SIHLOKO LESINGUMGOGODLA | LASINDZA NJANI LIBHAYIBHELI?
Indzaba Lebaluleke Kakhulu
Kute lenye incwadzi yenkholo lefanana neliBhayibheli. Kuleminyaka leminyenti leyengcile, kute lenye incwadzi leshintje tinkholelo tebantfu labanyenti kwendlula liBhayibheli. Ngetulu kwaloko, kute lenye incwadzi lehlolisiswe kwendlula liBhayibheli nalegcekwe kakhulu njengalo.
Nasi sibonelo: Letinye tati tiyakungabata kutsi lokushiwo ngemaBhayibheli lesinawo nyalo kuyafana nalobekusemibhalweni yekucala. Lomunye professor wetifundvo tetenkholo watsi: “Asiciniseki kutsi imibhalo lesinayo nyalo ifana ncamashi naleyo yekucala. EmaBhayibheli lesinawo nyalo agcwele emaphutsa nje kuphela futsi linyenti lawo labhalwa eminyakeni leminengi ngemuva kwemibhalo yekucala futsi lehluke kakhulu kuyo.”
Labanye bangabata indlela liBhayibheli lelibhalwe ngayo ngenca yenkholo labakhulela kuyo. Cabanga ngaFaizal lowafundziswa ngumndeni longasiwo emaKhristu. Wafundziswa kutsi liBhayibheli liyincwadzi lengcwele kodvwa leseyishintjwe kakhulu. Utsi: “Ngenca yaloko besengingabetsembi bantfu nabafuna kucoca nami ngeliBhayibheli. Phela bebete ngisho naleliBhayibheli lekucala. Lelabo beselishintjwe kakhulu!”
Kunendzaba yini kutsi liBhayibheli lishintjiwe noma cha? Asewucabange nje nganayi imibuto: Ungatetsemba yini tetsembiso teliBhayibheli letiniketa indvudvuto mayelana nelikusasa nangabe leto tetsembiso ungati kutsi betikhona yini emibhalweni yekucala? (Roma 15:4) Ungatisebentisa yini timiso teliBhayibheli nawenta tincumo letibalulekile letitsintsa umsebenti wakho, umndeni wakho kanye nekukhonta Nkulunkulu nangabe lamaBhayibheli lesinawo nyalo agcwele emaphutsa ebantfu?
Ngisho nome imibhalo yeliBhayibheli yekucala ngca ingasatfolakali, asekhona lamanye emakhophi ayo akadzeni lesingawatfola, lafaka ekhatsi tinkhulungwane temibhalo yeliBhayibheli leyabhalwa ngesandla. Lemibhalo leyabhalwa ngesandla yasindza njani etintfweni lebetingayona, kubantfu labebangayifuni kanye nakulabo lebebetama kushintja umlayeto wayo? Kusindza kwayo kungakusita njani kutsi uletsembe liBhayibheli lesinalo lamuhla? Utawutfola timphendvulo talemibuto etihlokweni letilandzelako letimayelana nekusindza kwalemibhalo.