Sebentisa I-jw.org Emsebentini Wakho Wekushumayela—“Yiba Umngane KaJehova”
Sihloko se-jw.org lesitsi “Izimfundiso ZeBhayibheli” sinencenye yebantfwana letsi “Yiba Umngane KaJehova” lenetingoma, ema-video, kanye naletinye tintfo. Uke wayisebentisa yini lencenye nawushumayela? Nangabe ufundza liBhayibheli nemtali lonebantfwana labasebancane, mkhombise lencenye yale-Web site. Loku kungase kumkhutsate kutsi ahlole nalokunye lokutfolakala kuyo.
Ngesikhatsi lomunye umzalwane ahambisa i-“Kingdom News” No. 38, watfola lomunye make lowavele wayifundza ngaleso sikhatsi. Lomake abenebantfwana labanyenti labasebancane labalitsandza kakhulu lelipheshana. Lomzalwane wase umchazela kafishane loko lokucuketfwe ngulelipheshana wase umkhombisa ne-Web site yetfu lengemuva. Njengobe lomake abekhombisa sifiso sekulalela, lomzalwane wasebentisa lelitfuba kuze adlalele lomake kanye nebantfwana bakhe lenye yema-video aKhwezi, asebentisa intfo yakhe yebuchwepheshe lephatfwako.
Lomunye dzadze watjela make lasebenta naye lonebantfwana labasesebancane nge-Web site yetfu kanye nekwatiswa lokumayelana nemindeni lokutfolakala kuyo. Lomake wavula i-jw.org akanye nebantfwana bakhe. Ngekuhamba kwesikhatsi lomake watjela lodzadze kutsi bantfwana bakhe sebahlale bahlabela ingoma letsi “Shumayela IZwi” lengulenye yetingoma letitfolakala kulencenye letsi “Yiba Umngane KaJehova.”
Nawe kufanele wetayelane nalencenye ye-jw.org futsi entfweni yakho yebucwepheshe lephatfwako ufake lenye yema-video, tingoma nobe letinye tintfo letitfolakala kuyo. Nawente njalo utawubese uyakhona kuyisebentisa lencenye nawushumayela. Leli lithuluzi lelihle kakhulu lelingasisita kutsi sikhonte iNkhosi!—Imis. 20:19.