Tsatsa Sibonelo Sebaphrofethi—Jona
1. Ngusiphi similo lesihle lesaboniswa nguJona?
1 Yini lefika engcondvweni yakho nawucabanga ngemphrofethi Jona? Labanye bangamtsatsa njengaloligwala nobe lonenhlitiyo lelukhuni. Nome kunjalo, wakwenta kwacaca kutsi utfobekile, unesibindzi kanye nemoya wekutidzela. Singasilingisa njani sibonelo lesihle saJona?—Jak. 5:10.
2. Singakhombisa njani kutsi sitfobekile njengaJona?
2 Kutfobeka: Jona wacale wasibalekela sabelo sakhe. Loko akusimangalisi ngobe ema-Asiriya abedvume ngebudlova futsi iNineve yaze yabitwa ngekutsi “lidolobha lengati.” (Nah. 3:1-3) Nome kunjalo, Jehova wamkhalimela futsi Jona wakhombisa kutfobeka ngekuya esabelweni sakhe nakaniketwa litfuba lesibili. (Taga 24:32; Jona 3:1-3) Nanome wacale wabaleka kodvwa wagcine ayentile intsandvo yaJehova. (Mat. 21:28-31) Tsine sitimisele yini kulingisa Jona, ngekushumayela tindzaba letimnandzi ngisho nome sikhalinyelwa nome sihlangabetana nebumatima ensimini?
3. Ngutiphi tinhlobo tekushumayela lotentako letidzinga kutsi ube nesibidzi futsi utidzele?
3 Sibindzi Nekutidzela: Ngalesikhatsi sincumo sakhe lesibi sifaka kuphila kwematilosi engotini, Jona bekatimisele kudzela kuphila kwakhe. (Jona 1:3, 4, 12) Ngekuhamba kwesikhatsi nasafeza sabelo sakhe eNineve, waya ekhatsi nalelidolobha mhlawumbe afuna indzawo lekahle latawumemetela sehlulelo saJehova akuyo. Loku lokwentiwa ngulomphrofethi waNkulunkulu kwakhombisa kutsi unesibindzi, akasilo ligwala nje. (Jona 3:3, 4) Kutsiwani ngatsi lamuhla? Sidzinga sibindzi lesivela kuNkulunkulu kuze sifakaze ngekungesabi ngisho nome siphikiswa. (Imis. 4:29, 31) Kudzingeka sitidzele kuze sisebentise sikhatsi setfu netintfo lesinato emsebentini wekushumayela.—Imis. 20:24.
4. Ngutiphi tizatfu lokufanele tisente sizindle ngesibonelo lesasibekelwa baphrofethi baJehova?
4 Njalo nawufundza ngebaphrofethi baJehova, utawusitakala nawutifaka eticatfulweni tabo. Tibute: ‘Mine bengingenta njani kulesimo? Ngingasilingisa njani similo sakhe lesihle?’ (Heb. 6:11, 12) Tihloko letitawulandzela ku-Msebenti Wetfu WeMbuso titawukhuluma ngaletinye tifundvo lesingatitfola kulabanye baphrofethi baJehova labebatsembekile.