Funa Bantfu Labakhuluma Lulwimi Lolutsite
1. Yini leyenta kutsi emabandla lasensimini lokukhulunywa kuyo tilimi letinyenti abelwe insimi yelulwimi lolusetjentiswa kulelobandla?
1 Ngemuva kwekutfola umoya longcwele ngePhentekhoste ya-33 C.E., bafundzi baJesu bacala ‘kukhuluma ngaletinye tilimi’ nebantfu lebebalapho labebasuka etindzaweni letehlukehlukene letikhashane. (Imis. 2:4) Umphumela waloko waba kutsi kwabhajatiswa bantfu labacishe babe ngu-3 000. Kubonakala shengatsi letivakashi nato betitati tilwimi letivamile njengesiHebheru nesiGriki kodvwa Jehova wakhetsa kutsi umlayeto weMbuso wakhe ushunyayelwe kubo ngelulwimi labalumunya. Asingabati kutsi lesinye sizatfu lesenta Jehova wenta njalo kutsi bantfu bavamise kutilalela tindzaba letimnandzi nabativa ngelulwimi labalumunya. Ngako-ke, lamuhla libandla lelisendzaweni lokukhulunywa kuyo tilwimi letinyenti labelwa insimi yelulwimi lolusetjentiswa ebandleni. (“Ukuhlelelwa” likh. 107, tig. 2-3) Emacembu elulwimi lwakulamanye emave awabelwa insimi, esikhundleni saloko ashumayela bantfu labakhuluma lulwimi lolusetjentiswa kulelicembu. Lensimi lesetjentwa ngulelicembu iba yelibandla lelilisekelako neyalamanye emabandla lasedvutane.
2. (a) Bafunwa njani bantfu labakhuluma lulwimi lolusetjentiswa ebandleni, futsi ngumaphi emabandla lokudzingeka ente loko? (b) Emabandla lasebenta insimi lenetilwimi letinyenti angasitana njani? (c) Kufanele sente njani nasitfola umuntfu lonesifiso sekufundza lokhuluma lolunye lulwimi?
2 Nawuhlala endzaweni lokukhulunywa kuyo lulwimi lunye, kungaba melula kushumayela emtini ngemuti. Nobe kunjalo, simo singehluka nawuhlala endzaweni lokukhulunywa kuyo tilwimi letinyenti. Lamanye emabandla lasebentisa lolunye lulwimi angashumayela ensimini yemabandla labomakhelwane. Nanobe emabandla angase aninikete imininingwane yebantfu labatfolakele labakhuluma lulwimi lwakho, umsebenti wekutfola bantfu longashumayela kubo usemahlombe elibandla nobe licembu lakho. (Fundza libhokisi lelitsi “Sitanani.”) Ngako, kungase kudzingeke kutsi uhlanganyele emsebentini wekufuna bantfu labakhuluma lulwimi lolusetjentiswa ebandleni. Loko ungakwenta ngekutsi ubute kutsi ukhona yini lokhuluma lulwimi lolufunako. Singabafuna njani bantfu labakhuluma lulwimi lesilufunako?
3. Yini lencuma kutsi ngukuphi lapho libandla nobe licembu lingafuna khona bantfu nekutsi singakanani sikhatsi lelitasicitsa?
3 Kuhlela Umsebenti Wekufuna Bantfu: Sikhatsi lenitasicitsa kulomsebenti wekufuna endzaweni lokukhulunywa kuyo tilwimi letinyenti sitawuya ngetimo tendzawo. Letimo tingafaka ekhatsi kutsi, bangakhi bantfu labakhuluma lololwimi kuleyondzawo? Bangakhi bamemeteli? Mangakhi emakheli ebantfu libandla nobe licembu leselivele linawo? Asikho sidzingo sekutsi libandla lifune bantfu labakhuluma lulwimi lolusetjentiswa ebandleni kuyo yonkhe insimu yalo kodvwa lingase likhetse kubafuna kakhulu emasimini elibandla lapho babanyenti khona labalukhulumako nasetindzaweni letingasikhashane kakhulu. Nome kunjalo, kubalulekile kuwuhlela kahle lomsebenti wekufuna kuze bantfu labanyenti batfole litfuba lekubita libito laJehova.—Rom. 10:13, 14.
4. (a) Kufanele uhlelwe njani umsebenti wekufuna bantfu? (b) Ngutiphi letinye tindlela tekufuna bantfu labakhuluma lulwimi lolusetjentiswa ebandleni?
