Ungangabati Kushumayela
1. Yini ledzingekako kute ufakaze esikolweni, futsi kungani?
1 Wake wangabata yini kufakaza esikolweni ngobe wesaba kutsi utawuhlekwa? Kudzingeka sibindzi kute ukwati kutimelela, ikakhulukati nangabe unemahloni. Yini lengakusita?
2. Mayelana nekufakaza esikolweni, kwehlulela lokuhle kusebenta njani?
2 Yehlulela Kahle: Ngisho nobe sikolwa ungasitsatsa njengensimi yakho, khumbula kutsi akukalindzeleki kutsi ucoce nabo bonkhe bantfu njengalapho ushumayela emtini ngemuti. Yehlulela kahle kute ukhetse sikhatsi lesifanele sekukhuluma. (Shu. 3:1, 7) Intfo lokukhulunywa ngayo eklasini nobe umsebenti wesikolwa loniketwe wona ungase uvule litfuba lekutsi uvete kukholwa kwakho. Kungenteka lotsite lofundza naye akubute kutsi kungani ungahlanganyeli kuletinye tintfo. Lamanye emaKhristu achazela bothishela bawo nakucala umnyaka kutsi aboFakazi BaJehova futsi abaniketa netincwadzi letichaza tinkholelo tetfu. Labanye bashiya tincwadzi ematafuleni abo kute labo labafundza nabo babute imibuto ngato.
3. Ungakulungela njani kufakaza esikolweni?
3 Kulungele: Nangabe ulungiselela, utawuciniseka kakhulu. (1 Phet. 3:15) Ngako yetama kucabanga ngemibuto lengase ivele, bese uyacabanga nangekutsi ungayiphendvula njani. (Taga 15:28) Nakungenteka, hlale uneliBhayibheli lakho kanye naletinye tincwadzi njengaletsi “Ukubonisana,” “Intsha Iyabuza,” kanye naletinye letikhuluma ngendalo, kute ukwati kutisebentisa nawutidzinga. Cela batali bakho kutsi bahlele kutsi kube netikhatsi tekuphrakthiza ekukhonteni kwenu kwemndeni.
4. Kungani kufanele uchubeke ufakaza esikolweni?
4 Bani Nembono Lofanele: Ungacabangi kutsi labo lofundza nabo batawuhlale bahlekisa ngawe nawubashumayela. Kungenteka labanye babo bakutsandze ngobe unesibindzi futsi bakulalele. Kodvwa ungapheli emandla nangabe kuba bete lokulalelako. Jehova utawujabula ngemetamo wakho. (Heb. 13:15, 16) Chubeka umcela kutsi akusite ‘ukhulume livi lakhe ngaso sonkhe sibindzi.’ (Imis. 4:29; 2 Thim. 1:7, 8) Asewucabange ngendlela longajabula ngayo nakuba khona lolalelako. Loyo muntfu angagcine asakhonta Jehova kanye nawe!