‘Letintfo Tiphatsise Emadvodza Letsembekile’

1, 2. Bantfu labanyenti bawutsatsa njani umsebenti wabo?

BANTFU bavame kutichaza ngemisebenti labayentako. Kubantfu labanyenti umsebenti noma sikhundla, sichaza loko umuntfu langiko. Kulamanye emasiko, nabacala kuhlangana nemuntfu bambuta kutsi ‘usebentaphi?’

² Ngaletinye tikhatsi liBhayibheli lichaza bantfu ngemisebenti lebebayenta. Likhuluma ‘ngaMatewu umtselisi’; “Simoni, umshuki”; kanye ‘naLukha longudokotela lotsandzekako.’ (Mat. 10:3; Imis. 10:6; Khol. 4:14) Emalungelo umuntfu lanikwa wona ebandleni nawo achaza loko langiko. EBhayibhelini sifundza nge-Nkhosi Davide, nge-mphrofethi Elija kanye nange-mphostoli Pawula. Lamadvodza abewutsatsa njengalobalulekile umsebenti labewunikwe nguNkulunkulu. Nangabe sinemalungelo enkonzo, natsi kufanele siwatsatse njengalaligugu.

3. Kungani kunesidzingo sekutsi bantfu labadzala baceceshe labasebasha? (Buka sitfombe lesisekucaleni kwalesihloko.)

³ Sonkhe siyawutsandza umsebenti lesiwentako futsi singajabula kuchubeka siwenta kuze kube phakadze. Noma kunjalo, kuyadzabukisa kutsi kusukela emalangeni a-Adamu, situkulwane siyefika sendlule bese kuta lesinye. (Shu. 1:4) Muva nje lolushintjo lwetitukulwane luletsele emaKhristu eliciniso tinkinga letingakavami. Umsebenti webantfu baJehova ukhule ngelizinga lelikhulu futsi kunyenti lokwentekako kuwo. Njengoba kwentiwa imisebenti lemisha, kuba netindlela letinsha tekwenta tintfo letifaka ekhatsi kusetjentiswa kwetebucwephesha letitfutfuka njalo. Labanye bantfu lasebakhulile kuba matima ngabo kuhambisana nalentfutfuko. (Luk. 5:39) Ngakulolunye luhlangotsi, bantfu labasha basenemandla ekwenta letintfo kunebantfu labadzala. (Taga 20:29) Ngako, nangabe bantfu labadzala bacecesha labasebasha kutsi bente imisebenti leyengetiwe, basuke bakhombisa lutsandvo kanye nesibonelo lesihle.​—Fundza Tihlabelelo 71:18.

4. Kungani kulukhuni ngalabanye kuniketa labasebasha imitfwalo leminyenti nalemikhulu? (Buka libhokisi lelitsi: “Yini Leyenta Labanye Kutsi Banganiketi Labanye Imisebenti Leyentiwa Ngibo?”)

⁴ Labo labasetikhundleni letiphakeme kuba matima ngabo kuniketa labasebasha tabelo. Labanye besaba kulahlekelwa nguleto tikhundla labatitsandzako. Labanye bakhatsateka ngekutsi ngeke bakhone kubalawula futsi bacabanga kutsi lalabasha ngeke bente tintfo ngendlela bona labatenta ngayo. Kantsi labanye bangase batsi bete sikhatsi sekucecesha lomunye umuntfu. Ngakulokunye, labasha kufanele babeketele nangabe banganiketwa letinye tabelo.

5. Ngumiphi imibuto lekutawucocwa ngayo kulesihloko?

⁵ Asesicoce ngalendzaba yekwabela labanye kutsi singakwenta kanjani ngetindlela letimbili. Kwekucala, bantfu labadzala bangabasita njani labasebasha kutsi bemukele leminye imisebenti, futsi kungani kubalulekile kukwenta loko? (2 Thim. 2:2) Kwesibili, kungani kubalulekile kutsi bantfu labasebasha babe nesimo sengcondvo lesihle nabasita bazalwane lesebakhulile nalapho bafundza kubo? Asesicale sicoce ngendlela Inkhosi Davide leyacecesha ngayo indvodzana yayo kuze yente umsebenti lobewubalulekile.

