Simtsandza Kakhulu Babe Wetfu LonguJehova

1-2. Kungani Jehova asente saba yincenye yemndeni wakhe, futsi loko ukwente njani?

JEHOVA usimeme kutsi sibe yincenye yemndeni webantfu labamkhontako. Lesi simemo lesijabulisa kakhulu! Lomndeni wakhiwa bantfu labatinikele kuNkulunkulu futsi labakholelwa enhlawulweni yeNdvodzana yakhe. Singumndeni lojabulako. Sijabulela kuphila lokuncono nyalo, futsi siyajabula ngobe sinelitsemba lekuphila phakadze, kungaba sezulwini nobe emhlabeni lolipharadisi.

² Jehova wente kutsi sibe yincenye yemndeni wakhe ngenca yekutsi usitsandza kakhulu, kodvwa kuze ente kanjalo kwadzingeka kutsi anikele ngeNdvodzana yakhe. (Joh. 3:16) ‘Satsengwa ngelinani lelikhulu.’ (1 Khor. 6:20) Jehova wente kutsi sibe nebuhlobo lobusedvute naye asebentisa inhlawulo. Sinelilungelo lekubita uMuntfu lomkhulu kakhulu ezulwini nasemhlabeni ngekutsi Babe. Njengobe sibonile esihlokweni lesendlulile, Jehova unguBabe lokahle kakhulu.

3. Ngumiphi imibuto lesingayibuta? (Buka libhokisi lelitsi “Jehova Uyanginaka Yini?”)

³ Njengobe kwabuta lomunye umbhali weliBhayibheli, natsi kungenteka sitibute kutsi: “Ngiyawumentelani Simakadze, ngimbonge ngako konkhe lokuhle langentela kona?” (Hla. 116:12) Imphendvulo itsi kute lesingamentela kona Babe wetfu losezulwini. Kodvwa lutsandvo lanalo ngatsi lwenta kutsi simtsandze. Umphostoli Johane wabhala watsi: “Tsine sinelutsandvo, ngobe yena wasitsandza kucala.” (1 Joh. 4:19) Ngutiphi tindlela lesingakhombisa ngato kutsi siyamtsandza Babe wetfu losezulwini?

HLALE USONDZELENE NAJEHOVA

4. Ngekusho kwemBhalo waJakobe 4:8, kungani kudzinga sente imetamo yekusondzela kuJehova?

⁴ Jehova ufuna kutsi sisondzele kuye futsi sikhulume naye. (Fundza Jakobe 4:8.) Usikhutsata kutsi ‘siphikelele emthantazweni’ futsi uyasilalela ngaso sonkhe sikhatsi. (Rom. 12:12) Jehova akadzinwa futsi akasiko matasa kakhulu kutsi angasilalela. Siyamlalela ngekutsi sifundze liVi lakhe liBhayibheli naletinye tincwadzi letisisita kutsi silicondze. Siphindze simlalele ngekutsi sinakisise nasisemihlanganweni yebuKhristu. Njengobe kukhuluma lokukahle kubasita bantfwana kutsi basondzelane nebatali babo, kukhuluma naJehova ngaso sonkhe sikhatsi kuyasisita kutsi sihlale sisondzelene naye.

5. Singayitfutfukisa njani indlela lesithantaza ngayo?

⁵ Cabanga kutsi injani imithantazo loyenta kuJehova. Jehova ufuna kutsi sitfululele sifuba setfu kuye ngemthantazo. (Hla. 62:8) Senta kahle ngekutibuta nayi imibuto: ‘Imithantazo yami ikhombisa kutsi ngiyatentisa yini, isilandzelo yini nobe ifana nencwadzi lebhalwe phansi ngalokusuka enhlitiyweni?’ Siyaciniseka kutsi umtsandza kakhulu Jehova futsi ufuna buhlobo bakho naye bucine. Kuze wente kanjalo, kudzingeka kutsi ukhulume naye ngaso sonkhe sikhatsi. Mtjele indlela lotiva ngayo. Mtjele loko lokukwenta ujabule naloko lokukwenta ungajabuli. Ciniseka kutsi nguye kuphela longakusita.

