Yini Leyente LiBhayibheli Lasindza?

LiBhayibheli lisindzile. Ngenca yaloko, nawe ungaba nelakho liBhayibheli futsi ulifundze. Nawukhetsa lihumusho lelikahle, ungaba nesiciniseko sekutsi lokufundza kulo kwetsembekile futsi kuyahambisana nemibhalo yekucala.a Yini leyente liBhayibheli lasindza ngendlela lemangalisako ngisho nome bekunetintfo lebetingalona, kunebantfu labebangalifuni sanhlobo kanye nalabebafuna kushintja umlayeto walo? Lentiwa yini liBhayibheli kutsi lehluke kangaka?

Bantfu labanyenti labafundza liBhayibheli bayavumelana nemavi emphostoli Pawula latsi: “Yonkhe imiBhalo iphefumulelwe nguNkulunkulu.” (2 Thimothi 3:16) Bakholelwa kutsi liBhayibheli lisindze ngobe liliVi laNkulunkulu lelikhetsekile nekutsi Nkulunkulu nguye lolilondvolote kwaze kwaba ngunyalo. Faizal lokukhulunywe ngaye esehlukweni sekucala, ngekuhamba kwesikhatsi wancuma kutitfolela yena matfupha emaciniso aloko ngekutsi atifundzele liBhayibheli. Lakutfola kwamshiya abambe wangephansi. Ngekushesha watfola kutsi timfundziso letinyenti letifundziswa tinkholo letitsi tebuKhristu atikho eBhayibhelini. Ngetulu kwaloko, watsintseka nakafundza ngekutsi Nkulunkulu wawudalelani umhlaba njengobe kuchazwa eVini laNkulunkulu.

Utsi: “Nyalo sengiyaciniseka kutsi liBhayibheli lami lisipho lengisiphiwe nguNkulunkulu. Nangabe Nkulunkulu akhona kwenta tonkhe tintfo, angehluleka yini kusinika liBhayibheli futsi asilondvolotele lona? Nangingatsi ngeke akhone kukwenta loko ngabe ngimbukela phansi njengaSomandla. Bengiyini-ke mine kutsi ngingambukela phansi Nkulunkulu?”​—Isaya 40:8.