KUPHILA KWEMAKHRISTU
Kubambisana kute Kushunyayelwe Emasimini LanetiLwimi Letinyenti
Bantfu bavame kuwuva kancono umlayeto weMbuso nabawuva ukhulunywa ngelulwimi lwabo. Kungaleso sizatfu ngeliPhentekhoste la-33 C.E., Jehova entela emaJuda lilungiselelo lekutsi eve tindzaba letinhle ngelulwimi lwawo, ngisho nobe bekahle akhuluma siHebheru nesiGreki. (Imi 2:5, 8) Emabandla labambela ndzawonye imihlangano ngetilwimi letehlukene angashumayela ndzawonye ensimini yinye. Bamemeteli labakulawo mabandla bangabambisana njani nabasebenta leyonsimu, kute bangatikhandzi sebaphindzaphindza emakhaya kuze kucansule banikati bemakhaya?
Kukhulumisana (Tag 15:22): Babonisi bemisebenti kufanele bakhulumisane bese benta luhlelo loluhleleke kahle lwekusakata tindzaba letimnandzi kulawo masimu. Nangabe insimu yabo iyincane, emabandla lashumayela ngaletinye tilwimi anganicela kutsi niwashiye lamakhaya lasensimini yelulwimi lwawo. Nobe kunjalo, nangabe angakhoni kuyicedza yonkhe insimu yawo ngesizatfu sekutsi isendzaweni lenkhulu kakhulu, angatsandza kutsi ningayishiyi imiti nanisebenta, kodvwa niwatjele nangabe nitfola umuntfu lonesifiso sekufundza losensimini yawo. (od-ZU 93 ¶37) Ngakulokunye, angacela libandla lenu kutsi liwasite atfole bantfu labakhuluma lulwimi lwelibandla lawo futsi labangakhona kushintja likheli lalabo bantfu liye ensimini yabo. (km 7/12 5, libhok.) Khumbulani kutsi kuletinye timo kunebantfu labakhuluma tilwimi letinyenti kepha labahlala ekhayeni linye. Emalungiselelo ekuhlanganisa insimu kufanele akhombise kulalela imitsetfo yelive lebeka imincele endleleni imininingwane yebantfu lesetjentiswa ngayo.
Kubambisana (Efe 4:16): Silandzeleni ngekucophelela nome ngabe ngusiphi sicondziso lenisinikwa ngumbonisi wemsebenti. Uchuba sifundvo seliBhayibheli yini nemuntfu lokhuluma lulwimi lokungasilo lwelibandla lenu? Lomfundzi angatfutfuka ngekushesha nakangafundza nemuntfu losebandleni lelisedvute nome losecenjini lelikhuluma lulwimi lwakhe.
Lungiselela (Tag 15:28; 16:1): Nangabe umnikati welikhaya ensimini yenu akhuluma lulwimi lolwehlukile, yenta konkhe lokusemandleni akho kutsi umcocele tindzaba letimnandzi. Ungakulungiselela loku ngekuhlale ukhumbula tilwimi longahlangabetana nato ensimini yenu, nangekutitsatsela emahumusho eliBhayibheli laku-jw.org kanye nema-video aleto tilwimi. Ungasebentisa ne-JW Language app kute ufundze kuvusela ngaleto tilwimi.