4 Kuze kungaphindvwaphindvwa insimi leseyisetjentiwe, sigungu salabadzala, ikakhulukati umbonisi wemsebenti kufanele awuhlele aphindze awucondzise lomsebenti wekufuna. (1 Khor. 9:26) Emacenjini etilwimi takulamanye emave, sigungu salabadzala belibandla lelinakekela lelicembu singakhetsa umzalwane lokunconywa kutsi kube ngulomdzala nobe inceku lesebentako kutsi ihole kulomsebenti. Emabandla lamanyenti nemacembu aneluhlelo lolutsite lalusebentisako lwekwenta lucwaningo, mhlawumbe asebentisa i-telephone directory nobe i-Internet kuze afune emagama netibongo letejwayelekile kulololwimi. Nasebakutfolile loko, bangafuna bantfu ngekushaya lucingo nobe bavakashele lababatfolile kuze babone kutsi bangabafaka yini eluhlwini lwensimi yabo. Nakungenteka loko, sigungu salabadzala belibandla lelinakekela licembu singase sihlele kutsi ngaletinye tikhatsi libandla lonkhe lihlanganyele kulomsebenti wekufuna.—Fundza libhokisi lelitsi “Ungabatfola Njani Bantfu Labakhuluma Lulwimi Lolusetjentiswa Ebandleni?”
5. (a) Ngutiphi letinye tindlela letingasetjentiswa bamemeteli labenta umsebenti wekufuna? (b) Yini lesingayisho kubantfu nasenta umsebenti wekufuna?
5 Ngaso sonkhe sikhatsi kufanele sibe nemgomo nasenta lomsebenti wekufuna. Njengobe lomsebenti uyincenye yekushumayela, kufanele sigcoke ngendlela lesigcoka ngayo nasiya ensimini. Nabenta lomsebenti wekufuna, labanyenti bakutfole kulusito kuphrakthiza kutsi batawufike batsini, bakhuluma lololwimi kuze batigcine banemdlandla futsi batfutfukise likhono labo lekukhuluma lololwimi. Singasibala sikhatsi lesisicitse emsebentini wekufuna kodvwa akukafaneli sisibale sekulungisa emabalave ensimi neluhla lwebantfu. Nasimtfola umuntfu lokhuluma lulwimi lesilufunako, kufanele setame kumcocela tindzaba letimnandzi bese satisa umbonisi wemsebenti nome lotsite lokhetfwe nguye kuze afake leyomininingwane emarekhodini ensimi. Loku kufanele kwentiwe ngisho nobe umuntfu akujabulele kucoca natsi nobe angakakujabuleli. Nanobe umsebenti wekufuna ubalulekile kufanele setame kutsi singagcini ngekwenta wona kuphela kodvwa sihlanganyele nakuletinye tindlela tekushumayela.—Fundza libhokisi lelitsi “Longakusho Nawenta Umsebenti Wekufuna Bantfu.”
6. Kunatiphi tinsayeya kufuna bantfu labatihhulu?
6 Kufuna Bantfu Labatihhulu: Kufuna bantfu labatihhulu kuyinsayeya futsi kudzinga imetamo nekuphikelela. Ngeke ukhone kubona kutsi umuntfu usihhulu ngekuva ligama lakhe, nekubona indlela labukeka ngayo nobe lagcoka ngayo. Ngetulu kwaloko, emalunga emndeni nebangani bangangabata kuniketa ummemeteli locela imininingwane yemuntfu losihhulu ngobe bamvikela. Letindlela letilandzelako tekufuna bantfu labatihhulu tingaba lusito nalapho sifuna bantfu labakhonako kukhuluma.
7. (a) Yini longayenta nawufuna bantfu labatihhulu emakhaya? (b) Ungenta njani kuze lococa naye akhululeke?
7 Emabandla nemacembu elulwimi lwetandla avame kubatfola bantfu labatihhulu nawabafuna emakhaya. Mhlawumbe lococa naye uke wambona makhelwane, umuntfu lasebenta naye nobe lafundza naye asebentisa lulwimi lwetandla futsi kungenteka kutsi ubone luphawu esitaladini lolukhombisa kutsi kunebantfwana labatihhulu. Kungenteka nekutsi unesihlobo lesisihhulu. Hlale ukhumbula kutsi injongo yekuvakasha kwakho itabasolisa labanye. Nome kunjalo, ungamenta umuntfu lococa naye akhululeke ngekutsi ukhulume ngebungani, ukufishanise lokushoko, ukhombise kwetsembeka futsi ukhulume ngenhlonipho. Labanye bakutfola kuphumelela kukhombisa labacoca naye liBhayibheli nobe lamanye ema-DVD nababuta kutsi ukhona yini lamatiko losebentisa lulwimi lwetandla. Ngemuva kwaloko, bamchazele kutsi bafisa kucocela lowomuntfu ngematsemba laseBhayibhelini ngebantfu labatihhulu. Nangabe lococa naye esaba kukuniketa imininingwane yemuntfu losihhulu, angase alitsatse likheli lakho nobe simemo semhlangano welibandla kuze asinikete sihlobo nobe umngani losihhulu.
