Hlale Ugadzile Nawusensimini Kute Uphephe
1. Kungani kuhlala sigadzile kubalulekile nasisensimini?
1 “Njengetimvu emkhatsini wetimphisi,” tinceku taNkulunkulu tishumayela “emkhatsini wesitukulwane lesigwegwile nalesiphambene.” (Mat. 10:16; Fil. 2:15) Kunemibiko leminyenti leyetfusako yekungaphephi, yebudlova beticuku, nekutfunjwa kwebantfu ngelunya lokubufakazi bekutsi bantfu lababi ‘bayadlanga ngebubi.’ (2 Thim. 3:13) Ngutiphi timiso teliBhayibheli letitasisita kutsi ‘sitibonakalise sihlakaniphile’ ensimini?—Mat. 10:16.
2. Ngutiphi timo letingenta kube yintfo lenhle kushiya insimu lokuyo uyoshumayela kulenye indzawo?
2 Yenta Ngekuhlakanipha: Taga 22:3 tigcizelela kutsi kukuhlakanipha ‘kubalekela’ ingoti. Hlala ugadzile. Timo letibonakala tiphephile endzaweni tingashintja singakanaki. Ungase ubone emaphoyisa lamanyenti nome ticumbi tebantfu tigcwele esitaladini. Ngaletinye tikhatsi, umuntfu lonemusa lomtfole ekhaya angase akwecwayise. Kunekutsi ucitse sikhatsi ufune kwati kutsi kwentekani, kukuhlakanipha kuhamba ngekushesha uyoshumayela kulenye indzawo.—Taga 17:14; Joh. 8:59; 1 Thes. 4:11.
3. Simiso lesiku-Mshumayeli 4:9, sisebenta njani nasisensimini?
3 Shumayelani Njengelicembu: UMshumayeli 4:9 utsi: “Babili bancono kunamunye.” Kungenteka kutsi wetayele kushumayela wedvwana futsi utikhandze uphephile, kodvwa kusephephile yini nanyalo? Kuletinye tindzawo kuphephile kushumayela uwedvwana. Kuletinye akukaphephi kutsi dzadze nome umuntfu losemncane ngeminyaka ashumayele yedvwana emtini ngemuti ikakhulukati nasekushone lilanga. Lokuhlangenwenako kukhombisa kutsi kusebenta nalotsite lonakako kumcoka. (Shu. 4:10, 12) Hlale ubanakile labanye lenishumayela nabo longahambi nabo, labasecenjini lenu. Ciniseka kutsi uyabatjela labanye lenishumayela nabo nasewuhamba.
4. Yini lesingayenta kute bonkhe labasebandleni baphephe?
4 ‘Njengalabalindza imiphefumulo yetfu,’ labadzala banemsebenti wekuniketa ticondziso letilusito kuye ngetimo tendzawo. (Heb. 13:17) Jehova utasibusisa nasititfoba futsi sibambisana nabo. (Mik. 6:8; 1 Khor. 10:12) Shengatsi tonkhe tinceku taNkulunkulu tingenta konkhe lokusemandleni ato kute tinikete bufakazi lobuhle ensimini, tibe tigadze kuphepha kwato.