Indlela Lesingabonisa Ngayo Kwatisa Kwetfu Ngesipho SaNkulunkulu Lesikhulu Kunato Tonkhe
1. Kungani simatisa kangaka Jehova?
1 Kuto tonkhe “tipho letinhle” taJehova, sihlengo lasilungiselela ngeNdvodzana yakhe sisipho lesikhulu kunato tonkhe. (Jak. 1:17) Siletsa tibusiso letinyenti, njengekutsetselelwa kwetono. (Ef. 1:7) Loku kusenta sihlale sinekwatisa lokukhulu. Ngesikhatsi seSikhumbuto, sisebentisa sikhatsi setfu lesinyenti kute sizindle ngalesipho lesiligugu.
2. Singakwakha njani kwatisa sihlengo emindenini yetfu kanye nakitsi ngekwetfu?
2 Yakha Kwatisa: Kute usite umndeni wakho watise sihlengo, kungaba njani kutsi kulamaviki letako lendvulela Sikhumbuto lesinga-March 30 usebentise lilanga lekuKhonta kweMndeni kute ubukete imininingwane lemayelana nesihlengo? Hlanganyelani kufundvwa lokukhetsekile kweliBhayibheli kweSikhumbuto njengemndeni malanga onkhe. Uwedvwa, cabanga ngendlela sihlengo lesikuzuzise ngayo nalesiwutsintse ngayo umbono wakho ngaJehova, ngawe matfupha, ngalabanye kanye nangesikhatsi lesitako. Utakutfola kuzuzisa kufundza kuhlabela letingoma letimbili letinsha letitawusetjentiswa eSikhumbutweni, ingoma 8 kanye na-109.—Hla. 77:12.
3. Singakubonisa njani kwatisa kwetfu sihlengo?
3 Tindlela Tekubonisa Kwatisa: Kwatisa sihlengo kusenta sifune kutjela labanye ngaJehova nangelutsandvo lwakhe lolukhulu lwekutfumela iNdvodzana yakhe. (Hla. 145:2-7) Nga-March, April, nanga-May, leminye imindeni ibonisa kwatisa kwayo sihlengo ngekuhlela kutsi mhlawumbe lilunga linye lemndeni libe lihlahlandlela lelisitako. Nangabe loku kungeke kwenteke, ‘ungawabambisisa yini ematfuba’ kute wandzise incenye yakho enkonzweni? (Ef. 5:16) Kwatisa kutawusenta sitimisele kusita labanye kute nabo babe natsi eSikhumbutweni. (Semb. 22:17) Cala kwenta luhla lwebantfu lobuyela kubo, tifundvo teliBhayibheli, losebenta nabo nobe bomakhelwane bakho kute ubameme. Yenta konkhe longakwenta emkhankasweni wekusakata simemo seSikhumbuto.
4. Singasisebentisa njani sikhatsi seSikhumbuto ngekuhlakanipha?
4 Sikhatsi seSikhumbuto sisiniketa ematfuba lamasha ekukhombisa indlela lesimatisa ngayo Jehova ngesipho sakhe lesikhulu kitsi. Shengatsi lesikhatsi singasisebentisela kukhulisa kwatisa nekubonga kwetfu ngesihlengo kanye ‘nemcebo waKhristu longaphenyeki.’—Eph. 3:8.