Umkhankaso Lokhetsekile Wekucalisa Tifundvo TeliBhayibheli NgaSeptember

NgaSeptember, sitawenta imetamo yekucela kudadisha liBhayibheli nebantfu lesibatfola emakhaya sisebentisa incwajana letsi Jabulela Kuphila Kuze Kube Phakadze! Bamemeteli bangakhetsa kuba ngemahlahlandlela lasitako futsi babike ema-awa langu-30. Sitawuhlanganyela njani kulomkhankaso lokhetsekile?

• Nawucoca nemuntfu kwekucala: Sebentisa likhasi lelingemuva lalencwajana kute wente lomuntfu abe nesifiso sekufundza futsi wetame kumkhombisa kutsi sichutjwa njani sifundvo seliBhayibheli. Khumbula nalabo labake bakhombisa kutsi banesifiso sekufundza, kuhlanganise nekubuyela kulococe nabo. Ngisho noma bebangafuni kufundza esikhatsini lesendlulile, bangayijabulela lendlela lensha yekudadisha liBhayibheli usebentisa lencwajana. Lencwajana akukafaneli siyishiye emakhaya langenabantfu nobe siyitfumele nencwadzi lesiyibhalile kulabo labangazange bakhombise kutsi bayakutsandza kufundza. IKomidi Yemsebenti Yelibandla ingahlela leminye imihlangano yangaphambi kwekuya ensimini kuleyo nyanga.

• Lamanye Ematfuba: Nangabe libandla lenu lisebentisa tincola tekukhangisa ngetincwadzi, fakani lencwajana letsi Jabulela Kuphila Kuze Kube Phakadze! Yatisa labo labanesifiso sekufundza kutsi nabatsatsa lencwajana bangaphindze badadishe nalotsite liBhayibheli mahhala. Nanisacoca, mkhombise kafishane kutsi sichutjwa njani sifundvo seliBhayibheli nobe uhlele kumkhombisa ngalesinye sikhatsi. Umbonisi wemsebenti angahlela kutsi bamemeteli labafanelekako baye ensimini yemabhizinisi futsi bacele kudadisha nebantfu liBhayibheli. Ungaphindze ucele kudadisha liBhayibheli nebantfu losebenta nabo nobe labo lobashumayela ungakahleli.

Jesu wasiyala kutsi ‘sente bafundzi’ siphindze ‘sibafundzise.’ (Mat 28:19, 20) Shengatsi lomkhankaso lokhetsekile ungasisita siwufeze lomgomo sisebentisa lencwajana letsi Jabulela Kuphila Kuze Kube Phakadze!