Libhokisi Lembuto

◼ Kufanele yini kutsi boFakazi BaJehova basakate tinkhulumo letitsetjuliwe nobe letibhalwe phansi?

Ngetinkhulumo letivela eBhayibhelini, siyaciniswa futsi sikhutsatwe. (Imis. 15:32) Ngako-ke, kuyintfo levamile ngatsi kufuna kucocela labanye labebangekho emhlanganweni ngaletikhutsato. Ngesizatfu sekutsi lamuhla setinyenti tintfo letisetjentiselwa kutsebula loko lokukhulunywako, kumelula ngatsi kutsi sitsebule futsi sisakate inkhulumo kulabanye bantfu. Labanye bagcina tinkhulumo labatitsebulile, kuhlanganise naleto letaniketwa kadzeni, futsi ngesisusa lesihle bangase batiboleke nobe batikopishele bangani. Labanye batifaka ku-Internet kute nobe ngubani lotifunako atitfolele tona.

Kuliciniso kutsi kute lokubi nasitsebula tinkhulumo kute sitisebentise tsine nobe tisetjentiswe ngemalunga emindeni yetfu. Ngetulu kwaloko, labadzala belibandla bangase bahlele kutsi tinkhulumo titsetjulwe kute tisite emalunga elibandla lagulako nalakhulile langasakwati kuta emihlanganweni. Nanobe kunjalo, kunetizatfu letivakalako tekutsi kungani kungakafaneli sisakate tinkhulumo letibhalwe phansi nobe letitsetjuliwe.

Ngesizatfu sekutsi esikhatsini lesinyenti tinkhulumo letetfulwako tihambisana netidzingo telibandla, ngekutisakata angase endluliselwe kabi emaciniso lakuto, njengobe sitawube singasati simo inkhulumo letfulwe kuso. Ngetulu kwaloko, kutawuba matima ngatsi kukhumbula kutsi ngubani lowabeka leyo nkhulumo nekutsi wayibeka nini, kute siciniseke kutsi lokwatiswa lesikusakatako kuvumelana nesikhatsi futsi kuliciniso. (Luk. 1:1-4) Lenye ingoti kutsi kusakata tinkhulumo letibhalwe phansi nobe letitsetjuliwe kungase kulinge labanye kutsi banikete nobe bemukele kunakwa nekudvunyiswa lokungakafaneli.—1 Khor. 3:5-7.

Sisebenti lesetsembekile nalesihlakaniphile sisebenta kamatima kute sisinikete kudla kwakamoya ‘lokusifanele ngesikhatsi lesifanele.’ (Luk. 12:42) Loku kuhlanganisa neluhlelo lekwetfulwa kwetinkhulumo emabandleni aboFakazi BaJehova, kanye netintfo letitsetjuliwe letingatsatfwa ku-Internet ku-web site lesemtsetfweni letsi jw.org. Ngako-ke, singaciniseka kutsi sisebenti lesetsembekile nalesihlakaniphile kanye neSigungu Lesibusako singasiniketa loko lesikudzingako kute sibe nemandla lasicinisa ekukholweni.—Imis. 16:4, 5.