“Pawula Wabonga Nkulunkulu, Wase Uba Nesibindzi”

Ngesikhatsi libandla laseRoma liva kutsi Pawula uyeta, kwabelwa bazalwane kutsi bamhlangabete futsi bahamba emakhilomitha langu-64. Lutsandvo lebebanalo lolute bugovu lwamtsintsa njani Pawula? “Nakababona, Pawula wabonga Nkulunkulu, wase uba nesibindzi.” (Imi 28:15) Nanobe Pawula bekatiwa njengemuntfu lobekakhutsata emabandla nakawavakashele, kodvwa ngalesikhatsi asiboshwa, nguye lobekatfola tikhutsato.—2Ko 13:10.

Nalamuhla babonisi betigodzi bavakashela libandla ngalinye kute bakhutsate bazalwane nabodzadze. Njengabobonkhe bantfu baNkulunkulu, ngaletinye tikhatsi nabo bayadzinwa, bakhatsateke, futsi baphelelwe ngemandla. Nangabe niphindze nivakashelwa ngumbonisi wesigodzi nemkakhe ebandleni lenu, ungabakhutsata njani kutsi bachubeke nemsebenti wabo kuze “sitawusitakala kanyekanye”?—Rom 1:11, 12 Catsanisa neliBhayibheli lesiswati lelivamile.

• 

  Bani khona emihlanganweni yangaphambi kwekuya emsebenti wekushumayela. Umbonisi wesigodzi uyakhutsateka nakabona bamemeteli batikhandla kute bazuze ngalokuphelele nakuliviki lelikhetsekile. (1Te 1:2, 3; 2:20) Ungakhetsa kuba lihlahlandlela lelisitako kulenyanga yekuvakashelwa ngumbonisi wesigodzi. Ungacela yini kuhamba nembonisi kanye nemkakhe emsebentini wekushumayela, nobe ucele kuhamba namunye wabo nawuyofundza nesifundvo sakho? Bayakujabulela kusebenta nebamemeteli labahlukahlukene, lokufaka ekhatsi bamemeteli labasha nobe bamemeteli labeva shengatsi bete likhono lelihle lekushumayela.

• 

  Bamemele ekhaya lakho. Ungabacela yini kutsi balale nobe bete batodla kakho? Nawenta njalo, umbonisi wesigodzi nemkakhe batawubona kutsi uyabatsandza. Abakagadzi kwentelwa tintfo letinkhulu.—Luk 10:38-42.

• 

  Silalele sicondziso neseluleko labakuniketa sona futsi usisebentise. Ngelutsandvo, umbonisi wesigodzi uyasisita sikhone kubona kutsi singatfutfukisa kanjani ekukhonteni Jehova. Ngalesinye sikhatsi, angasiniketa seluleko lesicinile. (1Ko 5:1-5) Uyajabula nangabe simlalela futsi simtfobela.—Heb 13:17.

• 

  Khombisa Kutsi Uyabonga. Cocela umbonisi wesigodzi kanye nemfati wakhe ngekutimisela kwabo kutsi kukuzuzise njani wena. Ungakwenta loku ngekubatjela ngemlomo nobe ubabhalele likhadi nobe incwadzi.—Kholose 3:15.