Sebentisa I-Web Site Yetfu Kute Ufundzise Bantfwana Bakho
1. Iyini injongo yalencenye letsi “Children” letfolakala ku-Web site yetfu?
1 I-Web site yetfu, i-jw.org yentiwe ngendlela yekutsi ikhange bantfu bebudzala lobehlukene. Incenye yayo letsi “Children” (letfolakala nawuchafata Bible Teachings > Children) isita batali nebantfwana babo kutsi basondzelane futsi basondzele nakuJehova. (Dut. 6:6, 7) Ungayisebentisa njani lencenye ye-jw.org nawufundzisa bantfwana bakho?
2. Ungakukhetsa njani kwatiswa lokufanelana neminyaka yemntfwanakho kute ukufundze naye?
2 Vumelana Netimo: Umntfwana ngamunye unetidzingo takhe letehlukile kutalomunye. (1 Khor. 13:11) Ungakukhetsa njani kwatiswa lokufanelana neminyaka yemntfwanakho kute ukufundze naye? Tibute: ‘Yini lengakhanga bantfwana bami? Kungakanani lebangakucondza? Bakhona kulalela sikhatsi lesingakanani?’ Nawunebantfwana labaneminyaka lemitsatfu nome ngephansi, ungacoca nabo ngetindzaba teliBhayibheli letitfolakala nawuchafata “My Bible Lessons” kule-Web site yetfu. Leminye imindeni itsandza letindzaba teliBhayibheli letisencenyeni letsi “Teach Your Children.” Ningaphindze nicabangele kusebentisa nanati tindlela letilandzelako.
3. Batali bangayisebentisa njani ngendlela lephumelelako imidlalo netindzaba teliBhayibheli letitfolakala encenyeni letsi “Family Worship Projects”?
3 Ema-Family Worship Projects: Lawa ngemathulusi ekusita batali kutsi bafundze nebantfwana babo. Chafata ku-“download” kute ukhone kufundza incenye letsi “Parents’ Guide” nawufuna kufundza indlela yekusebentisa nome nguyiphi indzaba yeliBhayibheli kanye nemidlalo yalo. Sebentisa imidlalo lenetitfombe njengemakhasi ladzinga kuhlotjiswa ngemibala kute ufundzise bantfwabakho. Lekelela bantfwana lasebakhulakhulile kutsi bayicedze imidlalo yabo labayicalile. Yonkhe lemidlalo lesencenyeni ngayinye ihlobana nendzaba yeliBhayibheli nobe nesifundvo lesifanako, ngako-ke bantfwana bebudzala lobehlukahlukene bangahlanganyela kulomdlalo nawo wonkhe umndeni.
4. Yini longayitfola kulencenye letsi “Bani Ngumngani WaJehova”?
4 Bani Ngumngani WaJehova: Ema-Video, tingoma, nemidlalo lekulencenye yale-Web site yetfu isita batali kutsi banamatselise liVi laNkulunkulu etinhlitiyweni tebantfwababo labancane. (Dut. 31:12) I-video ngayinye lemfisha yabopopayi ifundzisa sifundvo lesibalulekile. Imidlalo yekufuna lokutsite bese uyakutfola igcizelela bumcoka baletifundvo. Njengoba bantfwana bakutsandza kuhlabela—futsi tingoma tibasita kutsi bakukhumbule loko labakufundzile—ngako-ke, tingoma teMbuso netingoma letibhalelwe nje bantfwana tifakwa njalo kule-Web site yetfu.
5. Kungani batali kufanele bacele lusito lwaJehova kute bafundzise bantfwana babo liciniso?
5 Batali, Jehova ufuna kutsi nibe bomake nabobabe labaphumelelako. Ngako-ke, mceleni kutsi anisite kute nikwati kufundzisa bantfwana benu liciniso. (Khu. 13:8) Ngelusito lwaJehova, ningabacecesha bantfwana benu kutsi bahlakaniphe “kube kusindziswa ngekukholwa nguKhristu Jesu.”—2 Thim. 3:15; Taga 4:1-4.