Timemo TeSikhumbuto Kufanele Tihanjiswe Emhlabeni Wonkhe
1. Ngumuphi umkhankaso lokhetsekile wemhlaba wonkhe lohlelwe kutsi ube khona ngembi kwaleSikhumbuto?
1 “Yentani loku kuze kube sikhumbuto ngami.” (Lukha 22:19) Ngesizatfu sekutsi tikhonti taJehova tilalela umyalo waJesu, titawube tihlangene kanye nalabo labanenshisekelo nga-March 30, 2010, kute tikhumbule kufa kwakhe. Simemo lesikhetsekile saleSikhumbuto sitawuhanjiswa emhlabeni wonkhe kusukela nga-March 13 kuye ku-March 30.
2. Singasihambisa njani lesimemo?
2 Indlela Yekusihambisa: Ungase unikete umnikati welikhaya lesimemo kute atewubona sitfombe lesisekucaleni, bese utsi: “Ngebusuku ba-March 30, tigidzi tebantfu emhlabeni wonkhe titawube tihlangene kute tikhumbule kufa kwaJesu. Ngitele kutekumema wena nemndeni wakho kutsi nani nibe khona. Nebangani bakho nabo bemukelekile.” Nangabe timo tivuma, ungase umbonise umBhalo losekela lomyalo, futsi umbonise nesikhatsi kanye nendzawo lekutawube kuhlangenwe kuyo. Njengobe sikhatsi sekuhlanganisa yonkhe insimi sisincane, kufanele ungaluli lapho ukhuluma.
3. Bobani lesingabamema?
3 Nangabe libandla lenu linensimi lenkhulu, labadzala bangase banitjele kutsi nitishiye letimemo emakhaya lete muntfu ekuhambeleni kwekucala. Nangabe timo tivuma, hambisa bomagazini kanye nalesimemo. Cikelela kutsi uyabamema bantfu lobuyele kubo, lofundza nabo liBhayibheli, losebenta nabo, lofundza nabo, tihlobo, bomakhelwane, kanye nalabanye lobetayele.
4. Kulwatisa lutsandvo Jehova lasibonise lona ngekusilungiselela sihlengo kufanele kusibangele senteni?
4 Hlela Kuwusekela Ngendlela Legcwele: Inyanga yeSikhumbuto isikhatsi lesikahle sekwandzisa inkonzo yetfu. Ungakwati yini kuhlela sikhatsi sakho kute ube lihlahlandlela lelisitako? Unabo yini bantfwana nobe bantfu lofundza nabo liBhayibheli labatfutfukako ngekwakamoya? Nangabe kunjalo, coca nalabadzala kute babone kutsi bayafaneleka yini kuhlanganyela kulomkhankaso lokhetsekile njengebamemeteli labangakabhajatiswa. Kulwatisa lutsandvo Jehova lasibonise lona ngekusilungiselela sihlengo, kusenta singagcini nje ngekubakhona kuleSikhumbuto, kepha kuphindze kusente simeme nalabanye kutsi nabo bahlanganyele natsi.—Johane 3:16.