LiVi LaNkulunkulu Lilusito Ekufundziseni

1. Sitsini sihloko semhlangano wesifundza wemnyaka wemsebenti wa-2014, futsi ngumuphi umbuto lotawuphendvulwa kuwo?

¹ Jehova ‘unguMfundzisi wetfu Lomkhulu,’ futsi nguye umfundzisi loncono kakhulu endzaweni yonkhe. (Isa. 30:20, 21) Nguyiphi-ke indlela Jehova lasifundzisa ngayo? Usiphe incwadzi letendlula tonkhe letinye tincwadzi—liVi lakhe leliphefumulelwe liBhayibheli. Imfundziso levela kuNkulunkulu ingasisita njani ekuphileni kwetfu, engcondvweni yetfu, endleleni lesitiva ngayo, kanye nasebuhlotjeni betfu naNkulunkulu? Imphendvulo yalombuto kutawucocwa ngayo emhlanganweni wesifundza wemnyaka wemsebenti wa-2014. Sihloko salomhlangano sitsi “LiVi LaNkulunkulu Lilusito Ekufundziseni,” futsi sisekelwe encwadzini ya-2 Thimothi 3:16.

2. Emaphuzu layinhloko atawugcanyiswa timphendvulo tamiphi imibuto?

² Naka Nankha Emaphuzu Layinhloko: Emaphuzu layinhloko kuloluhlelo atawugcanyiswa timphendvulo tanayi imibuto lelandzelako:

• Imfundziso levela kuNkulunkulu inamiphi imiphumela ekuphileni kwetfu? (Isa. 48:17, 18)

• Nangabe setama kwenta lushintjo etimeni tetfu kute sikhonte Jehova emsebentini wasikhatsi sonkhe, yini lesingaciniseka ngayo? (Mal. 3:10)

• Yini lokufanele siyente nangabe siva “timfundziso letingatiwa”? (Heb. 13:9)

• Singayilingisa kanjani ‘indlela yaJesu yekufundzisa’? (Mat. 7:28, 29, NW.)

• Kungani kufanele kutsi labafundzisako ebandleni nabo batifundzise? (Rom. 2:21)

• LiVi laNkulunkulu lisisita kuphi? (2 Thim. 3:16)

• ‘Kunyakatiswa’ kwetive kubatsintsa njani bantfu? (Hag. 2:6, 7)

• Yini Jehova laciniseka kutsi singayenta? (Ef. 5:1)

• Kungani kufanele sisebente kamatima kuze sihlale emfundzisweni yaJehova? (Luk. 13:24)

3. Kubaluleke ngani kuba khona kanye nekulalelisisa loluhlelo lwemhlangano lolufike ngesikhatsi?

³ Ngasekucaleni kwencwadzi ya-2 Thimothi sehluko 3, ngaphambi nje kwekutsi Pawula abhale lamavi lekusekelwe kuwo sihloko salomhlangano, wachaza tikhatsi letimatima lebetitawuba khona ngemalanga ekugcina. Wabhala watsi: “Lababi nebakhohlisi bayawudlanga ngebubi, bedukise, nabo bedukiswe.” (2 Thim. 3:13) Kute singadukiswa, kubaluleke kakhulu kutsi silalele futsi sente loko lesikufundziswa nguNkulunkulu! Ngako-ke shengatsi singatimisela kuba khona, nekulalelisisa loluhlelo lwalomhlangano lolufike ngesikhatsi.