8. Libandla lelidvutane lingalisita njani libandla lelulwimi lwetandla?
8 Kanye nobe kabili ngemnyaka, libandla lelulwimi lwetandla lingase limeme libandla lelidvutane lalolunye lulwimi kutsi lilifunise bantfu labatihhulu ensimini yalo lenkhulu. Umhlangano lochutjwa ngembikwekuya ensimini locondziswa libandla lelulwimi lwetandla, kufanele ufake ekhatsi ticondziso nemboniso lokhombisa indlela longentiwe ngayo lomsebenti. Licembu ngalinye lelihamba ngemoto lingabiwa nemuntfu munye wasebandleni lelulwimi lwetandla liniketwe nelibalave lelikhombisa indzawo lokufanele bayisebente.
9. Umsebenti wekufuna ungentiwa njani etindzaweni labavame kuhlangana kuto bantfu labatihhulu, labatijabulisa kuto nobe lapho batfola khona lusito emmangweni?
9 Bantfu labatihhulu bangafunwa nasetindzaweni labavame kuhlangana kuto, kutijabulisa kuto nobe lapho batfola khona lusito emmangweni. Bamemeteli kufanele bagcoke ngendlela levumelana nesimo sendzawo. Kuze sikwente ngekuhlakanipha loku, kungaba kuhle kucoca nemuntfu munye nobe lababili kunekutsi sicoce nelicembu. Nangabe lococa nabo batsandza kufundza mhlawumbe ninganikana imininingwane yenu.
10. Bamemeteli bangabafuna njani bantfu emabhizinisini lasensimini?
10 Lokunye lokungentiwa kutsi libandla libe nemabalave lakhombisa tindzawo temabhizinisi letikhona ensimini bese liya kuleto tindzawo ngesikhatsi lesikahle. Lelinye libalave lingase libe nemagalaji lamanyenti ekwetsa timoto. Lelinye lingaba nema-dry clean, lakuwashwa khona timphahla, tindzawo tekudlela, emahhotela nobe lolunye luhlobo lwebhizinisi. Nangabe libalave ngalinye likhombisa luhlobo lunye lwebhizinisi, bamemeteli bangasebentisa yinye indlela yekushumayela lokutabenta batfole lokuhlangenwenako nelikhono. Sibonelo saloko kutsi njengobe emahhotela anawo emakhasimende latihhulu, singase siye lakufikelwa khona sichaze kafishane ngemsebenti wetfu kumuntfu losebenta khona bese simniketa emaphakethe lane-DVD nesimemo semihlangano yelibandla kuze anikete emakhasimende latihhulu. Kuletinye tindzawo temabhizinisi singabuta kutsi tikhona yini tisebenti nobe emakhasimende lasebentisa lulwimi lwetandla. Nangabe kunesikolwa setihhulu ensimini yenu, ningasinika lamanye ema-DVD etfu kuze siwafake endzaweni yaso yemtapo wetincwadzi.
11. Yini leyenta umsebenti wekufuna bantfu ube yincenye lebalulekile yemsebenti wetfu?
11 Umsebenti Lobalulekile: Kutfola umuntfu lokhuluma lulwimi lwakho kungadla sikhatsi. Ngetulu kwaloko, bomakhelwane bakho bangatishintja njalo tindzawo tekuhlala lokungenta kube yinsayeya kugcina emarekhodi ensimi anembile. Nome kunjalo, liyakhula linani letindzawo lapho umsebenti wekufuna bantfu uyintfo lebalulekile ensimini. Jehova losinikete lomyalo wekushumayela akabandlululi muntfu. (Imis. 10:34) ‘Ufisa kutsi bonkhe bantfu basindziswe bafinyelele ekulatini liciniso.’ (1 Thim. 2:3, 4) Shengatsi singabambisana tsine siphindze sibambisane naJehova ekutfoleni bantfu bato tonkhe tilwimi “labalivako livi laNkulunkulu baligcine.”—Luk. 8:15.
