Asikhombise Kubonga Kwetfu Sikhumbuto Sitawuba Nga-April 17
1. Ngumaphi emavi emhlabeli lafaneleka kakhulu kulesikhatsi seSikhumbuto?
1 Achutjwa kubonga labenako ngetento taJehova temusa kanye netekumkhulula, umhlabeli wabuta: “Ngiyawumentelani Simakadze ngimbonge ngako konkhe lokuhle langentela kona?” (Hla. 116:12) Lamuhla, tinceku taNkulunkulu tinesizatfu lesikhulu kakhulu sekubonga. Ngemuva kwemakhulu eminyaka kwabhalwa lamavi laphefumulelwe, Jehova waniketa bantfu sipho lesikhulu kunato tonkhe—lokusihlengo. Njengobe silungela kukhumbula kufa kwaKhristu nga-April 17, sinesizatfu lesihle sekukhombisa kubonga kwetfu.—Khol. 3:15.
2. Ngutiphi letinye tizatfu letisenta sibe nekubonga ngesihlengo?
2 Tibusiso Tesihlengo: Ngesihlengo, siyakwati kutfola ‘intsetselelo yetono tetfu.’ (Khol. 1:13, 14) Loku kusenta sikhonte Jehova nganembeza lohlantekile. (Heb. 9:13, 14) Sijabulela nenkhululeko yekukhuluma naJehova nasithandaza kuye. (Heb. 4:14-16) Labo labanekukholwa esihlengweni banelitsemba lelijabulisako lekuphila lokuphakadze.—Joh. 3:16.
3. Singaveta njani kutsi siyambonga Jehova ngesihlengo?
3 Indlela Yekukhombisa Kubonga: Lenye indlela yekukhombisa kubonga kwetfu lokukhulu kutsi sihambisane nekufundvwa kweliBhayibheli kweSikhumbuto malanga onkhe futsi sizindle ngako. Sihloko lesitfolakala ku-Sicongosekulindza sa-February 1, 2011, ngesiZulu, lesitsi “Ingabe Usululungele Usuku Olubaluleke Kunazo Zonke Onyakeni?” sentelwe kutsi sisisite kuloko. Singaphindze sithandaze ngalokusuka enhlitiyweni, sichazele Jehova ngendlela lesisijabulela ngayo sihlengo. (1 Thes. 5:17, 18) Kulalela umyalo waJesu ngekutsi sibe khona eSikhumbutweni kutawukhombisa kubonga kwetfu. (1 Khor. 11:24, 25) Ngetulu kwaloko, singalingisa lutsandvo lwaJehova lolukhulu ngekutsi simeme bantfu labanyenti kutsi nabo bahlanganyele natsi.—Isa. 55:1-3.
4. Yini lokufanele sitimisele kuyenta?
4 Tinceku taJehova letinekubonga angeke titsatse Sikhumbuto njengalomunye nje umhlangano lovamile. Singumhlangano lobaluleke kakhulu emnyakeni! Njengobe Sikhumbuto sisondzela, shengatsi singatimisela kwenta njengobe umhlabeli abhala: “Mphefumulo wami, dvumisa Simakadze, ungatikhohlwa tento takhe temusa.”—Hla. 103:2.