Sikhumbuto Lesitako Sitasinikiteka Litfuba Lekubonga

1. Nguliphi litfuba lelikhetsekile Sikhumbuto lesisiniketa lona?

¹ Sikhumbuto sanga-April 14 sitasiniketa litfuba lelikhetsekile lekubona sizatfu sekwatisa nekubonga lokuhle lesikwentelwe nguJehova. Kulandzisa lokukuLukha 17:11-18 kuveta indlela Jehova naJesu labakutsatsa ngayo kubonga. Kuyadzabukisa kutsi munye kuphela kubantfu labalishumi labelashelwa bulephelo lowaya kuyobonga. Esikhatsini lesitako, sipho lesiyinhlawulo siyobangela kutsi tiphele tonkhe tifo bese kuba nekuphila lokuphakadze. Asingabati kutsi ngaleso sikhatsi siyombonga malanga onkhe Jehova ngaletibusiso. Kulamaviki letako, singakhombisa njani kutsi siyabonga?

2. Yini lengasisita kutsi siyatise inhlawulo?

² Lokungasisita Kutsi Siyatise Inhlawulo: Kute satise intfo letsite kufanele sicabange ngayo. Silungiselelwe emavesi lesingawafundza lahambisana neSikhumbuto latfolakala etindzaweni letehlukehlukene njengaku-appendix B12 we-New World Translation yesiNgisi lebuketiwe, kukhalenda, nakubhukwana lotsi Kuhlolisisa ImiBhalo Malanga Onkhe kuze loko kusisite kutsi siyatise inhlawulo. Kungaba kuhle kutsi nifundze lokwatiswa njengemndeni. Kwenta njalo kutawukhulisa lizinga lesatisa ngalo lenhlawulo. Loko kutawuphindze kusisite nasekutiphatseni kwetfu.—2 Khor. 5:14, 15; 1 Joh. 4:11.

3. Ngutiphi tindlela lesingakhombisa ngato kubonga ngetinyanga teSikhumbuto?

³ Khombisa Kubonga: Kubonga kubonakala ngetento. (Khol. 3:15) Ngekwenta imetamo yekutfola Jesu kute atibongele, lomuntfu lobekanebulephelo wakhombisa kutsi uyakwatisa loko lentelwa kona. Asingabati kutsi ajabulile, waphindze wacocela labanye ngalokwelashwa kwakhe lokusimangaliso. (Luk. 6:45) Kwatisa kwetfu inhlawulo kutasenta yini kutsi sihlanganyele ngemdlandla emkhankhasweni wekusakata timemo teSikhumbuto? Kuba ngemahlahlandlela lasitako nome kwengeta sikhatsi lesisicitsa ensimini ngetinyanga teSikhumbuto, kungulenye indlela lekahle yekukhombisa kubonga. Ngebusuku beSikhumbuto, kwatisa lesinako kutasenta semukele tivakashi siphindze sikulungele kuphendvula imibuto yato.

4. Singenta njani kute singatisoli nasekwendlule Sikhumbuto?

⁴ LeSikhumbuto lesiya kuso sitawuba sekugcina yini? (1 Khor. 11:26) Asati. Kodvwa lesikwatiko nje kutsi singendlula leSikhumbuto, kutawube sekwendlule litfuba lelikhetsekile lekukhombisa kubonga. Utalisebentisa kahle yini? Shengatsi emavi etfu ekwatisa kanye nemizindlo yenhlitiyo yetfu ingajabulisa Jehova, lokunguye lowasilungiselela lenhlawulo.—Hla. 19:14.