Singabasita Njani Labo Labakutfola Kumatima Kufundza
1. Kufundzisa ngeliBhayibheli kulabo labakutfola kumatima kufundza, kuletsa yiphi insayeya?
1 Bantfu labakutfola kumatima kufundza bangahle batsandze kufundza tintfo letimayelana naNkulunkulu, kodvwa babone shengatsi kumatima kufundza liBhayibheli naletinye tincwadzi. Ngeke kube kuhlakanipha kuniketa bantfu labanjalo incwadzi letsi Lokufundziswa LiBhayibheli ekuhambeleni kwekucala. Singabasita kanjani kutsi bafundze ngaNkulunkulu? Sibute bamemeteli labanalokuhlangenwe nako emaveni langetulu kwalangu-20 ngaloko labakwentako. Naku labakushito kuletigaba letilandzelako.
2. Ngumaphi emathuluzi laphumelelako nangabe sitfola umuntfu lokutfola kumatima kufundza?
2 Nangabe umfundzi angakwati kahle kufundza nobe angakhoni nhlobo kufundza, ungase ucalise ngencwajana letsi “Listen to God” nome letsi Lalela Nkulunkulu Kute Uphile Phakadze. Lelinye lihlahlandlela laseMelika litsi livele likhombise loyo muntfu totimbili letincwajana bese limbuta kutsi nguyiphi langatsandza kutsi bayifundze. Ligatja laseKenya libike kutsi letincwajana tiphumelela kakhulu khona ngobe ngalokuvamile bantfu base-Afrika bafundziswa ngekulandziswa indzaba kunekutsi ubabute imibuto bese bayaphendvula. Umuntfu lofundzile angahle ayemukele kalula lendlela yemibuto netimphendvulo kantsi lofundze kancane angase angakhululeki. Nangabe umfundzi akhona kufundza, bamemeteli labanyenti batsandza kucala ngencwajana letsi Tindzaba Letimnandzi Letivela KuNkulunkulu, nobe letsi Ungaba Ngumngani WaNkulunkulu! nobe mhlawumbe incwadzi letsi Incwadzi Yami Yetindzaba TeliBhayibheli.
3. Yini lengasisita kutsi siphumelele ekufundziseni bantfu labangakwati kufundza?
3 Babonge: Bantfu labangakwati kufundza bangahle bangakhululeki futsi bative bangasilutfo. Kubasita kutsi bakhululeke kuvame kuba sinyatselo sekucala sekubafundzisa liciniso. Bantfu labanyenti labangakwati kufundza bahlakaniphile futsi bangakhona kufundza kufundza. Bakhombise kutsi uyabahlonipha futsi ubaphatse kahle. (1 Phet. 3:15) Loko kutawubenta kutsi bachubeke nekufundza nangabe babona kutsi imetamo yabo ayisilo lite futsi bayatfutfuka ekufundzeni ngaNkulunkulu. Ngako-ke, babonge ngemusa ngaso sonkhe sikhatsi.
Bantfu labangakwati kufundza bangahle bangakhululeki futsi bative bangasilutfo. Kubasita kutsi bakhululeke kuvame kuba sinyatselo sekucala sekubafundzisa liciniso
4. Singabakhutsa njani labo labanelikhono lelincane lekufundza kutsi balungiselele?
4 Nanobe kungenteka kutsi umfundzi unelikhono lelincane lekufundza, mkhutsate kutsi asilungiselele sifundvo sakhe. Labanye bamemeteli eNingizimu Afrika bakhutsa labo lababafundzelako kutsi bacele lilunga lemndeni noma umngani longakhona kumfundzela kahle kutsi amsite. Lomunye ummemeteli eBritain ukhutsata lafundza nabo kutsi balungiselele ngekutsi abanikete incwadzi yakhe nasabafundza tigaba letimbalwa kute babone kutsi kumelula kangakanani kutfola timphendvulo natidvwetjelwe. Lomunye umzalwane eNdiya ukhutsata lafundza nabo kutsi babuke titfombe tesihloko labatasifundza evikini lelilandzelako futsi bazindle ngato.
5. Singakukhombisa njani kubeketela nasichuba sifundvo?
5 Beketela: Kungakhatsaliseki kutsi usebentisa liphi lithulusi, gcila emaphuzwini layinhloko, futsi usite umfundzi awacondze kahle. Nanisacala, kungaba kahle kucoca naye imizuzu lengu-10 kuya kulengu-15. Ungazami kuhlanganisa indzaba lendze, kungaba nje tigaba letimbalwa sifundvo ngasinye. Beketela nangabe umfundzi afundza kancane. Angahle abe nesifiso sekutfutfukisa indlela lafundza ngayo njengobe acala kwati Jehova. Kute usite umfundzi kutsi ente loko, kuhle kutsi uvele ummemele emihlanganweni yelibandla kusukela ekucaleni.
6. Singabasita njani bantfu kutsi bafundze kufundza?
6 Nangabe bafundzi beliBhayibheli bafundza kufundza batawutfutfuka ngekushesha. (Hla. 1:1-3) Labanyenti basite labo labafundza nabo ngekufundza incwajana letsi “Funda Ukufunda Nokubhala” imizuzu letsite ekupheleni kwesifundvo ngasinye. Nangabe umfundzi atikhobosa, mhlawumbe ungamkhutsata ngekusho tintfo lakhone kufundza kutenta. Mcinisekise kutsi Jehova utawuyibusisa imetamo yakhe futsi umkhutsate kutsi athantazele lusito. (Taga 16:3; 1 Joh. 5:14, 15) Labanye bamemeteli eBritain bakhutsata labafundza nabo kutsi batibekele imigomo labangakhona kuyifinyelela kodvwa letabenta batfutfuke. Mhlawumbe kwekucala, kwati kahle tinhlavu temagama, kutfola imibhalo letsite nekuyifundza kanye nekufundza tincwadzi letisekelwe eBhayibhelini letentiwe taba melula. Kusita bantfu kutsi bafundze kufundza kuvame kufaka ekhatsi nekubakhutsata kutsi bakulangatelele kufundza, hhayi nje kumane ubafundzise kutsi kwentiwa njani.
7. Kungani kufanele singabagodleli liciniso labo labakutfola kumatima kufundza?
7 Jehova akababukeli phansi labo labangakafundzi lokuyaphi. (Jobe 34:19) Jehova uhlolisisa inhlitiyo. (1 Khr. 28:9) Ngako-ke ungabagodleli liciniso labo labakutfola kumatima kufundza. Kunemathulusi lamanyenti laphumelelako longawasebentisa longacalisa ngawo. Ngekuhamba kwesikhatsi, ningatfutfukela encwadzini letsi Lokufundziswa LiBhayibheli kute atfole kucondza lokubanti kwemiBhalo.