LiVi LaNkulunkulu Linemandla

1. Sitsini sihloko semhlangano lokhetsekile wemnyaka wemsebenti wa-2014?

¹ Ngekungafani nanome yini leyentiwe bantfu labanesono, liBhayibheli linemandla ekusigucula, lente imicabango yetfu netindlela tetfu tivumelane nentsandvo yaJehova. Linemandla kangakanani liVi laNkulunkulu? Singawasebentisa njani ngalokuphelele emandla alo ekuphileni kwetfu? Singalisebentisa njani ngendlela lephumelelako nasisita labanye? Siyaciniseka kutsi sonkhe sitakondliwa kakhulu njengobe lamaphuzu atawube adzingidvwa emhlanganweni lokhetsekile wemnyaka wemsebenti wa-2014. Sihloko sawo sitsi “LiVi LaNkulunkulu Linemandla,” futsi sisekelwe encwadzini yemaHebheru 4:12.

2. Ngutiphi timphendvulo temibuto lokufanele sitilalele?

² Tfola Timphendvulo Talemibuto: Njengobe utawube ulalele loluhlelo lwemhlangano, yetama kunaka timphendvulo talemibuto lelapha ngentansi.

• Kungani kufanele siletsembe liVi laJehova? (Hla. 29:4)

• Singawatfola njani emandla eliVi laNkulunkulu ekuphileni kwetfu? (Hla. 34:8)

• Ungawaveta njani emandla eliVi laNkulunkulu emsebentini wekushumayela? (2 Thim. 3:16, 17)

• Singakubalekela njani kuyengwa ngemandla lakhohlisako elive laSathane? (1 Joh. 5:19)

• Njengemuntfu losemusha, ungayitfola njani imphumelelo ekukhonteni Jehova? (Jer. 17:7)

• Singaba njani nemandla ngisho nalapho sibutsakatsaka? (2 Khor. 12:10)

• Yini ledzingekako kute sichubeke senta lushintjo ekuphileni kwetfu, ngisho nobe sekusikhatsi lesidze sinemikhuba lemibi kanye nesimo sengcondvo lesibi? (Ef. 4:23)

3. Ngaphandle kwekumane silalele luhlelo lwemhlangano, nguyiphi lenye indlela lesingazuza ngayo kulomhlangano lokhetsekile?

³ Asewucabange nje ngendlela lesitawuzuza ngayo kulokwatiswa lokubalulekile! Ngetulu kwaloko, njengemhlangano wesifundza newesigodzi, lomhlangano lokhetsekile utasinika ematfuba ekuvula tinhlitiyo tetfu, sijabulele kuba nebazalwane betfu nabodzadze labesuka kulamanye emabandla. (Hla. 133:1-3; 2 Khor. 6:11-13) Ngako-ke tiphe sikhatsi sekuba nebangani bakho lesekukudzala wabagcina, nesekutsi utfole labanye bangani labasha. Nangabe kulomhlangano wenu lokhetsekile kunesikhulumi lesivakashile, kungaba ngumbonisi wesigodzi nobe umzalwane losuka e-Bethel, sebentisa lelo tfuba kute wemukele yena nemfati wakhe. Tinyenti tizatfu lesinato tekuwulangatelela lomhlangano lokhetsekile lotako!