Loko Lesihlelelwe Kona Njengetikhonti LetingemaKhristu
1. Nguluphi luhlelo lolusha lolwacala nga-1938, futsi beyiyini injongo yalo?
1 Nga-1938, kwacaliswa luhlelo lolusha enhlanganweni yaJehova. Emabandla amenywa kutsi abe khona emihlanganweni, nyalo leseyibitwa ngekutsi yesifundza. Injongo yaloku beyiyini? I-Informant (leseyibitwa ngekutsi Umsebenti Wetfu WeMbuso) ya-January 1939 yaphendvula: “Lemihlangano iyincenye yeNhlangano yaJehova yekucondzisa kwayo imisebenti lemayelana neMbuso. Ticondziso letitfolakala kuyo tibalulekile kitsi sonkhe kute sikwati kuwenta kahle umsebenti lesiniketwe wona.” Nasibuka kwandza kwebamemeteli beMbuso kusukela enanini lalabangu-58 000 nga-1938 kuya kulabangetulu kwa-7 000 000 nga-2009, kuyacaca kutsi imihlangano yesifundza ifeza indzima lebaluleke kakhulu ekusiteni tikhonti taJehova kutsi ‘tente lomsebenti letiniketwe wona.’
2. Ngutiphi tinkhulumo letitawetfulwa emhlanganweni wesifundza wemnyaka lomusha wemsebenti?
2 Sihloko Semnyaka Lotako: Sesiyawulangatelela umhlangano wesifundza lotawucala nga-September, kanye nesikhutsato lotawusiniketa sona. Sihloko sawo lesitsetfwe encwadzini yaJohane 15:19 sitawube sitsi: “Anisibo Belive.” Ngutiphi letinye tinkhulumo letitawusizuzisa kakhulu njengemaKhristu? NgeMgcibelo sitawulalela inkhulumo letsi “Umsebenti Wasikhatsi Sonkhe Usivikela Njani?” Sitawuphindze sijabulele neluchungechunge lolunetinkhulumo letintsatfu letitsi: “Ningahlanganyeli . . . ” ‘Nesilo,’ ‘Nengwadla Leyatiwa Kakhulu,’ kanye ‘Nebatsengisi Bemhlaba.’ NgeLisontfo sitawulalela luchungechunge lolunesihloko lesitsi “Tsandza Jehova, Hhayi Live.” Letinye tinkhulumo tihlanganisa letsi “Chubekani ‘Nitihambi Nalabendlulako Kulelive,’” kanye naletsi “Bani Nesibindzi! Ungalincoba Live.”
3. Ngutiphi tinzuzo lesingatitfola ngekuba khona emhlanganweni wesifundza?
3 Ngemuva kwekuya emhlanganweni wesifundza losandza kwendlula, lomunye dzadze lobekangasawukhutsaleli umsebenti wekushumayela wabhala kutsi luhlelo lwemhlangano lwamenta waphindze wahlola timo takhe, futsi watimisela nekutsi “ashumayele, ayekele kubeka taba.” Asingabati kutsi umhlangano wesifundza wemnyaka lomusha wemsebenti utawusisita sitsandze Jehova kunekutsandza lelive. (1 Joh. 2:15-17) Timisele kutsi ube khona futsi ulalelisise kute utewuzuza ngalokugcwele kuloluhlelo lwelutsandvo lesentelwe lona njengetikhonti letingemaKhristu.