Indlela Yekusebentisa Tintfo Letitsetjuliwe Letilalelwako
1. Ngetulu kwetincwadzi lesinato, yini lenye lesilungiselelwe yona lelusito?
1 Bantfu labanyenti bayajabula nabafundza emavi lamnandzi nalaliciniso latfolakala ku-jw.org. (Shu. 12:10) Kodvwa uke watisebentisa yini tintfo letitsetjuliwe letilalelwako? Letintfo tenta kutsi sikhone kulalela kwatiswa lokunyenti lokutfolakala ku-website yetfu. Tingasisita njani tintfo letitsetjuliwe letilalelwako?
2. Lokutsetjuliwe lokulalelwako singakusebentisa njani ekukhonteni kwemndeni nasesifundvweni lesitichubela sona?
2 Tetfu Nemindeni Yetfu: Kulalela tintfo letitsetjuliwe, njengeliBhayibheli, bomagazini, nobe letinye tincwadzi nasihamba, nobe senta imisebenti yetfu kutasisita sisisebentise kahle sikhatsi. (Ef. 5:15, 16) Singakunonga kukhonta kwemndeni ngekutsi silalele tintfo letitsetjuliwe, sibe sihambisana naloyo lofundzako kumakhophi etfu aleyoncwadzi. Kusebentisa lokutsetjuliwe lokulalelwako nawutichubela sifundvo, kungakusita ikakhulukati nawufuna kufundza lolunye lulwimi noma ufuna kutfutfukisa indlela lofundza ngayo.
3. Ensimini yetfu, bobani labangasitakala ngekulalela tintfo letitsetjuliwe?
3 Nasishumayela: Bantfu labasensimini yetfu labatsi bete sikhatsi sekufundza ngobe bamatasatasa bangase bakujabulele kulalela tintfo letitsetjuliwe. Nebantfu lesingabatfola ensimini labakhuluma lolunye lulwimi nabo bangajabula nabeva tindzaba teMbuso ‘ngelulwimi lwabo.’ (Imis. 2:6-8) Kuletinye tindzawo, kulalela kuyincenye lebalulekile yelisiko lakhona. Nasi sibonelo: Ngelisiko lesiHmong, kungumhambo webantfu bakhona kucocela situkulwane lesisha umlandvo, futsi banelikhono lelimangalisako lekubamba loko labacocelwa kona. Bantfu labanyenti base-Afrika, bafundza ngekucocelwa indzaba.
4. Singatibuta miphi imibuto mayelana nekusita bantfu labasensimini yetfu?
4 Kungasita yini ensimini yenu kutsi ulalelise lococa naye lokutsite lokutsetjuliwe ngelulwimi lwakhe? Ukhona yini longasitakala nasimtfumelela ngeliposi lembane lokutsetjuliwe lokulalelwako? Singatitsatsela yini lokutsite lokutsetjuliwe sikufake ku-CD bese siniketa lesicoce naye lonesifiso sekufundza, mhlawumbe kuhambisane nencwadzi lekhuluma ngako? Nangabe sitfumelele umuntfu ngentfo yebuchwephesha incwadzi, incwajana, magazini nobe lipheshana lokuphelele, loko singakubhala embikweni wasensimini. Tintfo letitsetjuliwe letilalelwako takhelwe kutsi sitisebentise nasitichubela sifundvo siphindze sihlanyele ngato inhlanyelo yeliciniso leMbuso.—1 Khor. 3:6.