Kuhambisela Bantfu Labatsite Magazini Njalo Ngenyanga Kulusito Ekucaliseni Tifundvo TeliBhayibheli
1. Kungani inhlangano yaJehova seyinesikhatsi lesidze ikhutsata bamemeteli kutsi babe nebantfu labatsite lababahambisela magazini njalo ngenyanga?
1 Bantfu labanyenti abakutsakaseli kutadisha natsi liBhayibheli, kodvwa bayatsandza kufundza bomagazini betfu. Ngaleso sizatfu, inhlangano yaJehova seyinesikhatsi lesidze ikhutsata bamemeteli kutsi babe nebantfu labatsite lababahambisela magazini njalo ngenyanga. Bantfu nabachubeka bafundza bomagazini betfu, bavame kucala kulangatelela liVi laNkulunkulu. (1 Phet. 2:2) Ngekuhamba kwesikhatsi, loko labakufundzako kungabakhanga, kubente bemukele sifundvo seliBhayibheli.
2. Singasikhulisa njani sifiso sekufundza liBhayibheli kulabo lesibahambisela bomagazini njalo?
2 ‘Nisela’ Inhlanyelo Yeliciniso: Kunekutsi umane ushiye bomagazini bese uyahamba, mcocise umnikati welikhaya futsi wetame kwakha budlelwane naye. Loko kutakusita kutsi utati timo labhekene nato, lakutsandzako, kanye netinkholelo takhe, bese uyakhona kukhuluma ngendlela lekhombisa kucondzisisa. (Taga 16:23) Lungiselela njalo nawuya kuye. Nakunekwenteka, gcizelela kafishane liphuzu lelilodvwa nembhalo lohambisana nalo lotfolakala kulomagazini, ngaleyondlela unisele noma nguyiphi inhlanyelo yeliciniso lesenhlitiyweni yakhe. (1 Khor. 3:6) Bhala phansi lilanga ngalinye lomvakashele ngalo, incwadzi lomshiyele yona, tihloko kanye nemibhalo lenicoce ngayo.
3. Kufanele sibuyele kangakhi kulabo lesibahambisela bomagazini njalo?
3 Kufanele Ubuyele Kangakhi? Kufanele ubuyele kanye ngenyanga utewuniketa loyo muntfu bomagazini bamuva. Nome kunjalo, usengabuyela kanengana kuye ngekutsi timo takho time njani nangekutsi loyo muntfu unesifiso lesinganani sekulalela. Nasi sibonelo: Ngemuva kweliviki linye noma mabili ushiye bomagazini, ungabuyela ufike utsi: “Ngitsite angendlule ngalapha nje imizuzwana kuze ngikukhombise lokutsite lokukulabomagazini lengakushiyela bona.” Loko kutawenta lomuntfu afise kufundza sihloko lesitsite kulabomagazini. Nangabe sekasifundzile, ungambuta kutsi ucabangani ngaleso sihloko bese nicoca ngaso sikhashana. Nome nangabe loyo muntfu atsandza kufundza tincwadzi tetfu, ungase ubuye umnike lipheshana, incwajana, nome incwadzi lehanjiswa kuleyo nyanga.
4. Yini longahle uyenta kuze ubone kutsi loyo lomhambisela bomagazini njalo unaso sifiso sekuchutjelwa sifundvo seliBhayibheli?
4 Ungameli loyo muntfu lomniketa bomagazini kutsi aze aticelele yena kuchutjelwa sifundvo. Tsatsa sinyatselo kucala. Nome angavumanga kuchutjelwa sifundvo seliBhayibheli esikhatsini lesendlulile, ungahle ucoca naye usebentisa sihloko lesitsi “Imibuto YeliBhayibheli Iyaphendvulwa,” lesitfolakala ku-Sicongosekulindza, kute ubone kutsi uyakujabulela yini kusifundza nawe. Mhlawumbe ungacalisa sifundvo lesichutjwa kumiwe emnyango. Kodvwa-ke, nangabe ungakhoni kucalisa sifundvo, ungachubeka nekumletsela bomagazini kuze wetame kumenta abe nesifiso sekufundza.