Sebentisa Tincenye Tencwadzi Letsi Lokufundziswa LiBhayibheli Ngendlela Lephumelelako
Njengobe umfundzi afundza loko liBhayibheli lelikufundzisa mbamba futsi akusebentisa, buhlobo bakhe naNkulunkulu butawukhula kubonakale nangetitselo. (Hla. 1:1-3) Singasita umfundzi weliBhayibheli atfutfuke ngekusebentisa letinye tincenye letilusito letisencwadzini letsi Lokufundziswa LiBhayibheli.
Imibuto Lesingeniso: Ekucaleni kwesehluko ngasinye kunemibuto letawuphendvulwa kuso. Ungayibuta lemibuto ube ungakalindzeli kutsi aphendvule kute wente umfundzi alangatelele lenitawube nifundza ngako. Nome ungamcela aphawule kafishane ngembuto ngamunye. Nangabe loko lakushoko kungasiwo umcondvo lokahle, asikho sidzingo sekumlungisa ngaleso sikhatsi. Loko lakuphawulako kutakusita ubone lapho ungamsita khona nalapho ungagcizelela khona njengobe nifundza.—Taga 16:23; 18:13.
Sandzisanchazo: Nangabe umfundzi akucondza futsi akwemukela loko lenikufundzako, ungavele umkhutsate kutsi atifundzele sandzisanchazo lesikhonjiwe. Esifundvweni lesilandzelako, ungase utsatse imizuzu lembalwa kute ubone kutsi uyakucondza yini loko lakufundze kulesandzisanchazo. Kodvwa nangabe ubona kutsi kutamsita, nawusachuba sifundvo ningacoca ngalesandzisanchazo nobe nifundze tigaba letimbalwa kuso bese ubuta imibuto loyilungiselele.
Libhokisi Lekubuketa: Lelibhokisi lelisekugcineni kwesehluko ngasinye linemisho lembalwa lephendvula imibuto lesingeniso. Ungalisebentisa kute uciniseke kutsi lona lofundza naye ukuvile lenikufundzile futsi angakhona kuwachaza emaphuzu layinhloko. Fundzani umusho ngamunye ngelivi lelivakalako kanye nemibhalo lekulemisho. Ngemuva kwaloko, cela lofundza naye asebentise lombhalo nobe imibhalo kute achaze kutsi yini leyenta lomusho ube liciniso.—Imis. 17:2, 3.