Libhokisi Lembuto
◼ Nasisemihlanganweni yebuKhristu nome ensimini, ngutiphi timiso teliBhayibheli letingasisita endzabeni yekusebentisa bomakhalekhikhini?
“Konkhe Kunesikhatsi Sako.” (Shu. 3:1): Bomakhalekhikhini basita bantfu kutsi bakhone kutfumelelana imilayeto futsi bacoce noma nini. Nome kunjalo, kunetikhatsi lapho emaKhristu angafuni kuphazanyiswa tincingo tawo. Sibonelo saloko ngunasisemihlanganweni yetfu, lesikhatsi sekukhonta Jehova, sekufundziswa nguye nesekusekukhutsatana. (Dut. 31:12; Hla. 22:22; Rom. 1:11, 12) Kungete kwaba kuhle yini kutsi sitivale tincingo tetfu nasifika emihlanganweni bese sifundza imilayeto ngemuva kwayo? Nangabe kunesimo lesiphutfumako lesidzinga kutsi singalucishi lucingo, kufanele siluciphe ngendlela yekutsi lungaphatamisi labanye.
‘Yenta Konkhe Ngesimanga Selivangeli.’ (1 Khor. 9:23): Ngalesinye sikhatsi, kuyasita kusebentisa makhalekhikhini nawusensimini. Nasi sibonelo: Umzalwane loholako angase awusebentisele kuchumana nebamemeteli labasebenta letinye tincenye tensimi. Ngaletinye tikhatsi bamemeteli bangasebentisa bomakhalekhikhini babo nabashayela umuntfu labafuna kubuyela kuye nobe labafundza naye liBhayibheli basengakayi kuye, ikakhulukati nakakhashane. Nangabe siluphetse lucingo kufanele sigadze kutsi lungasiphazamisi nasishumayela. (2 Khor. 6:3) Nasisemele labanye bamemeteli, kungete kwaba kuhle yini kutsi sigcile etintfweni letiphatselene nensimi futsi sinake lesihamba naye kunekushayela umngani nome kumtfumelela umlayeto?
Cabangela Labanye. (1 Khor. 10:24; Fil. 2:4): Asifuni nanini kungasihloniphi sikhatsi semihlangano lechutjwa nakutawuyiwa ensimini sititjele kutsi sitawuhlale sishaya lucingo nome sitfumele umlayeto kulotsite kuze asitjele kutsi bashumayela ngakuphi. Nasephuta kufika kuvame kudzingeka kutsi kwabiwe kabusha. Kuliciniso kutsi timo letingetulu kwemandla tingase tisibangele kutsi singasigcini sikhatsi. Nome kunjalo, nasikwenta umkhuba kubamba sikhatsi sisuke sikhombisa kutsi siyalihlonipha lilungiselelo laJehova lensimi futsi siyamhlonipha umzalwane loholako kanye nebamemeteli.