Lungiselela Sikhumbuto Ngenjabulo
1. Sikhatsi seSikhumbuto sisikhatsi sekwentani?
1 Sikhumbuto lesitawuba ngaLesibili, mhlaka-26 March, sitasinika litfuba lelihle lekujabulela loko Nkulunkulu lasentela kona kuze sisindziswe. (Isa. 61:10) Ngisho usengakafiki lomkhosi, kuwutsakasela kutasisita kutsi siwulungele. Singawulungela njani?
2. Yini lesenta silungiselele umkhosi weSikhumbuto?
2 Lungiselela Lomkhosi: Sidlo seNkhosi Sakusihlwa singumkhosi lobalulekile kodvwa longenamidanti. Nobe kunjalo, sidzinga kutsi sisilungiselele kusenesikhatsi kuze tintfo letibalulekile singatishalateleli. (Taga 21:5) Kufanele kukhetfwe sikhatsi nendzawo lekahle futsi kutfolwe tifanekiselo letifanele. Indzawo lokutawubanjelwa kuyo Sikhumbuto kufanele ihlobe futsi ihleleke. Umzalwane lowabelwe kutsi etfule inkhulumo kufanele ayilungiselele kahle futsi bazalwane labatawuhambisa tifanekiselo nebalindzi kufanele baniketwe ticondziso. Asingabati kutsi lokunyenti kwaloko sekuvele kwentiwe. Kukhombisa kubonga inhlawulo ngiko lokusenta siwulungiselele kahle lomkhosi longcwele.—1 Phet. 1:8, 9.
3. Singatilungiselela njani kuze silungele Sidlo SeNkhosi Sakusihlwa?
3 Silungele: Kubalulekile kutsi silungise tinhlitiyo tetfu kuze sikhombise kwatisa ngekubaluleka kweSikhumbuto. (Ezra 7:10) Ngaleso sizatfu, kufanele sibekele eceleni sikhatsi sifundze kufundvwa kweliBhayibheli kwemalanga eSikhumbuto siphindze sizindle ngemalanga ekuphila kwaJesu ekugcina asemhlabeni. Kuzindla ngemoya waJesu wekutidzela kutasenta simlingise.—Gal. 2:20.
4. Nguyiphi inzuzo yenhlawulo wena lekujabulisa kakhulu?
4 Kufa kwaKhristu kuphakamisa bukhosi baJehova. Kuyasikhulula esonweni nasekufeni. (1 Joh. 2:2) Kusivulela indlela yekuba nebuhlobo lobuhle naNkulunkulu nekuphila lokuphakadze. (Khol. 1:21, 22) Kuphindze kusisite sicinise sincumo lesasenta sekuphila ngekuvumelana nekutinikela kwetfu kuJehova futsi sihlale setsembekile njengobe sibafundzi baKhristu. (Mat. 16:24) Njengobe ulungiselela kuya eSikhumbutweni, shengatsi injabulo yakho ingakhula.