DAVIDE WENTA EMALUNGISELELO EKUSEKELA SOLOMONI

6. Yini iNkhosi Davide lebeyifuna kuyenta futsi Jehova watsini ngako?

⁶ Ngemuva kwekuphila iminyaka leminyenti angumbaleki, Davide waba yinkhosi futsi besekahlala nasendlini lenhle kakhulu. Akhatsatwe kutsi kwakute indlu noma lithempeli lelakhelwe Jehova, wase ufuna kumakhela lona. Ngako watsi kuNathani umphrofethi: “Buka la! Mine ngihleti kahle esigodlweni lesakhiwe ngemisedari, kodvwa libhokisi lesivumelwane saSimakadze lihleti ethendeni.” Nathani waphendvula watsi: “Loko lonako engcondvweni yakho, kwente, ngobe Simakadze unawe.” Nobe kunjalo, Jehova akavumelananga naye. Watjela Nathani kutsi atjele Davide loku: “Akusiwe lotangakhela indlu lapho ngitawuhlala khona.” Nanobe Jehova abecinisekise Davide ngemusa kutsi abetawuchubeka ambusisa, Nkulunkulu watsi akube yindvodzana yaDavide Solomoni letamakhela lithempeli. Wativa njani Davide ngaloko?​—1 Khr. 17:1-4, 11, 12; 29:1.

7. Davide wenta njani ngaloko Jehova lakusho?

⁷ Davide akazange ayekele kusekela kwakhiwa kwelithempeli ngoba nje acabanga kutsi ludvumo lwekwakhiwa kwalo belungeke lute kuye. Nembala lesakhiwo satiwa ngekutsi lithempeli laSolomoni hhayi laDavide. Ngisho nobe Davide abedvunyatwe kutsi akakhonanga kwenta loko lebekafise kukwenta, kodwa wawusekela ngemphefumulo wakhe wonkhe lomsebenti. Wahlela umsebenti ngetigaba tawo futsi wacokelela insimbi, litfusi, lisiliva neligolide waphindze wacokelela netingodvo temsedari. Ngetulu kwaloko wakhutsata Solomoni watsi: “Manje-ke, ndvodzana yami, Simakadze akabe nawe ube nemphumelelo, uze wakhe indlu yaSimakadze Nkulunkulu wakho, njengobe atsi utakwenta.”​—1 Khr. 22:11, 14-16.

8. Kungani Davide acabanga kutsi Solomoni abengakakulungeli kwakha lelithempeli, futsi yini layenta ngaloko?

⁸ Fundza 1 Tikhronike 22:5. Kungenteka Davide wacabanga kutsi Solomoni abengakufanelekeli kwengamela lomsebenti lobaluleke kangaka. Ngetulu kwaloko lendlu beyitawuba “ngubhazabhaza futsi ibe yinhle,” futsi ngaleso sikhatsi Solomoni ‘abesemncane futsi angakafundzi lutfo lolunyenti.’ Nobe kunjalo, Davide bekati kutsi Jehova abetawusekela Solomoni futsi uphumelele lomsebenti. Ngako Davide wanaka kakhulu loko bekangakwenta kute asekele lomsebenti ngekutsi alungiselele tintfo letinyenti tekwakha.

KUJABULELE KUCECESHA LABANYE

9. Emadvodza lamadzala angajatjuliswa yini nangabe abela labasebasha leminye yemisebenti yawo? Fanekisa.

⁹ Emadvodza lamadzala ebandleni akukafanele abe nebulukhuni nakutiwa endzabeni yekuniketa labasebasha tabelo tawo. Kunaloko, lomsebenti uyatfutfuka nangabe labasebasha baceceshwa kutsi bente imisebenti leminyenti. Emadvodza laholako ebandleni kufanele akujabulele kubona labo labasebasha lababaceceshile bawenta kahle umsebenti. Kute sifanekise, cabanga ngababe lofundzisa indvodzana yakhe kushayela. Ngesikhatsi lendvodzana iseyincane, imane nje ibuke uyise nakashayela. Bese kutsi lapho seyikhulile, loyise ubese uyayichazela loko lakwentako. Ngemva kwesikhatsi, lapho lendvodzana seyisegabeni sekushayela ngalokusemtsetfweni, ibese icala kushayela ngendlela uyise layifundzise ngayo. Ngaletinye tikhatsi bangase bashintjane ekushayeleni noma kube ngiyo lendvodzana lese ishayelela uyise njengobe sekakhulile. Lobabe lohlakaniphile uyajabula kubona indvodzana yakhe ishayela kahle futsi akacabangi kutsi nguye lokufanele ayishayele. Ngendlela lefanako, emadvodza lamadzala kufanele ajabule nakabona labo labasha lababaceceshile batenta kahle tabelo tabo letiphatselene nemsebenti waNkulunkulu.

