Emachinga Lamatsatfu Ekutfutfukisa Indlela Lofundzisa Ngayo
1. Kungani kufanele siyitfutfukisa indlela lesifundzisa ngayo?
1 Onkhe emaKhristu abafundzisi. Ngisho nobe siya kwekucala kubantfu, sibuyela kubo kute sitfutfukise inshisekelo nobe sichuba sifundvo seliBhayibheli, lesikwentako kubaniketa lwati. Lwati lesiluniketa bantfu lukhetsekile. Siniketa bantfu kukhanya lokuvela ‘emiBhalweni lengcwele,’ lengabenta kutsi ‘basindziswe.’ (2 Thim. 3:15) Leli lilungelo lelikhulu lesinalo! Nankha emachinga lamatsatfu ekutfutfukisa indlela lesifundzisa ngayo.
2. Singafundzisa njani ngendlela lemelula?
2 Fundzisa Ngendlela Lemelula: Nangabe siyati kahle indzaba letsite, kungaba melula kukhohlwa kutsi kungenteka ibe lukhuni kulomunye umuntfu longayati. Ngako-ke, nawuchuba sifundvo seliBhayibheli, ungengeti imininingwane lengadzingeki. Esikhundleni saloko, gcizelela emaphuzu labalulekile. Kukhuluma kakhulu akukwenti kutsi ube ngumfundzisi loncono. (Taga 10:19) Kuncono kakhulu kutsi ufundze imibhalo leyinhloko kuphela. Ngemuva kwekufundza umbhalo, namatsela encenyeni lechaza loko lenicoca ngako. Inshumayelo yaseNtsabeni letfolakala kuMatewu tehluko 5 kuya ku-7 iphetse emaciniso labalulekile kodvwa kuyo Jesu wafundzisa ngendlela lemelula waphindze wasebentisa emagama lambalwa.
3. Ibaluleke kangakanani imifanekiso, futsi ngumiphi lephumeleleko?
3 Imifanekiso: Imifanekiso yenta umuntfu acabange, ivusa imiva iphindze ibe lusito ekukhumbuleni. Ungacabangi kutsi kudzingeka wati tindzaba letinyenti kute ube nemifanekiso lemihle. Jesu bekavame kusebentisa imifanekiso lemifishane nalengasilukhuni. (Mat. 7:3-5; 18:2-4) Titfombe letimelula letidvwetjwe ephepheni tingaba lusito. Kulungiselela kahle kungakusita kutsi ucabange imifanekiso lephumelelako.
4. Singayisebentisa njani imibuto ngendlela lephumelelako?
4 Imibuto: Imibuto idzinga kutsi umfundzi acabange. Ngaleso sizatfu, bani nesineke ngemuva kwekubuta umbuto. Nawushesha kumphendvulela loyo mbuto, angeke wati kutsi uyakuva yini lenikufundzako. Nangabe asho imphendvulo lengasiyo, esikhundleni sekumtjela lengiyo, kungaba ncono kumbuta leminye imibuto letamsita kutsi atfole imphendvulo lengiyo. (Mat. 17:24-27) Kuliciniso kutsi kute ngisho munye kitsi longumfundzisi longenamaphutsa. Ngaleso sizatfu, liBhayibheli lisikhutsata kutsi siyinakisise njalo indlela lesifundzisa ngayo. Kwenta loku kutawuletsela tsine tinzuzo taphakadze kanye nalabo labasilalelako.—1 Thim. 4:16.