Banini ‘Nebubele’
1. Yini bantfu labayidzinga kakhulu lamuhla?
1 Akukaze kwenteke emlandvweni kutsi bantfu labanyenti badzinge kukhonjiswa bubele. Timo temhlaba letichubeka nekuba timbi kakhulu tente kutsi linyenti lebantfu lingajabuli, licindzeteleke, futsi liphelelwe litsemba. Tigidzi tebantfu tidzinga lusito futsi tsine njengemaKhristu singakhona kukhombisa kutsi sibakhatsalela mbamba bomakhelwane betfu. (Mat. 22:39; Gal. 6:10) Singakukhombisa njani loku?
2. Nguyiphi indlela lencono kakhulu yekukhombisa bubele kubantfu?
2 Umsebenti Lesikhombisa Ngawo Bubele: NguNkulunkulu kuphela longumtfombo wendvudvuto mbamba nalengapheli. (2 Khor. 1:3, 4) Jehova usikhutsata kutsi simlingise ngekutsi sikhombise ‘bubele’ kulabanye. Usitfume nekutsi siye kubomakhelwane betfu kute sibatjele tindzaba letinhle teMbuso. (1 Phet. 3:8) Kwenta konkhe lokusemandleni etfu kulomsebenti kuyindlela lekahle kakhulu yekudvudvuta “labo labatinhlitiyo tabo tidzabukile,” ngobe uMbuso waNkulunkulu ngiwo kuphela lotawucedza kuhlupheka kwebantfu. (Isa. 61:1) Masinyane nje, ngesihawu sakhe Jehova utawususa bubi emhlabeni futsi aletse live lelisha lelinekulunga.—2 Phet. 3:13.
3. Singaba kanjani nembono lofanana newaJesu ngebantfu?
3 Bani Nembono Lofanana NewaJesu Ngebantfu: Nanobe Jesu abeshumayela ticumbi tebantfu, akacabanganga ngabo njengelicembu. Wacabanga ngekutsi umuntfu ngamunye udzinga kusitwa kute atakhele buhlobo naNkulunkulu. Bebafanana netimvu letite umelusi longaticondzisa. Jesu samtsintsa kakhulu lesimo sebantfu, ngako-ke wase ubafundzisa ngesineke. (Mak. 6:34) Nangabe sinembono lofanana newaJesu ngebantfu, sitawubakhombisa bubele ngenhlitiyo levumako. Loko kutawubonakala endleleni lesikhuluma ngayo nangesimo sebuso betfu. Kushumayela kutawuba ngumsebenti lesiwenta kucala ekuphileni futsi sitawukwenta loko lesikushoko kuvumelane netidzingo temuntfu ngamunye.—1 Khor. 9:19-23.
4. Kungani kufanele sembatse bubele?
4 Sicumbi lesikhulu sebantfu bato tonkhe tive siyawemukela umlayeto weMbuso kanye nelutsandvo lesibanika lona. Njengobe sichubeka nekwembatsa bubele, sitawudvumisa futsi sijabulise Jehova, Nkulunkulu wetfu lonebubele.—Khol. 3:12.