Fundzisa Ngendlela Leyenetisako
1. Kuhlanganisani kusebentisa liVi laNkulunkulu ngendlela lephumelelako enkonzweni?
1 Njengemphostoli Pawula, bafundzisi labaphumelelako bayacaphela kutsi ‘kuphakela kahle liVi leliciniso’ kuhlanganisa lokunyenti ngephandle nje kwekukhulumela imiBhalo leNgcwele. (2 Thim. 2:15) Nasisebentisa liVi laNkulunkulu, singaba njani ‘ngulabenetisako’ ekufundziseni kwetfu?—Imis. 28:23.
2. Singabasita njani bantfu kutsi batfutfukise inhlonipho yabo ngeliVi laNkulunkulu?
2 Vumela LiVi LaNkulunkulu Litikhulumele: Kwekucala, yenta loyo lokulalele anake liBhayibheli ngendlela letawumenta alihloniphe njengalelo lelicuketse kuhlakanipha lokuvela kuNkulunkulu. Indlela tsine lesiletsemba ngayo liVi laNkulunkulu ingakhutsata loyo losilalele kutsi anakisise nakufundvwa umbhalo. (Heb. 4:12) Singase sitsi: “Ngikukhandze kuzuzisa kufuna imibono yaNkulunkulu kulendzaba. Naka loko lokushiwo liVi lakhe.” Nangabe kungenteka, vumela liVi laNkulunkulu litikhulumele ngekutsi ulifundze.
3. Ngemuva kwekufundza umbhalo, yini lesingayenta kute sisite loyo losilalele awucondze?
3 Kwesibili, chaza umbhalo lowufundzile. Bantfu labanyenti bakukhandza kumatima kucondza livesi labacalako kuliva. Etikhatsini letinyenti kuye kudzingeke sichaze kute sibonise kutsi umBhalo usebenta njani. (Luk. 24:26, 27) Gcizelela emagama lakulombhalo lasekela emaphuzu labalulekile kulendzaba lenikhuluma ngayo. Nangabe loyo lokulalele umbuta umbuto, ungakwati kubona kutsi liphuzu lalomBhalo ulicondzisisile yini.—Taga 20:5; Imis. 8:30.
4. Ngusiphi sinyatselo sekugcina lesibalulekile ekufundziseni ngendlela leyenetisako?
4 Bonisana Nebantfu NgemiBhalo: Kwesitsatfu, yetama kufinyelela inhlitiyo nengcondvo yemuntfu. Sita umnikati welikhaya abone kutsi lelivesi lisebenta njani kuye. Kubonisana naye ngemiBhalo kungamenetisa futsi ashintje indlela lacabanga ngayo. (Imis. 17:2-4; 19:8) Nasi sibonelo: Ngemuva kwekufundza Tihlabelelo 83:18 ungacoca naye ngekutsi kungani kwati libito lemuntfu kubalulekile kute akhe buhlobo naye. Mhlawumbe ungabese uyambuta: “Uyabona yini kutsi kwati libito laNkulunkulu kungayitfutfukisa imithantazo yakho?” Kwenta umbhalo uvumelane nekuphila kwemnikati welikhaya ngalendlela, kumenta abone indlela losebenta ngayo kuye. Indlela lenjalo yekufundzisa liVi laNkulunkulu ngekwenetisa idvonsa bantfu labanetinhlitiyo leticotfo kutsi bakhonte Nkulunkulu lophilako neweliciniso, Jehova.—Jer. 10:10.