Libhokisi Lembuto

◼ Singancuma njani kutsi sitawumshiyela yini umuntfu incwadzi nobe cha?

Sici lesibalulekile yinshisekelo lanayo. Nakakhombisa inshisekelo lecotfo, singamshiyela bomagazini lababili, incwajana, nobe letinye tincwadzi lesinato. Loko kuliciniso ngisho nobe sicondza kutsi umuntfu unemnikelo lomncane wekusekela umsebenti wemhlaba wonkhe nobe ute. (Jobe 34:19; Semb. 22:17) Ngakulolunye luhlangotsi, angeke simshiyele umuntfu tincwadzi tetfu letiligugu nakangatifuni.—Mat. 7:6.

Umnikati welikhaya angakhombisa njani kutsi unenshisekelo? Kuvuma kukhuluma natsi kuluphawu loluhle. Kulalela nasikhuluma, kuphendvula imibuto, kanye nekuveta imibono yakhe kukhombisa kutsi uyahlanganyela kuloko lesikhuluma ngako. Kunaka njengobe sifundza liBhayibheli kukhombisa inhlonipho ngeliVi laNkulunkulu. Ngalokuvamile, kuyasita kumbuta kutsi utawutifundza yini tincwadzi lesimshiyele tona. Ummemeteli kufanele asebentise kwehlulela lokuhle kute ancume kutsi umuntfu lotsite unayo yini inshisekelo. Nasi sibonelo: Nasifakaza emgwacweni, angeke kube kuhle kuniketa wonkhe umuntfu lowendlulako magazini, incwajana nobe incwadzi. Nangabe singakwati kubona kutsi umuntfu unayo yini inshisekelo, kutawuba ncono kutsi simnikete lipheshana.

Ngalokufananako, linani letincwadzi ummemeteli latawutitsatsa endzaweni yetincwadzi aliyi ngekutsi unemnikelo longakanani, kodvwa kufanele atsatse tincwadzi latidzingako kute atisebentise emsebentini wekushumayela. Iminikelo akusiyo yekubhadala tincwadzi, kunaloko yekusekela tonkhe tici temsebenti wemhlaba wonkhe. Nobe kungatsiwa timo tetfu temnotfo tinjani, kubonga kwetfu kutawusikhutsata kutsi sinikele ngako konkhe lesinako kute sisekele tintfo teMbuso. (Mak. 12:41-44; 2 Khor. 9:7) Kutawuphindze kusikhutsate kutsi sitsatse tincwadzi lesitidzingako kuphela, kute singamoshi iminikelo lesetjentiselwa kwenta letincwadzi.

[Blurb on page 2]

Ummemeteli kufanele asebentise kwehlulela lokuhle kute ancume kutsi umuntfu lotsite unayo yini inshisekelo