBhalo. Nawe ungatilingisa tindlela Jesu labetisebentisa nakafundzisa, kute utsintse tinhlitiyo tebantfwana bakho.—Fundza Lukha 24:15-19, 27, 32.
Ngetulu kwaloko, tindzaba letiseBhayibhelini letiveta indlela Nkulunkulu labebaphatsa ngayo bantfu tingabasita bantfwana kutsi bamati futsi bamtsandze Nkulunkulu. Tiyatfolakala tincwadzi letentelwe kukusita kuloku ekhelini lelitsi www.jw.org.—Fundza 2 Thimothi 3:16.