Ngubani Lotawutsandza Lona?
1. Nasifundza Sicongosekulindza nome i-“Phaphama!” yini lokufanele sicabange ngayo, futsi leni?
1 Nakubhalwa Sicongosekulindza ne-“Phaphama!” kusuke kucatjangwa ngabo bonkhe bantfu labasemhlabeni. Ngaleso sizatfu, tihloko talabomagazini tikhuluma ngetindzaba letehlukehlukene. Nasifundza sihloko ngasinye kubomagazini betfu, kufanele sicabange kutsi ngubani longaba nenkhaphunkhaphu kuso, bese siyaciniseka kutsi loyo muntfu uyamtfola lomagazini.
2. Labanye bangaba nenkhaphunkhaphu kutiphi tihloko letitfolakala kubomagazini betfu?
2 Engabe Sicongosekulindza sakamuva sikhuluma ngesihloko lesitsite lesitsatselwe eBhayibheli lenike nacoca ngaso nalenisebenta naye yini? Ikhona yini indzaba lemayelana nekuphila kwemndeni lengaba lusito esihlotjeni sakho? Kukhona yini umuntfu lomatiko lohlela kuvakashela live lelitsite lokukhulunywa ngalo ku-“Phaphama!”? Engabe ukhona yini lomunye kulabomagazini longakhanga labasebenta emabhizinisini latsite nome labasebenta ephikweni lolutsite lwahulumende ensimini yenu? Nasi sibonelo: Bantfu labasebenta etindzaweni tekunakekela lesebakhulile bangawujabulela kakhulu magazini lokhuluma ngetinsayeya tekunakekela labakhulile . Labo labasebenta ngetindzaba letiphatselene nekugcinwa kwemtsetfo bangawutsandza magazini lokhuluma ngebugebengu.
3. Landzisa lokuhlangenwe nako lokukhombisa kubaluleka kwekutsi bomagazini sibanikete bantfu lesicabanga kutsi batabatsandza kakhulu.
3 Imiphumela: Lomunye umzalwane nadzadze labashadene labahlala eNingizimu Afrikha batsi bangatfola i-“Phaphama!” yanga-October 2011 lenesihloko lesitsi: “Ukukhulisa Izingane Ezikwazi Ukuzimela,” bashayela tikolwa letingu-25 letisensimini yelibandla. Etikolweni letingu-20 babemukela labomagazini base babaniketa bantfwana besikolwa. Nalabanye labashadene kulelo live benta lokufanako futsi bahambisa bomagazini etikolweni letisensimini yelibandla. Bothishela balesinye saletikolwa baze bancuma kusebentisa lomagazini etifundvweni tabo nanabacecesha bantfwana labefikako. Laba labashadene bacocela umbonisi wesifudza ngalolokuhlangenwe nako kwabo. Yena wase sewukhutsata emabandla lasesifundzeni lakuso kutsi avakashele tikolwa letisensimini yawo. Lihhovisi leligatja latfola ema-oda lamanyenti alomagazini kangangekutsi kwadzingeka baphindze banyatseliswe.
4. Yini lesenta sifune kubaniketa bantfu labanyenti bomagazini?
4 Bomagazini betfu bakhuluma ngetentakalo tesikhatsi salamuhla futsi bente bantfu banake Umbuso waNkulunkulu kanye naloko lokuseBhayibhelini. Ngibo kuphela bomagazini emhlabeni ‘labamemetela insindziso’. (Isa. 52:7) Ngaleso sizatfu, sifuna kubaniketa bantfu labanyenti. Indlela lekahle yekwenta njalo kutsi sicabange kutsi, ‘Ngubani lotawutsandza lona?’