“Wangibona ngiselihlwili.”—TIHLABELELO 139:16
Nkulunkulu Usati Kahle Yini Simo Lesikuso?
LESIKUFUDZA ENDALWENI
Cabanga ngebuhlobo lobusedvute kakhulu lobungaba khona kubantfu, lokubuhlobo bemaphahla. Asondzelene kakhulu. Nancy Segal, umphatsi we-Twin Studies Center, naye loliphahla utsi: “Emaphahla asondzelene kangangekutsi linye nangabe lisho lokutsite, lelelinye livele licondze kutsi lisho kutsini ngaphandle kwekuchazelwa.” Lomunye wesifazane wachaza ngebuhlobo lanabo naloyo laliphahla naye, utsi: “Satana kahle kakhulu.”
Kubangelwa yini kutsi emaphahla atane kahle? Lucwaningo lutsi indzawo emaphahla lahlala kuyo kanye nendlela lakhuliswe ngayo, ngiyo leyenta kutsi atane kahle, kodvwa kubonakala shengatsi takhi telufuto (genes) letifananako ngito letihamba embili kuloku.
CABANGA NGALOKU: UMdali lowasidala usati kancono kwendlula noma ngangubani. Kungako umhlabeleli Davide atsi: “Ngobe nguwe lowadala imibilini yami, wangeluka esiswini samake. Ematsambo ami abengakafihlakali kuwe, ngesikhatsi ngibunjwa ekusitsekeni ngelukwa. . . . Wangibona ngiselihlwili. Onkhe emalanga ami abhalwa encwadzini yakho.” (Tihlabelelo 139:13, 15, 16) Nkulunkulu nguye kuphela losatiko futsi uticondza kahle takhi telufuto lesinato futsi uyatati tintfo letenteke ekuphileni kwetfu letishintje buntfu betfu. Lokutsi Nkulunkulu uyasati kutsi sakheke njani, kusenta siciniseke kutsi usicondza kahle.
LOKUFUNDZISWA LIBHAYIBHELI NGELWATI NKULUNKULU LANALO
Davide wathantaza watsi: “Simakadze ungihlolisisile, uyangati. Uyakwati kuhlala kwami nekuvuka kwami, imicabango yami uyati ingakaveli. Livi litsi liselulwimini lwami, wena, Simakadze, ube sewulati ngalokuphelele.” (Tihlabelelo 139:1, 2, 4) Ngetulu kwaloko, Jehova uyati nekutsi sitiva kanjani futsi ‘ucondzisisa tonkhe tinjongo temicabango.’ (1 Tikhronike 28:9; 1 Samuweli 16:6, 7) Lamavesi asitjelani ngaNkulunkulu?
Ngisho nobe singeke sikhone kuveta imicabanga yetfu kanye nendlela lesitiva ngayo nasithantaza kuNkulunkulu, kodvwa yena akagcini nje ngekubona lesikwentako kodvwa uyati nekutsi sikwentelani. Ngetulu kwaloko, uyakwati nalokuhle lesifisa kukwenta ngisho nome timo tisivimbela kutsi sikwente. Ngenca yekutsi Nkulunkulu wasidala saba nelutsandvo, ngako uyalangatelela kubona indlela lesimtsandza ngayo kanye netisusa tetfu tekwenta lokuhle.—1 Johane 4:7-10.
Kute ngisho nakunye lokufihlekile emehlweni aNkulunkulu. Uyatati tinkinga tetfu ngisho nobe labanye kungenteka bangatati
ImiBhalo iyasicinisekisa
“Ngobe emehlo aJehova akulabalungile, netindlebe takhe tisekuncuseni kwabo.”—1 PETER 3:12.
Nkulunkulu utsi: “Mine ngiyawukufundzisa ngikukhombise indlela lofanele kuhamba ngayo, ngikweluleke, liso lami lingesuki kuwe.”—TIHLABELELO 32:8.
NKULUNKULU UYACABANGELA
Kwati kutsi Nkulunkulu uyasicondza simo setfu kanye nendlela lesitiva ngayo kuyasisita yini kutsi sibeketelele tinkinga? Cabanga ngaloko lokwenteka ku-Anna, wase-Nigeria. Utsi: “Bengitibuta kutsi kuyawuze kube kunini solo ngiphila ngaphasi kwetimo letibuhlungu kanje. Bengingumfelokati nginakekela indvodzakati yami lebeyisesibhedlela yelashelwa sifo sekugcwala emanti enhloko (hydrocephalus), ngesikhatsi lesifanako nami benginesifo semdlavuza wemabele futsi bekudzingeka kutsi ngihlindvwe, ngifakwe emakhemikhali futsi ngifakwe nasemshinini wekushisa umdlavuza. Bekumatima kakhulu kutinakekela kulesimo lebengikuso, ngesikhatsi lesifanako ngibe nginakekela nendvodzakati yami.”
Yini leyasita Anna kutsi akhone kubeketelela lesimo? Utsi: “Ngasitwa kuzindla ngemibhalo, njengembhalo wa-Filiphi 4:6, 7 lotsi ‘kuthula kwaNkulunkulu lokwendlula konkhe kucondza kutawulondza tinhlitiyo netingcondvo tenu’. Njalo nangicabanga ngalombhalo, ngitiva ngisondzelene kakhulu naJehova futsi ngati kutsi uyasicondza simo lengikuso. Bazalwane nabodzadze labasebandleni lengikulo nabo bebangicinisa.”
“Ngisho nobe ngisalwisana netinkinga temphilo, simo lengikuso kanye nesendvodzakati yami siya ngekuba ncono. Ngenca yekutsi Jehova ungakitsi, sifundze nekutsi sicabange lokukahle nanobe sikulesimo lesikuso. Jakobe 5:11 uyasicinisekisa: ‘Bayajabula labo labacinisele. Nivile ngekucinisela kwaJobe, nawubona nemphumela Jehova lawuletsa, ngaloku nabona kutsi Jehova unelutsandvo lolukhulu kanye nemusa.’” Jehova bekasicondza kahle simo Jobe lebekakuso futsi natsi siyaciniseka kutsi uticondza ngendlela lefanako timo lesikuto.