Kuhanjiswa Kwetimemo TeSikhumbuto Kutawucala Nga-April 2
1. Sitawutihambisa nini timemo teSikhumbuto kulomnyaka, futsi lomkhankaso waminyaka yonkhe ubaluleke kangakanani?
1 Kusukela nga-April 2 kuya ku-April 17, sitawube sihambisa timemo temkhosi lobaluleke kakhulu kulomnyaka—lokuSikhumbuto sekufa kwaKhristu. Eminyakeni leyengcile, bantfu labanyenti labanenshisekelo baye baba khona kulomkhosi waminyaka yonkhe. Nasi sibonelo: Ngelilanga leSikhumbuto, lomunye wesifazane washayela lihhovisi leligatja watsi: “Ngisandza kungena endlini, futsi ngitfole simemo emnyango. Ngiyafuna kuya, kodvwa angiciniseki ngesikhatsi.” Lomzalwane wamchazela kutsi angakutfola kuphi loko kwatiswa kulesimemo. Lona wesifazane waphetsa ngekwetsembisa, watsi: “Ngitawuba khona kulomkhosi wenu lamuhla!”
2. Yini lesingayisho nasihambisa lesimemo?
2 Indlela Yekutihambisa: Njengobe sinesikhatsi lesincane sekutsi sihlanganise yonkhe insimi yetfu, kufanele singaluli lapho sikhuluma. Singase sitsi: “Sawubona. Sicela kumema umndeni wakho emkhosini lobalulekile waminyaka yonkhe lotawubanjwa emhlabeni wonkhe ngeLisontfo, April 17. [Nika umnikati welikhaya lesimemo.] Ngalelo langa sitawube sikhumbula kufa kwaJesu. Kutawungenwa mahhala futsi kutawetfulwa inkhulumo lesekelwe eBhayibhelini letawube ichaza kutsi singazuza njani esihlengweni saKhristu. Lesimemo sinelikheli kanye nesikhatsi lomhlangano lotawucala ngaso endzaweni yakitsi.”
3. Singabamema njani bantfu labanyenti?
3 Nangabe libandla lakini linensimi lenkhulu, labadzala bangase banitjele kutsi letimemo nitishiye nasemakhaya lete muntfu, kuphela nangabe titawushiywa endzaweni lengadvonsi emehlo ebantfu. Cikelela kutsi uyabamema bantfu lobuyela kubo, tihlobo, bantfu losebenta nabo, lofundza nabo, kanye nalabo lobetayele. Nasihambisa lesimemo ngetimphelasontfo, asetame kuhambisa nabomagazini nangabe timo tivuma. Ungakwati yini kuba lihlahlandlela lelisitako nga-April futsi ube nencenye kulomkhankaso lojabulisako?
4. Kungani sifuna bantfu labanenshisekelo kutsi babe khona eSikhumbutweni?
4 Bantfu labanenshisekelo labatawube bakhona batawutfola bufakazi lobunemandla. Batawubona nelutsandvo lolukhulu lwaJehova ngekusilungiselela sihlengo. (Joh. 3:16) Batawufundza nekutsi uMbuso waNkulunkulu utawubazuzisa njani bantfu. (Isa. 65:21-23) Batawutjelwa nekutsi baye kubalindzi bese bacela sifundvo seliBhayibheli kute bafundze lokwengetiwe. Sithandazela kutsi bantfu labanyenti labanenshisekelo basemukele lesimemo futsi bahlanganyele kanye natsi eSikhumbutweni.