6. Yini lokufanele siyente kuze sisondzelane naBabe wetfu losezulwini?

⁶ Kuze sisondzelane naBabe wetfu losezulwini, kudzingeka kutsi sihlale simbonga. Siyavumelana naloko lokwashiwo ngumhlabeleli lowatsi: “Yebo, Simakadze, Nkulunkulu wami, timangaliso losentele tona tinyenti, tingeke tibalwe, wasikhumbula tikhatsi letinyenti. Kute nome munye nje lofana nawe! Kube bengingatilandzisa tonkhe betingeke tibaleke tonkhe.” (Hla. 40:5) Senta lokungetulu nje kwekumane sibonge, siphindze sisho futsi sente tintfo letikhombisa kutsi siyambonga Jehova. Loku kusenta sehluke kubantfu labanyenti lamuhla. Siphila esikhatsini lapho bantfu labanyenti bangabongi ngaloko Nkulunkulu labentela kona nyalo. Lokunye lokukhombisa kutsi siphila “emalangeni ekugcina,” kutsi bantfu ababongi. (2 Thim. 3:1, 2) Asifuni kuba njengabo!

7. Yini Jehova lafuna kutsi siyente, futsi kungani?

⁷ Batali abafuni kutsi bantfwana babo bahlale balwa, kodvwa bafuna kutsi babe bangani. Ngendlela lefanako, Jehova ufuna kutsi bonkhe bantfu labamkhontako babe bangani. Ecinisweni, indlela lesitsandzana ngayo ikhombisa kutsi singemaKhristu eliciniso. (Joh. 13:35) Siyavumelana naloko lokwashiwo ngumhlabeli lowabhala watsi: “Kuhle kumnandzi kuhlalisana kwebazalwane ngekuvana.” (Hla. 133:1) Nasibatsandza bazalwane betfu nabodzadzewetfu, sisuke sikhombisa Jehova kutsi siyamtsandza. (1 Joh. 4:20) Kusijabulisa kakhulu kuba yincenye yemndeni webazalwane nabodzadze ‘labaphatsana ngemusa, futsi labanesihawu.’—Ef. 4:32.

KHOMBISA LUTSANDVO LWAKHO NGEKUTSI ULALELE

8. Ngekusho kwa-1 Johane 5:3, ngusiphi sizatfu lesiyinhloko lesenta kutsi silalele Jehova?

⁸ Jehova ufuna kutsi bantfwana balalele batali babo, futsi ufuna kutsi natsi simlalele. (Ef. 6:1) Kufanele simlalele ngobe unguMdali wetfu, unguMlondvoloti wekuphila kwetfu futsi ungumtali lohlakaniphe kubendlula bonkhe. Nobe kunjalo, sizatfu lesiyinhloko lesenta kutsi silalele Jehova, kutsi siyamtsandza. (Fundza 1 Johane 5:3.) Ngisho nobe titinyenti tizatfu letisenta silalele Jehova, kodvwa akasiphoceleli kutsi simlalele. Jehova usinikete inkhululeko yekutikhetsela, ngako uyajabula nangabe sikhetsa kumlalela ngobe simtsandza.

9-10. Kubaluleke ngani kwati timiso taJehova futsi siphile ngato?

⁹ Batali bafuna kutsi bantfwana babo baphephe. Kungako bababekela imitsetfo yekutiphatsa letawubazuzisa. Nangabe bantfwana bayilalela lemitsetfo, basuke bakhombisa kutsi bayabetsemba batali babo futsi bayabahlonipha. Ngako kubaluleke kakhulu kutsi siyati futsi siyilalele imitsetfo yaBabe wetfu losezulwini. Nasenta njalo, sisuke sikhombisa Jehova kutsi siyamtsandza nekutsi siyamhlonipha, futsi loko kuzuzisa tsine. (Isa. 48:17, 18) Kodvwa labo labangayilaleli imitsetfo yaJehova batilimata bona.—Gal. 6:7, 8.

¹⁰ Nasiphila ngendlela lejabulisa Jehova, siyavikeleka etintfweni letingalimata imitimba yetfu, imicabango yetfu kanye nebuhlobo betfu naJehova. Jehova uyakwati lokusilungelako. Aurora lohlala e-United States utsi: “Ngiyati kutsi kulalela Jehova kwenta kuphila kujabulise.” Loko kuliciniso kitsi sonkhe. Uzuze njani ngekulalela ticondziso taJehova letikhombisa kutsi uyasitsandza?

