Incwajana Lensha Lokufanele Ihanjiswe!
1. Yini letawube ihanjiswa nga-November, futsi iyini injongo yayo?
1 Emhlanganweni Wesigodzi wa-2009 lotsi “Lindzani!” kwakhululwa incwajana lensha lenesihloko lesitsi LiBhayibheli—Ngumuphi Umlayeto Leliwucuketse? Nga-November, emabandla emhlabeni wonkhe atawube ayihambisa kwekucala. Lencwajana itawubazuzisa njani bantfu labasensimini yetfu? Bantfu labanyenti, ikakhulukati labo labasetinkholweni letingasito tebuKhristu, abalati kahle liBhayibheli. Ngesizatfu saloko, lencwajana iyachaza ekhasini 3 kutsi yentelwe kuniketa bantfu “umlandvo lomfishane ngeliBhayibheli.”
2. Singayihambisa njani lencwajana?
2 Indlela Yekuyihambisa: Singase sitsi: “Sitsandza kuva umbono wakho kuloku lokushiwo ngulombhalo. [Fundza 2 Thimothi 3:16.] Linyenti lebantfu lesicoca nalo liyavumelana nalamavi, kantsi labanye banemuva wekutsi liBhayibheli limane liyincwadzi lekahle. Wena ucabangani ngeliBhayibheli? [Lindzela imphendvulo.] Ngisho nobe kuyini lesiyikholelwako, kunetizatfu letinhle tekutsi sitihlolele tsine liBhayibheli. [Fundza sigaba lesisetfulo ekucaleni kwelikhasi 3.] Njengobe ufundza lomlayeto lomfishane weliBhayibheli lotfolakala kulencwajana, utawutfola intfo letsite lejabulisako: Kutsi liBhayibheli linesihloko kanye nemlayeto lowodvwa.”
3. Nguyiphi inshumayelo lesingayetfula nasihambisa lencwajana, ikakhulukati ensimini lenebantfu labasetinkholweni letingasito tebuKhristu?
3 Nayi lenye indlela lesingayihambisa ngayo, ikakhulukati nasishumayela endzaweni lenebantfu labasetinkholweni letingasito tebuKhristu: “Sitsandza kuva umbono wakho kuloku lokushiwo ngulomBhalo (nobe lokushiwo ngulencwadzi lengcwele). [Fundza Tihlabelelo 37:11.] Ucabanga kutsi umhlaba utawuba njani nasesigcwalisekile lesiphrofetho? [Lindzela imphendvulo.] Lesi sibonelo selitsemba kanye nendvudvuto bantfu bato tonkhe tive kanye nekukholwa labangalitfola eBhayibhelini.” Fundza sigaba lesisekucaleni kwelikhasi 3, bese uhambisa lencwajana.
4. Singayisebentisa njani lencwajana kute sicalise sifundvo seliBhayibheli?
4 Calisa Sifundvo SeliBhayibheli: Nasesiphindze sibuyela, kufanele sikhumbute umnikati welikhaya ngaloko lesacoca ngako esikhatsini lesendlulile, bese sicoca ngesigaba lesisodvwa nobe letimbili letimayelana nendzaba lesacoca ngayo. Loko kufanele sikwente sisebentisa imibuto lesekugcineni kwencenye lesiyikhetsile. Nangabe sifuna kumhambisela incwadzi letsi Lokufundziswa LiBhayibheli, singase simfundzele likhasi lelingemuva kwalencwajana, simnikete lencwadzi, simbute kutsi ngusiphi sihloko lanenshisekelo kuso, bese sifundza naye sigaba lesisodvwa nobe letimbili taleso sihloko. Shengatsi sonkhe singahlanganyela ngalokugcwele ekuhambiseni lencwajana nga-November!