Libhokisi Lembuto

◼ Yini lokufanele bantfwana bayifundze kute buhlobo babo naJehova butfutfuke?

Batali labangemaKhristu benta lokunyenti kuze bakhulise bantfwana babo “ngekubayala nangesicondziso saJehova.” (Ef. 6:4) Nasi sibonelo: Batali bakutfola kusita kufundza umbhalo welusuku nebantfwana babo njalo ekuseni. Ngesikhatsi sekukhonta kwemndeni nangaletinye tikhatsi, imindeni ingase ibukele i-video iphindze icoce ngayo, icoce ngekwatiswa lokutsite lokusencwadzini letsi “Intsha Iyabuza,” yente idrama yendzaba leseBhayibhelini nome iphrakthize ndzawonye. Noma kunjalo, kute bantfwana ‘bachubekele ekuvutfweni,’ kufanele bafundziswe nemaciniso eliBhayibheli lajulile.​—Heb. 6:1.

Asewucabange ngaloko lesikufundzisa bantfu ensimini. Nasicala kucoca nabo noma nasesibuyela kubo, sivame kwetama kucalisa sifundvo seliBhayibheli sisebentisa incwadzi letsi Lifundzisani Mbambambamba LiBhayibheli? Nasesiyicedzile lencwadzi, sifundza lena letsi “Tigcineni Elutsandvweni LwaNkulunkulu.” Sikwentelani loko? Incwadzi letsi Lokufundziswa LiBhayibheli iniketa bafundzi lwati lolusisekelo lwemiBhalo. Incwadzi letsi “Elutsandvweni LwaNkulunkulu,” ibafundzisa kutsi bangatisebentisa kanjani timiso teliBhayibheli ekuphileni kwabo. Kutifundza totimbili letincwadzi kusita labo lesibafundzelako kutsi ‘bacine’ kuKhristu baphindze ‘basime nasekukholweni.’ (Khol. 2:6, 7) Letincwadzi tingete tabasita yini nebantfwana bakho? Nabo bayakudzinga kufundziswa ngesihlengo, uMbuso kanye nangesimo salabafile. Bantfwana baphindze badzinge kwati kutsi Nkulunkulu ukuvumelelani kuhlupheka nekutsi singabona ngani kutsi sisemalangeni ekugcina. Kufanele baciniseke kutsi BoFakazi BaJehova baneliciniso. Bantfwana kudzingeka bacondze timiso teliBhayibheli nekutsi bangayicecesha kanjani ‘imicondvo yabo.’ (Heb. 5:14) Kuliciniso kutsi batali kufanele bacabangele iminyaka kanye nelizinga lekukhalipha kwetingcondvo tebantfwana babo. Noma kunjalo, bantfwana labanyenti bayakhona kufundza emaciniso lajulile eliBhayibheli ngisho basebancane kakhulu.​—Luk. 2:42, 46, 47.