Yini Leta Kucala Kitsi?
1. Jesu wakhombisa njani kutsi umsebenti wekushumayela wawubaluleke kakhulu kuye?
1 Umsebenti wekushumayela wawuta kucala ekuphileni kwaJesu. Wasebenta kamatima, ahamba emakhilomitha lamanyenti kuyo yonkhe i-Palestine kute ashumayele kubantfu labanyenti. Kuphila kwakhe wakugcina kumelula kute abe nesikhatsi lesengetiwe emsebentini wekushumayela futsi anake wona kakhulu. (Mat. 8:20) Ngesikhatsi bantfu betama kumvimba kute elaphe labagulako, watsi: “Kufanele ngishumayele liVangeli ngembuso waNkulunkulu nakulamanye emadolobha, ngobe Nkulunkulu ungitfume kwenta kona loko.”—Luk. 4:43.
2. Kungani umsebenti wekushumayela wawubaluleke kakhulu kuJesu?
2 Kungani umsebenti wekushumayela wawubaluleke kakhulu kuJesu? Kungcweliswa kwelibito laJehova kwakuyintfo labekhatsateke ngayo kakhulu. (Mat. 6:9) Abemtsandza Babe wakhe wasezulwini, futsi ngesizatfu saloko abefuna kufeza intsandvo yaKhe kanye nekulalela yonkhe imiyalo yaKhe. (Joh. 14:31) Ngetulu kwaloko, abenenshisekelo lecotfo ngebantfu futsi afuna kubasita.—Mat. 9:36, 37.
3. Singakhombisa njani kutsi umsebenti wekushumayela ngiwo lesiwunake kakhulu?
3 Lingisa Jesu: Kugcina umsebenti wekushumayela uyintfo lebaluleke kakhulu kitsi njengobe Jesu enta kungaba matima, ngobe lelive lifuna sikhatsi setfu lesinyenti futsi linetiphatamiso letinyenti. (Mat. 24:37-39; Luk. 21:34) Ngako-ke, kufanele siciniseke ngetintfo letibaluleke kakhulu, sihlele sikhatsi sekulungiselela nekuhlanganyela emsebentini wekushumayela njalo. (Fil. 1:10) Setama kutigcina siphila imphilo lemelula futsi sibe njengalabangalisebentisi lelive.—1 Khor. 7:31.
4. Kungani kubalulekile kutsi sikuhlele nyalo loko lokuta kucala kitsi?
4 Nakanesikhatsi lesincane, umuntfu lohlakaniphile ucala ngekwenta tintfo letibaluleke kakhulu. Nakeva kutsi kuta siphepho, angasebentisa sikhatsi kanye nemandla akhe kute alungiselele kuphepha kwemndeni wakhe futsi ecwayise bomakhelwane bakhe. Akatihluphi ngetintfo letingakabaluleki. Sikhatsi lesisele ngembi kwekufika kwe-Amagedoni sinciphile. (Zef. 1:14-16; 1 Khor. 7:29) Kute sitisindzise tsine kanye nalabo labasilalelako, kufanele siticaphele tsine kanye nekufundzisa kwetfu, kungaba ngekhatsi nobe ngephandle kwelibandla. (1 Thim. 4:16) Kusindza kwetfu kusekelwe ekutseni sigcine umsebenti wekushumayela uyintfo leta kucala kitsi.