Siyitsatsaphi imali yekwenta umsebenti wekushumayela?

Umnyaka nemnyaka sikhicita emakhulu etigidzi etincwadzi kanye nemaBhayibheli. Emhlabeni wonkhe sinemahhovisi eligatja kanye nemishini yekukhicita tincwadzi. Emashumi etinkhulungwane emabandla ahlangana etindzaweni letinhle tekukhonta Jehova letibitwa ngekutsi ngemaHholwa eMbuso. Siyitsatsaphi imali yekwenta konkhe loku?

Umsebenti wetfu siwenta ngeminikelo lesiyitfolako. (2 Khorinte 9:7) Nga-1879 magazini i-Zion’s Watch Tower yatsi: “Sikholelwa kutsi JEHOVA uyayisekela i-Zion’s Watch Tower [njengobe lomagazini bewubitwa kanjalo ngaleso sikhatsi] futsi awudzingi lusito lwebantfu kuze uphumelele.” Nanyalo solo kunjalo.

Iminikelo ungayitfumela ngco egatjeni letfu nobe uyifake emabhokisini emnikelo latfolakala emaHholweni eMbuso. Asibaphoceleli bantfu kutsi bakhiphe kwelishumi, akuhanjiswa emapuleti emnikelo, asibhadalisi nangemsebenti lesiwentako futsi asititsengisi tincwadzi tetfu. Noma ngayini lesiyentako asiholi, kungaba kutsi siyashumayela, sifundzisa ebandleni, nobe sakha emahholwa ekukhonta Jehova. Sizatfu saloko kutsi Jesu watsi: “Niphiwe mahhala, nani phanini mahhala.” (Matewu 10:8) Tonkhe tikhonti letisemahhovisini eligatja nobe endlunkhulu yetfu atiholi, ngisho neSigungu Lesibusako saBoFakazi BaJehova imbala.

Iminikelo lesiyitfolako iphindze isetjentiswe nakuvele tehlakalo. Ngisho nemaKhristu angelikhulu lekucala bakasitana nakuvele inhlupheko. (Roma 15:26) Ngendlela lefanako nakunetehlakalo natsi siyabasita bantfu labahluphekile ngekutsi sibalungisele emakhaya abo kanye namaHholwa eMbuso. Siphindze sibanikete kudla, timphahla, sibasite ngisho badzinga kwelashwa.