11. Umthantazo usisita njani?

¹¹ Umthantazo usisita kutsi silalele ngisho nobe kwenta njalo kuhle kuba kumatima. Ngaletinye tikhatsi, kumatima kulalela Jehova ngenca yekutsi sinesono, kodvwa kudzingeka kutsi setame kamatima kumlalela. Umhlabeleli wancenga Nkulunkulu watsi: “Ungisimise ngekungipha umoya lovumako.” (Hla. 51:12) Denise lolihlahlandlela lelivamile utsi: “Nangiva kumatima kulalela munye wemitsetfo yaJehova, ngiyathantaza ngimcele angiphe emandla ekwenta lokulungile.” Siyaciniseka kutsi Jehova utawuhlale ayiphendvula imithantazo yetfu lekanjalo.—Luk. 11:9-13.

SITA LABANYE KUTSI BATSANDZE BABE WETFU

12. Ngekusho kwa-Efesu 5:1, yini lokufanele siyente?

¹² Fundza Efesu 5:1. “Njengebantfwana labatsandzekako” baJehova, senta konkhe lesingakwenta kuze simlingise. Silingisa buntfu bakhe ngekutsi sitsandzane, sibe nemusa futsi sicolelane. Nangabe labo labangamati Nkulunkulu babona kutiphatsa kwetfu lokuhle, batawufuna kufundza ngaye. (1 Phet. 2:12) Batali labangemaKhristu banetizatfu letinhle tekulingisa Jehova endleleni labaphatsa ngayo bantfwana babo. Nabenta kanjalo, bantfwana babo batawufuna kuba bangani baJehova.

13. Yini lokufanele siyente kuze sibe nesibindzi?

¹³ Bantfwana labancane bavame kujabula kuba nabobabe babo futsi bayakutsandza kukhuluma ngabo. Ngendlela lefanako, siyajabula kuba naBabe wetfu losezulwini Jehova, futsi sifuna kutsi bantfu bati ngaye. Sonkhe sifuna kutiva njengeNkhosi Davide leyabhala yatsi: “Umphefumulo wami utigabatisa ngaSimakadze.” (Hla. 34:2) Kutsiwani nangabe sinemahloni ekukhuluma ngaJehova? Singasitsatsaphi sibindzi? Siba nesibindzi nangabe sicabanga ngekutsi Jehova ujabula kangakanani nasikhuluma ngaye. Jehova utasipha sibindzi lesisidzingako. Wabasita bazalwane betfu bangelikhulu lekucala kutsi babe nesibindzi, futsi natsi utasisita.—1 Thes. 2:2.

14. Ngutiphi letinye tizatfu letenta kubaluleke kutsi sishumayele?

¹⁴ Jehova akakhetsi, ngako uyajabula nangabe asibona sibatsandza labanye ngisho nobe timo tabo tingafani netetfu. (Imis. 10:34, 35) Lenye indlela lesingakhombisa ngayo kutsi siyabatsandza labanye, kutsi sishumayele tindzaba letimnandzi. (Mat. 28:19, 20) Yini lengafezwa ngulomsebenti? Labo labasilalelako bangashintja kuphila kwabo nyalo futsi batfole kuphila lokuphakadze esikhatsini lesitako.—1 Thim. 4:16.

TSANDZA BABE WETFU FUTSI UJABULE

15-16. Ngutiphi tizatfu lesinato tekujabula?

¹⁵ Jehova ungumtali lonelutsandvo, ngako ufuna kutsi umndeni wakhe ujabule. (Isa. 65:14) Kunetizatfu letinyenti letingasenta sijabule nyalo ngisho nobe sibhekana nebumatima. Sibonelo saloko kutsi siyaciniseka kutsi Babe wetfu losezulwini usitsandza kakhulu. Silati kahle liVi laNkulunkulu liBhayibheli. (Jer. 15:16) Siyincenye yemndeni lowehlukile lowakhiwa bantfu labatsandza Jehova, labatsandza timiso takhe futsi labatsandzanako.—Hla. 106:4, 5.

¹⁶ Singahlala sijabulile ngobe siyati kutsi kuphila kutawuba ncono kakhulu esikhatsini lesitako. Siyati kutsi madvutane Jehova utawubasusa bantfu lababi, futsi utawusebentisa uMbuso wakhe kuze ente lomhlaba ube liPharadisi. Siphindze sibe nelitsemba lelijabulisako lekutsi labo labafile batawuvuselwa ekuphileni futsi babe kanye netihlobo tabo labatitsandzako. (Joh. 5:28, 29) Loko kutawujabulisa kakhulu! Lokubaluleke kakhulu kwati kutsi madvutane bonkhe labasezulwini nasemhlabeni batawudvumisa Babe losezulwini futsi batinikele kuye kuphela.