10. Mosi abetiva njani ngeludvumo kanye nelilungelo lekuhola?

¹⁰ Njengemadvodza lamadzala akukafanele sibe nemona. Naka indlela Mosi lakenta ngayo ngesikhatsi lamanye emadvodza aka-Israyeli atenta baprofethi. (Fundza Numeri 11:24-29.) Joshuwa lobekangumsiti waMosi, bekafuna kubathulisa. Abecabanga kutsi bavukela lilungelo laMosi lekubahola futsi bambukela phasi. Kodvwa Mosi wamphendvula watsi: ‘Unemona yini ngami? Ngifisa shangatsi sonkhe sive saSimakadze ngabe sibaphrofethi nekutsi Simakadze abeke umoya wakhe kuso.’ Mosi wawabona emandla aJehova kulendzaba. Angafuni kutitfolela ludvumo, Mosi watsi ufisa shengatsi lesipho semoya longcwele lebekanaso besingatfolwa nanguletinye tinceku taJehova. Asijabuli yini natsi lamuhla nangabe sibona labanye batfola emalungelo lafana newetfu noma lesicabanga kutsi ngabe atfolwa ngitsi?

11. Lomunye umzalwane watsini mayelana nekuniketa labanye umsebenti lobewentiwa nguye?

¹¹ Lamuhla sinetibonelo letinyenti tebazalwane labasebenta ngemphefumulo wabo wonkhe iminyaka leminyenti futsi labaye bacecesha labanye kutsi nabo bente leminye imisebenti leminyenti. Nasi sibonelo, lomunye umzalwane lobitwa ngekutsi nguPeter sewukhonte iminyaka lengetulu kwa-74 emsebentini wasikhatsi sonkhe. Kuyo yonkhe leminyaka, lengu-35 uyicitse asehhovisini leligatja lelise-Europe, futsi abesolo akhonta njengembonisi we-Service Department. Paul losemusha losebente nemzalwane Peter iminyaka leminyenti, nyalo senguye losenta lemisebenti lebeyentiwa nguPeter. Ngesikhatsi Peter abutwa ngendlela labetiva ngayo njengoba sekashintje sabelo sakhe, watsi: “Ngiyajabula kutsi kunebazalwane labaceceshelwe kwenta imisebenti lemikhulu futsi labayenta kahle lemisebenti.”

BANTFU LABADZALA LESIKANYE NABO BABALULEKILE

12. Ngusiphi sifundvo lesisitfolako lesiseBhayibhelini lesimayelana naRehobowamu?

¹² Ngemuva kwekufa kwaSolomoni, indvodzana yakhe lenguRehobowamu yaba yinkhosi. Ngesikhatsi Rehobowamu adzinga seluleko sekutsi angababusa njani bantfu, waya kuyotsatsisa kubantfu labadzala kucala. Kodvwa akazange asilalele seluleko sabo! Kunaloko, walalela seluleko sabontsanga yakhe lebebakadze babeluleki bakhe. Umphumela waloko waba mubi kakhulu. (2 Khr. 10:6-11, 19) Ngusiphi sifundvo lesisitfolako? Sisuke sihlakaniphile nangabe sifuna seluleko sebantfu labadzala futsi sicabangisise ngaso. Nanobe labasha bangakabopheki kutsi bente tintfo ngendlela bantfu labadzala labatenta ngayo, akukafaneli basheshe basale seluleko lesivela kubo.

13. Labasha bangasebentisana njani kahle nebantfu labadzala?

¹³ Kungenteka labasha batfole lilungelo lekuhola emisebentini letsite labayenta banebantfu labadzala. Nanobe labasha kungenteka baphatsiswe imisebenti leminyenti, bangayenta kahle nabangatsatsisa kulabantfu labadzala nabenta tincumo. Paul, lesikhulume ngaye ekucaleni lowangena esikhundleni saPeter sekuba ngumbonisi etikweni laseBethel, watsi: “Ngatinika sikhatsi sekuyofuna seluleko saPeter futsi bengibakhutsata nalabanye etikweni letfu kutsi bente kanjalo.”