[Libhokisi ekhasini 3]
Sitanani
Nangabe libandla nobe licembu lingatsandza kusita ekutfoleni bantfu labakhuluma lulwimi lolusetjentiswa kulelobandla, umbonisi wemsebenti angatsintsa labadzala bemabandla lasedvute lasebentisa lolunye lulwimi. Kungaba kuhle kakhulu kutsintsa emabandla lasedvutane kuphela nobe lanebantfu labanyenti labakhuluma lulwimi lenilufunako. Libandla lokukhulunywe nalo lingatisa bamemeteli labakulo kutsi nangabe batfola lotsite lokhuluma lolulwimi babhale likheli lakhe balinikete umbonisi wemsebenti kuze alendlulisele ebandleni nobe ecenjini lelicele lusito. Babonisi bemsebenti bemabandla latsintsekako, kufanele bente luhlelo lolutawulungela onkhe lamabandla ekuhlanganiseni insimi lenetilwimi letinyenti nasekucondziseni bantfu ebandleni nobe ecenjini lelifanele.
Nangabe bamemeteli batfola lotsite lokhuluma lolunye lulwimi lokutsakasele kucoca nabo (nobe losihhulu), kufanele bagcwalise lifomu lelitsi “Siza Ulandelele” (S-43-ZU) ngekushesha bese baliniketa mabhalane welibandla. Loko kutawusita ekutseni lotfolakele kubuyelwe kuye ngekushesha.—Fundza km 5/11 likh. 3.
[Libhokisi ekhasini 4]
Ungabatfola Njani Bantfu Labakhuluma Lulwimi Lolusetjentiswa Ebandleni?
• Buta kulabanye lokufaka ekhatsi lobachubela tifundvo, lohlala nabo ekhaya, losebenta nabo, njalo njalo.
• Sebentisa i-telephone directory kuze utfole emagama netibongo letejwayelekile ngelulwimi lwakho. I-telephone directory lecala ngeluhla lwemakheli ungase uyitfole ku-Internet nobe enkapaneni yetincingo.
• Ngekuhlakanipha, buta etindzaweni lapho bantfu basitwa khona njengasemitatjeni yetincwadzi, emahhovisini ahulumende nasemakolishi.
• Hlola liphephandzaba kuze utfole tatiso letimayelana nekusita sive lokuhlelwe bantfu labakhuluma lulwimi lwakulamanye emave.
• Yani etitolo letiseceleni kwalawuhlala khona nasetindzaweni lokusetjentwa kuto ngebantfu labakhuluma tilwimi takulamaye emave.
• Ngemvume yebaphatsi, deka tincwadzi endzaweni yebhizinisi, enyuvesi nobe etiteshini tetintfo tekuhamba letitfutsa sive letivame kuba nebantfu labakhuluma lulwimi lwakho.
• Nangabe umtsetfo ukuvumela eveni lakini, tsenga incwadzi lenetindzawo temabhizinisi nobe luhlelo lwangcondvomshini loluveta tindzawo tesive letiku-Internet.
[Libhokisi ekhasini 5]
Longakusho Nawenta Umsebenti Wekufuna Bantfu
Kuba nebungani, ungagegi liguma kutawenta lokhuluma naye akwetsembe. Kuvame kusita kutsi lococa naye umkhombise kwekufundza kwelulwimi lwakhe.
Ngemuva kwekubingelela, ungase utsi: “Sifuna bantfu labakhuluma ․․․․․ kuze sicoce nabo ngelitsemba leliseBhayibhelini. Ukhona yini lomatiko lesingacoca naye?”
Nawufuna bantfu labatihhulu ungase utsi: “Sawubona, ngicela kukukhombisa naku? [Usebentisa kwekudlala i-video nobe smartphone, mkhombise livesi lelitsetjuliwe ngelulwimi lwetandla.] Sinema-video lamanyenti lentelwe kusita bantfu labangeva kutsi bafundze ngaNkulunkulu kodvwa asiwatsengisi. Ukhona yini umuntfu losihhulu lomatiko nobe longeva kahle losebentisa lulwimi lwetandla?” Nangabe kute lamkhumbulako lona lococa naye, ungase umcele kutsi akutjele tindzawo lokungenteka ubabone kuto bantfu labanjalo njengasemsebentini, esikolweni nobe endzaweni lahlala kuyo.