Basebentise Kahle Bomagazini Labadzala
Bomagazini labadzala abasiti muntfu nababekiwe nobe nabalahlwa, ngenca yaloko, kufanele sizame kubaniketa bantfu. Magazini munye nje ungavusela umuntfu sifiso sekufundza liciniso futsi umente kutsi acale kubita libito laJehova. (Rom. 10:13, 14) Loku lokulandzelako ngulokunye lesingakwenta kute sibasebentise kahle bomagazini labadzala.
Nasishumayela emasimini langasetjentwa njalo, emakhaya langenamuntfu ungahle ushiye munye magazini uwubeke endzaweni lesitsekile.
Nasishumayela etindzaweni letiphitsitelako lapho bantfu balindze khona, njengasetiteshini temabhasi nome etiteshini tetitimela, ungababuta ngamunye kutsi bangatsandza yini kutfola labangakufundza. Bakhombise bomagazini labanyentana labadzala kute batikhetsele labawufunako.
Nawuvakashele etindzaweni tekuwasha timphahla, etindzaweni tekunakekela labakhulile nalabakhubatekile, emitfolamphilo nome etindzaweni letifana naleti letisensimini yelibandla lakini, shiya bomagazini labadzala labambalwa endzaweni yekulindza. Kuyancomeka kutsi utfole imvume kucala kumuntfu lobuke leyondzawo nangabe akhona. Nawubona sekuvele kunalabanye bomagazini lapho, ungabashiyi labanye.
Nawulungiselela kubuyela kuloke wacoca nabo, cabangisisa ngaloko umuntfu ngamunye lakutsandzako. Unawo yini umndeni? Ungumuntfu lotsandza kuhamba tindzawo yini? Uyakutsandza yini kulima ingadze? Phenya bomagazini bakho labadzala kuze ubone kutsi kute yini sihloko langatsandza kusifundza futsi umkhombise nawubuyela kuye.
Nangabe utfola umuntfu lonenshisekelo ekhaya kantsi sekungemahlandla ungasamtfoli, nawuphindze umtfola mkhombise labanye bomagazini labadzala langabati.