14. Yini lesiyifundzako endzabeni yekubambisana kwaThimothi nemphostoli Pawula?

¹⁴ Thimothi, lobekasemusha, wasebenta nemphostoli Pawula iminyaka leminyenti. (Fundza Filiphi 2:20-22) Pawula wabhalela emaKhristu aseKhorinte watsi: “Ngitfuma Thimothi kini, njengobe angumntfwana wami lotsandzekako nalowetsembekile eNkhosini; utanikhumbuta ngetindlela tami tekwenta tintfo kuKhristu Jesu, njengobe nje ngifundzisa kuwo onkhe emabandla lakuto tonkhe tindzawo.” (1 Khor. 4:17) Lamavi akhombisa kutsi Pawula naThimothi bebabambisana. Pawula bekatinike sikhatsi sekucecesha Thimothi ‘ngetindlela takhe tekwenta tintfo kuKhristu.’ Thimothi wakubamba loku lebekafundziswe kona futsi Pawula bekamtsandza, wate wametsemba kutsi bekatalinakekela kahle libandla laseKhorinte. Labadzala lamuhla bangasilingisa lesibonelo saPawula sekucecesha lamanye emadvodza ebandleni kuze anakekele libandla.

SONKHE KUFANELE SIFAKE SANDLA EKUFUNDZISENI LABANYE

15. Seluleko saPawula lasibhalela emaKhristu aseRoma singasisita njani nangabe kunelushintjo?

¹⁵ Kunyenti lokwentekako kulesikhatsi lesiphila kuso. Inhlangano yaJehova lesemhlabeni ikhula ngetindlela letinyenti futsi lokukhula kwayo kuta nelushintjo lolukhulu. Njengobe lolushintjo lusitsintsa, kufanele sititfobe, sinake tintfo letijabulisa Jehova hhayi letijabulisa tsine. Nasenta kanjalo, sitabe sitfutfukisa bunye. Pawula wabhalela emaKhristu aseRoma watsi: “Nginitjela nonkhe kutsi kubete emkhatsini wenu lotibona amkhulu kunaloko langiko, kodvwa akaticabange ngendlela lefanele; loku nikwente ngekuvumelana nekukholwa Nkulunkulu laninike kona. Njengobe emtimbeni munye kunemalunga lamanyenti, lamalunga akenti umsebenti munye, ngako natsi nanobe sibanyenti, singumtimba munye ebunyeni naKhristu.”​—Rom. 12:3-5.

16. Yini lengentiwa ngulabadzala, labasha kanye nebafati kuze batfutfukise kuthula nebunye enhlanganweni yaJehova?

¹⁶ Kungakhatsaliseki kutsi sibhekene netimo letinjani, sonkhe asisebentele kutfutfukisa tintfo letiphatselene neMbuso waJehova. Nine labadzala, ceceshani labasha kuze nabo batokwenta loku lenikwentako. Nani bazalwane labasha, yemukelani imisebenti leninikwa yona, nititfobe futsi nichubeke nihlonipha bantfu labadzala. Nani bafati, lingisani sibonelo semfati wa-Akhwila, longuPhrisila, lowahamba na-Akhwila futsi wamsekela ngekwetsembeka ngesikhatsi timo tabo tishintja.​—Imis. 18:2.

17. Jesu bekabetsemba kanganani bafundzi bakhe, futsi wabaceceshela kwentani?

¹⁷ Sibonelo saJesu singasisita kakhulu endzabeni yekucecesha labanye kuze bamukele imisebenti leminyenti. Jesu bekati kutsi umsebenti wakhe wasemhlabeni bekatawushiya nakabuyela ezulwini futsi bekutawudzingeka labanye kutsi bachubeke nawo. Nanobe bafundzi bakhe bebanesono, bekabetsemba futsi wabatjela kutsi bebatawenta imisebenti lemikhulu kuneyakhe. (Joh. 14:12) Wabacecesha kahle futsi base bashumayela tindzaba letimnandzi kuyo yonkhe indzawo.​—Khol. 1:23.

18. Yini lesiyigadzile esikhatsini lesitako, futsi yini lokufanele siyente nyalo?

¹⁸ Ngemuva kwekufa kwakhe, Jesu wavuselwa ezulwini lapho afika anikwa khona sikhundla lesingetulu ‘kwabo bonkhe bohulumende, emagunya, emandla nebukhosi.’ (Ef. 1:19-21) Nangabe sifa setsembekile ngaphambi kwe-Amagedoni, sitawuvukela eveni lelisha futsi siyojabulela kwenta imisebenti leminyenti. Noma kunjalo, nyalo sinemsebenti lomkhulu lobalulekile lokufanele siwente wekushumayela tindzaba letimnandzi siphindze sente bantfu bafundzi. Kwangatsi sonkhe, kungakhatsaliseki kutsi sibadzala nome sibancane, ‘singahlale sinalokunyenti kwekukwenta emsebentini weNkhosi.’​—1 Khor. 15:58.