Vikela Ingcondvo Yakho

1. Sitsini sihloko semhlangano wesifundza wemnyaka wemsebenti wa-2013, futsi iyini injongo yawo?

¹ Jesu watjela bafundzi bakhe kutsi batsandze Jehova ngenhlitiyo yabo yonkhe, ngemphefumulo wonkhe nangengcondvo yabo yonkhe. (Mat. 22:37, 38) Umhlangano wesigodzi, wesifundza nalokhetsekile walomnyaka wentelwe kusicinisa. Njengobe ungakhumbula, sihloko semhlangano wesigodzi wa-2012 sitsi “Londvolota Inhlitiyo Yakho!” Umhlangano lokhetsekile wemnyaka wemsebenti wa-2013 unesihloko lesitsi “Vikela Nembeza Wakho.” Imihlangano yesifundza letawucala ngenyanga letako, itawube inesihloko lesitsi “Vikela Ingcondvo Yakho,” lesisekelwe ku-Matewu 22:37. Lomhlangano wesifundza wentelwe kusita ngamunye wetfu ahlatiye indlela lacabanga ngayo kute ijabulise Jehova.

2. Sitawutfola timphendvulo tamiphi imibuto kulomhlangano?

² Lokutawukhulunywa Ngako: Njengobe sitawube silalele lomhlangano, sitawutfola timphendvulo talemibuto lelandzelako letitawuvela emaphuzwini layinhloko alomhlangano:

• Singakubalekela njani kucabanga imicabango ‘yebantfu’?

• Singabasita njani bantfu labangakholwa kute kusuke tintfo letivale tingcondvo tabo?

• Ngusiphi simo sengcondvo lesifuna kuba naso?

• Kuzuzisa ngani kuzindla ngetintfo letilungile?

• Singamvumela njani Jehova kutsi alawule kucabanga kwetfu?

• Yini lengentiwa ngemadvodza, emakhosikati, batali nebantfwana kute kuphila kwasekhaya kube mnandzi?

• Singahlala njani sililungele lilanga laJehova?

• Kusho kutsini kubopha tinkhalo tetingcondvo tetfu?

• Ngutiphi tinzuzo letitfolwa bantfu labasebentisa labakufundzako?

3. Kubaluleke ngani kuba khona kuwo omabili emalanga alomhlangano, kulalelisisa kanye nekukusebentisa loko lesitakufundza?

³ Sathane ulwisana netingcondvo tetfu futsi ufuna kutonakalisa. (2 Khor. 11:3) Ngako-ke, kufanele sivikele tingcondvo tetfu siphindze silawule nemicabango yetfu. Kudzingeka sichubeke sikhombisa kutsi sinemcondvo waKhristu futsi silwisane nekulawulwa ngulelive lelingawuhloniphi umtsetfo. (1 Khor. 2:16) Yenta emalungiselelo kute ube khona kuwo omabili emalanga alomhlangano. Lalelisisa. Kusebentisa emaphuzu labalulekile lesitawafundza kulomhlangano kutasisita kutsi sikhutsale ekwenteni imisebenti lemayelana neMbuso.—1 Phet. 1:13.