Emathulusi Etfu Ekufundzisa
1. EmaKhristu afana kanjani nebantfu labanelikhono lekwenta umsebenti wetandla?
1 Bantfu labanelikhono lekwenta umsebenti wetandla basebentisa emathulusi lehlukehlukene. Lamanye emathulusi ahle adzingeka nakwentiwa imisebenti lekhetsekile, kantsi lamanye asetjentiswa njalo. Bantfu lasebanesikhatsi benta umsebenti wetandla bahlale banawo lamathulusi lasetjentiswa njalo, futsi bavame kuba nelikhono kakhulu ekuwasebentiseni. LiBhayibheli likhutsata umKhristu ngamunye kutsi ente konkhe lokusemandleni akhe nakashumayela futsi abe ‘sisebenti lesite emahloni ngalutfo.’ (2 Thim. 2:15) Nguliphi lithulusi lelibaluleke kakhulu kulawo lesinawo? Lithulusi letfu lelihamba embili liVi laNkulunkulu, lesilisebentisela ‘kwenta bantfu babe bafundzi.’ (Mat. 28:19, 20) Ngako-ke, kufanele sente konkhe lokusemandleni etfu kuze sibe nelikhono ‘lekuphatsa livi leliciniso ngendlela lefanele.’ Kodvwa-ke akhona lamanye emathulusi lesivame kuwasebentisa nasifundzisa lokufanele onkhe emaKhristu afundze kuwasebentisa ngendlela lenelikhono kute afundzise bantfu liciniso.—Taga 22:29.
2. Ngumaphi emathulusi etfu ekufundzisa labalulekile?
2 Emathulusi Etfu Lahamba Embili Nasifundzisa: Ngumaphi lamanye emathulusi lokufanele siwasebentise ngaphandle kweliBhayibheli? Lithulusi lelihamba embili ekufundziseni ngeliciniso leliseBhayibhelini yincwadzi letsi Lifundzisani Mbambambamba LiBhayibheli? Nasicedza kufundza lencwadzi nemuntfu, sisebentisa letsi “Tigcineni Elutsandvweni LwaNkulunkulu” kuze simfundzise kusebentisa timiso teliBhayibheli ekuphileni kwakhe. Ngaleso sizatfu, kufanele sibe nelikhono lekusebentisa letincwadzi. Kunaletinye tincwajana nato lokufanele tibe yincenye yemathulusi etfu ekufundzisa. Incwajana letsi Tindzaba Letimnandzi Letivela KuNkulunkulu ingulenye yemathulusi etfu labalulekile ekucalisa tifundvo teliBhayibheli. Nangabe ensimini yetfu kunebantfu labangakwati kufundza kahle nobe kunebantfu labakhuluma lulwimi lesinetincwadzi letimbalwa kulo nobe lesite sanhlobo, singabese sisebentisa incwajana letsi “Listen to God” nobe letsi Lalela Nkulunkulu Kute Uphile Phakadze. Lithulusi lelibalulekile lelicondzisa bafundzi enhlanganweni yincwajana letsi Bobani Labenta Intsandvo YaJehova Lamuhla? Ema-video lalusito ekwenteni bafundzi nawo angemathulusi lokufanele sifundze kuwasebentisa kahle. Lama-video afaka ekhatsi letsi Kungani Kufanele Utadishe LiBhayibheli?, Yini Leyentekako EHholweni LeMbuso? kanye naletsi “Does God Have a Name?”.
3. Umsebenti Wetfu WeMbuso wetinyanga letitako utawusisita kutsi senteni?
3 Umsebenti Wetfu WeMbuso wetinyanga letitako utawusisita kutsi sibe nelikhono lekusebentisa tincwadzi tetfu letingemathulusi etfu ekufundzisa. Njengobe sitimisela kuwasebentisa ngelikhono lamathulusi, sitawube silalela seluleko lesiphefumulelwe, lesitsi: “Hlale utinaka wena nekufundzisa kwakho. Phikelela kuletintfo, ngobe nawenta njalo utawutisindzisa wena nalabo labakulalelako.”—1 Thim. 4:16.