Yini Loyentako Kute Ulungele Sikhumbuto?

BekunguNisan 13, 33 C.E. Jesu bekati kutsi unebusuku bunye bekugcina latabucitsa nebangani bakhe ngaphambi kwekutsi abulawe. Abetawugubha liPhasika lekugcina akanye nabo, ngemuva kwaloko amise umkhosi lomusha, lokuSidlo SeNkhosi Sakusihlwa. Lomkhosi lobaluleke kangaka wawudzinga kulungiselelwa. Ngako-ke Jesu watfumela Phetro kanye naJohane kutsi bayolungisa tintfo lebetitawudzingeka. (Luk. 22:7-13) Kusukela lapho, njalo ngemnyaka kudzingeka kutsi emaKhristu lanesifiso sekwenta Sikhumbuto awulungiselele kahle lomkhosi. (Luk. 22:19) Ngutiphi tintfo letibalulekile lokudzingeka sitilungiselele njengobe kutawuba neSikhumbuto nga-April 3?

Emalungiselelo Lentiwa Ngulabadzala:

Bahlela kusebentisa LiHholwa LeMbuso nobe lenye indzawo lekahle. Leyondzawo kufanele ibe netihlalo letenele, ibe nekwekukhanyisa, futsi ingenise kahle umoya. Kufanele bahlele nekutsi lendzawo ihlantwe kahle kusesenesikhatsi.
Bakhetsa sikhulumi lesinelikhono, umzalwane lotawuba ngusihlalo kanye nebazalwane labatawuthantaza ngaphambi kwekutsi kuhanjiswe tifanekiselo.
Nangabe kutawuba nemihlangano lengetulu kwamunye kuleyondzawo, labadzala kufanele bahlele tikhatsi taleyo mihlangano, nekutsi kutawungenwa futsi kuphunywe njani kuleso sakhiwo kanye nasendzaweni yekupaka timoto.
Bakhetsa bazalwane labatawuba balindzi nalabo labatawuhambisa tifanekiselo.
Bahlela kutsi kube netifanekiselo letifanele, kanye nemapulete, tingilazi tekutsela liwayini, litafula lelikahle kanye nendvwangu yelitafula.

Emalungiselelo Lentiwa Bamemeteli:

Hlela kutsi ube nencenye emkhankhasweni wekuhambisa simemo seSikhumbuto.
Bhala luhla lwetifundvo teliBhayibheli lonato, tihlobo, bantfu lofundza nabo esikolweni nalosebenta nabo, kanye nebantfu lobetayele. Bameme bonkhe labo bantfu.
Fundza futsi uzindle ngemavesi eliBhayibheli lalungiselelwe kutsi afundvwe ngemalanga lasondzelene nelilanga leSikhumbuto.
Bani khona eSikhumbutweni futsi ukulungele kwemukela tivakashi.