‘Alingcweliswe Libito LaNkulunkulu’
1. Sitsini sihloko semhlangano wesifundza wemnyaka wemsebenti wa-2012, futsi sisekelwe kuphi?
1 Sinelilungelo lelikhulu lekubitwa ngelibito laJehova, uMbusi Wendzawo Yonkhe! NguNkulunkulu ngekwakhe lowasibita ngelibito lakhe, futsi kusukela nga-1931 sacala kwatiwa ngalelibito lelikhetsekile lelitsi boFakazi BaJehova. (Isa. 43:10) Jesu walihlonipha kakhulu libito laBabe wakhe, futsi wakhuluma ngalo kucala emthandazweni wakhe losibonelo. (Mat. 6:9) Emavi aJesu asihloko semhlangano wesifundza wemnyaka wemsebenti wa-2012, lesitsi “Alingcweliswe Libito LaNkulunkulu.”
2. Yini lesilindzele kuyiva kulomhlangano?
2 Loko Lesikulindzele: NgeMgcibelo kutawuba nenkhulumo letsi “Yentani Libito LaNkulunkulu Latiwe Njengobe Nitikhonti Tasikhatsi Sonkhe,” letawuchaza kutsi kungani kuzuzisa kuba kulomsebenti wasikhatsi sonkhe. Kutawuba naneluchungechunge lolunesihloko lesitsi “Caphela Kutsi Ungalihlambalati Libito LaJehova,” lolutawusisita kutsi sibalekele kubanjwa tingibe letine. Inkhulumo letsi “Kungani Libito LaNkulunkulu Kufanele Lingcweliswe?” itawusiphendvulela imibuto lenjengalena: Yini lengasisita kutsi sishumayele ngenkhutsalo nanobe bantfu bakhombisa inshisekelo lencane? Yini lengasisita kutsi siphumelele kulomsebenti? NgeLisontfo sitawujabulela luchungechunge lolunetincenye letine loludzingidza tindlela lesingalikhatimulisa ngato libito laNkulunkulu ngemicabango yetfu, loko lesikukhulumako, tincumo tetfu, kanye nangekutiphatsa kwetfu. Labasivakashele batawujabulela inkhulumo yelinyenti lenesihloko lesitsi “Jehova Utawungcwelisa Libito Lakhe E-Amagedoni.”
3. Nguliphi lilungelo lesinalo, futsi umhlangano wesifundza utawusisita kutsi senteni?
3 Masinyane, Jehova utawutsatsa sinyatselo kute angcwelise libito lakhe. (Hez. 36:23) Kwanyalo, sinelilungelo lelikhulu lekubitwa ngelibito laJehova kanye nekufeza yonkhe imitfwalo leletfwa kubitwa ngalo. Siyaciniseka kutsi lomhlangano wesifundza utawusita ngamunye wetfu kutsi awufeze lomtfwalo wakhe lobalulekile wekubitwa ngelibito laNkulunkulu.