Bomagazini Betfu Bentelwe Kutsi Bakhange Bonkhe Bantfu
1. Sisebenti lesetsembekile nalesihlakaniphile simlingisa njani umphostoli Pawula?
1 Njengemphostoli Pawula lobekashintja indlela labeshumayela ngayo tindzaba letinhle kute azuze “bonkhe” bantfu, sisebenti lesetsembekile nalesihlakaniphile sisebentisa bomagazini kute sifinyelele bantfu labavela etindzaweni letehlukehlukene futsi labanetinkholelo letehlukehlukene. (1 Khor. 9:22, 23) Kute sisisebentise kahle Sicongosekulindza kanye ne-“Phaphama!” kufanele sihlale sibakhumbula bantfu lababhalelwe labomagazini.
2. I-“Phaphama!” yentelwe kutsi ikhange bobani?
2 I-“Phaphama!”: Lomagazini wentelwe kutsi ufinyelele bantfu labafanana nalabo umphostoli Pawula lababita ngekutsi “bantfu base-Athene.” (Imis. 17:22) Labo bantfu bebangesiwo emaKhristu, futsi bebanelwati loluncane lwemiBhalo. Ngalokufananako, bantfu labentelwe lomagazini nabo banelwati loluncane ngemiBhalo nobe bete nhlobo. Bangase bangati lutfo ngetimfundziso tebuKhristu, ngandlelatsite kungenteka abayetsembi inkholo, nobe kungenteka abati kutsi liBhayibheli lilusito ekuphileni. Injongo lenkhulu ye-“Phaphama!” kwenta bantfu baciniseke kutsi Nkulunkulu weliciniso ukhona. Lenye injongo yalomagazini kwenta bantfu bakholelwe eBhayibhelini kanye nekubasita bati kutsi yini leyenta boFakazi BaJehova behluke kuletinye tinkholo.
3. Letinhlelo letimbili te-Sicongosekulindza tibhalelwe bobani?
3 Sicongosekulindza: Bantfu labentelwe Sicongosekulindza lesihanjiswako ngelizinga lelitsite bayamhlonipha Nkulunkulu kanye nemiBhalo. Banalo lwati loluncane ngeliBhayibheli kodvwa abaticondzisisi kahle timfundziso talo. Bayafanana nebantfu Pawula latsi ‘besaba Nkulunkulu.’ (Imis. 13:14-16) Ngalokuyinhloko, Sicongosekulindza lesifundvwako sentelwe boFakazi BaJehova. Pawula abecabanga kutsi labo labebafundza tincwadzi takhe bebetayelene nemiBhalo futsi bebanelwati lolungulonalona lweliciniso. (1 Khor. 1:1, 2) Ngalokufananako, tihloko letikulomagazini lofundvwako tentelwe labo lababa khona emihlanganweni kanye nalabo labetayelene nemagama lesiwasebentisako tsine njengaboFakazi.
4. Kungani kufanele setayelane naloko lokucuketfwe ngumagazini ngamunye lesiwuhambisa ensimini?
4 Nanobe ngalokuvamile sibahambisa kanyekanye labomagazini, sivame kukhulumela munye kuphela. Ngako-ke, kwente umgomo wakho kutsi wetayelane nalokucuketfwe ngumagazini ngamunye. Nawenta njalo utawukhona kukhulumela loko lokutawukhanga bantfu lohlangana nabo.