Bakulungele Yini Bantfwana Bakho?
1. Kungani kunesidzingo sekutsi bantfwana labasafundza sikolwa bahlale bakulungele?
1 Akungabateki kutsi emnyakeni ngamunye, bantfwana benu batawuhlangabetana netinsayeya letinsha kanye nekucindzeteleka. Batawuphindze bavulekelwe ngematfuba ‘ekufakazela liciniso.’ (Joh. 18:37) Bakulungele yini loko?
2. Kute bakulungele, yini bantfwana bakho lokufanele bayati?
2 Bantfwana bakho bayakucondza yini kutsi kushoni kuhlanganyela emikhosini lekhutsata umoya welive nobe kuhlanganyela emaholidini emacaba? Bayacondza yini kutsi kungani loku kukubi? Bakulungele yini kumelana nekucindzetelwa labatawuhlangabetana nako kwekutsi batfole imfundvo lephakeme, bajole, futsi banatse tjwala nobe basebentise tidzakamiva? Batawukwati yini kuchaza tinkholelo tabo nobe batawumane batsi inkholo yabo ayibavumeli kutsi bente leyontfo?—1 Phet. 3:15.
3. Batali bangakusebentisa njani Kukhonta Kwemndeni kwakusihlwa kute balungiselele bantfwana babo?
3 Sebentisa Kukhonta Kwemndeni Kwakusihlwa: Kuyavunywa kutsi njengobe umnyaka uchubeka nitawucoca ngetinkinga bantfwana benu labahlangabetana nato esikolweni nangabe kuvela sidzingo saloko. Kucoca nebantfwana benu ngembikwekutsi bavule esikolweni mayelana netinkinga labangahle bahlangabetane nato kungabaniketa sibindzi. Kungani ningakwenti loku ngebusuku beKukhonta Kwemndeni? Babuteni kutsi ngutiphi tintfo letibahluphako esikolweni. Tintfo lenake nacoca ngato eminyakeni leyendlulile ningaphindze nikhulume ngato njengobe nyalo labantfwana sebakhulile futsi nelizinga labo lekucondza selitfutfukile. (Hla. 119:95) Ningase nente nemidlalo, wena ube nguthishela, umeluleki wesikolwa, nobe umfundzi. Fundzisa bantfwana bakho indlela yekusebentisa liBhayibheli nabaphendvula imibuto kanye nendlela yekusebentisa emathulusi lanjengencwadzi letsi “Ukubonisana” kanye naletsi “Intsha Iyabuza.” Lomunye umtali wasebentisa lendlela kute alungiselele bantfwana bakhe kutsi bakhone kuya kubothishela babo labasha nakusuka umnyaka babatjele kutsi baboFakazi BaJehova.—Fundza Sicongosekulindza sa-December 15, 2010, emakhasi 3-5, ngesiZulu.
4. Yini batali labahlakaniphile labayentako?
4 Tinkinga bantfwana bemaKhristu labahlangabetana nato kulamalanga ekugcina ‘timatima’ kakhulu. (2 Thim. 3:1) Batali labahlakaniphile batawucabanga ngaletinkinga tisengakenteki kute basite bantfwana babo kutsi batincobe. (Taga 22:3) Ngembikwekutsi letinkinga tifike, yenta konkhe lokusemandleni akho kute usite bantfwana bakho batilungele.