Umkhankaso Wekuhambisa Timemo TeSikhumbuto Utawucala Nga-March 1
1. Sitawucala nini kuhambisa timemo teSikhumbuto, futsi yini letakwenta kutsi lomkhankaso utsatse sikhatsi lesijana kulomnyaka?
1 NgaLesihlanu mhlaka 1 ku-March, sitawucala umkhankaso wetfu waminyaka yonkhe wekumema bantfu kutsi babe khona eSikhumbutweni kanye natsi. Sikhumbuto sitawuba mhlaka 26 March, lokusho kutsi umkhankaso utawutsatsa sikhatsi lesijana kunangeminyaka leyendlulile. Loku kutawuniketa bantfu labanyenti litfuba lekutsi basitfole simemo ikakhulukati nangabe basensimini yelibandla lelinensimi lenkhulu.
2. Ngumaphi emalungiselelo lokudzingeka entiwe kuze kuhlanganiswe yonkhe insimi, futsi kufanele sitsatse timemo letingakanani sikhatsi ngasinye?
2 Kuhlela Lomkhankaso: Labadzala batasiniketa ticondziso ngendlela insimi letawuhlanganiswa ngayo nekutsi kufanele sitishiye yini timemo emakhaya langenabantfu. Timemo letisele nasisemtini ngemuti, tingahanjiswa lakutfolakala khona bantfu. Umbonisi wemsebenti utakwenta siciniseko sekutsi indzawo nesikhatsi seSikhumbuto kuyabhalwa kuletimemo bese tibekwa endzaweni yetincwadzi kuze bamemeteli batitsatsele tona kodvwa ngeke tikhishwe tonkhe ngasikhatsi sinye. Kufanele sitsatse lesitatihambisa liviki ngalinye kuphela.
3. Yini lokufanele siyikhumbule nasihambisa simemo?
3 Indlela Yekusihambisa: Kunconywa kutsi singakhulumi kakhulu. Kwenta njalo kutasisita kutsi sitinike bantfu labanyenti. Likhasi 4 linesibonelo sendlela yekuhambisa simemo kuye ngensimi yetfu. Asikho sidzingo sekutsi sikhulume ngekujaha nangabe lesicoca naye anebungani nobe anemibuto. Nasihambisa timemo ngetimphelasontfo, kufanele sitihambise kanye namagazini nangabe simo sivuma. March 2, lilanga Lelikhetsekile Lamagazini, ngako ngalelo langa sitawuhambisa timemo namagazini esikhundleni sekucela tifundvo teliBhayibheli njengobe sivame kwenta njalo ngeMgcibelo wekucala enyangeni.
4. Kungani kufanele sihlanganyele ngekutimisela kulomkhankaso?
4 Siyetsemba kutsi bantfu labanyenti batawuba khona eSikhumbutweni. Inkhulumo yeSikhumbuto itawuchaza kutsi ungubani Jesu. (1 Khor. 11:26) Itawuchaza nekutsi kufa kwaJesu kusisita ngani. (Rom. 6:23) Itawuphindze igcizelele nekutsi kubaluleke ngani kutsi simkhumbule. (Joh. 17:3) Shengatsi singahlanganyela ngekutimisela kulomkhankaso.